Blog

Hazrat Imaam Husain radiy-Allāhu ta’ala anhu :

Alqaab :
‾‾‾‾‾‾‾‾
Shaheed-e-Aazam, Imaam-e-Aali maqaam, Sayyed-ush-Shabaabi Ahlil Jannah, Raihaan-e-Mustafa, Sibt-al-asghar, Sayyed-ul-Mazloomeen, Imaam-ush-Shohada, Shaah e Karbala.

*************
Aap ki wilaadat 3 Sha’aban 4 Hijri (8 January 626 A.D.) ko Mangal ke roz Madeena munawwara me hui.

Aap ke waalid ka naam Hazrate Ali Murtaza ibne Abu Taalib radiy-Allāhu ta’ala anhu aur waalida ka naam Hazrate Sayyeda Faatima Zahra binte Muhammad Mustafa (sallallāhu alaihi wa sallam) radiy-Allāhu ta’ala anha hain.

Aap Quraish ke Banu Haashim qabeele se ta’alluq rakhte hain.

*************
Aap Ahle bait me se hain aur panjatan me saamil hain.

Aap ke baare me Huzoor sallallāhu alaihi wa sallam ne farmaaya hai :
(1) Hasan aur Husain jannati jawaano ke Sardaar hai.
(2) Husain mujh se hai aur Main Husain se.
(3) Jis ne Husain se mohabbat ki us ne mujh se mohabbat ki.
Aye ALLĀH! Tu us se mohabbat kar jo Husain se mohabbat kare.

****************
Jab kabhi Hazrate Husain radiy-Allāhu ta’ala anhu ke rone ki aawaaz aati thi to Huzoor sallallāhu alaihi wa sallam farmaate ke ‘Aye beti Faatima, Husain ko na rulao, us ke rone se mujhe takleef hoti hai.’

Ek martaba jab Huzoor Rasool-Allāh sallallāhu alaihi wa sallam haalate namaaz me the aur aap khelte khelte naana jaan ki pusht mubarak par sawaar ho gaye to pyare Aaqa sallallāhu alaihi wa sallam ne Husain gir na jaaye is wajah se apne sajde ko taweel kar diya.

Ek Roz Hazrat Jibr’eel alaihis salaam Hazrat Dihyah al-Kalbi radiy-Allāhu ta’ala anhu ki shakl me Huzoor Nabi e kareem sallallāhu alaihi wa sallam ki baargaah me haaazir the. Hazrate Husain waha aaye to Dihyah al-Kalbi samajh kar Hazrat Jibr’eel alaihis salaam ki god me baith gaye aur aadat ke mutaabiq khelne lage, kabhi girebaan me haath daalte, kabhi aaastin me haath daalte. Huzoor Nabi e kareem sallallāhu alaihi wa sallam ne shafaqat ke saath shehzaade Husain ko rokna chaaha to Hazrat Jibr’eel alaihis salaam ne arz kiya ‘Ya Rasool-Allāh sallallāhu alaihi wa sallam! inhe roke nahi. Ye mujhe bahot mehboob hain, Inhe khelne den.’
Phir Hazrat Jibr’eel alaihis salaam ne kaha ‘Ya Rasool-Allāh sallallāhu alaihi wa sallam! Akṡar awqaat jab Aap ki shehzaadi Faatima Zahra namaaze Tahajjud padhkar so jaati thi aur shehzaade Husain gehwaare me hote aur bedaar ho jaate to Rab ta’ala ke hukm se main shehzaade Husain ka gehwara (jhula) jhulaata taake Faatima kucha der aaraam se so le.’

**************
Jab Aap ki umr 7 saal thi tab Huzoore akram sallallāhu alaihi wa sallam ka aur phir Sayyeda Faatima Zahra radiy-Allāhu ta’ala anhu ka wisaal hua.

**************
Aap nihaayat hi haseen wa jameel the.
Aap ki peshaani aur rookhsaar se noor (roshni) nikalkar qarb wa zawaar ko munawwar karta tha.

****************
Ek baar Hazrate Abdullāh ibne Umar radiy-Allāhu ta’ala anhu ke saath khelte hue bahes hui aur Hazrate Husain ne kaha ke ‘Tum aur tumhare waalid dono mere naana jaan ke ghulaam ho.’
Hazrate Umar radiy-Allāhu ta’ala anhu ke kehne par Aap ne ek kaagaz par likhkar diya ke ‘Hazrate Umar aur Ibne Umar mere naana jaan ke ghulaam hain.’

Ibne Umar wo kaagaz lekar Hazrat Umar Faarooq ke paas aaye to Hazrate Umar Farooq radiy-Allāhu ta’ala anhu ne adab se saath us kaagaz ko liya aur kaha ke “Is kaagaz ko hifaazat se rakhna aur jab meri wafaat ho ise meri mayyat ke saath qabr me rakh dena. In shaa Allāh ye kaagaz Rabbul aalameen ki baargaah me meri maghfirat ka zariya banega.”

**************
Aap ki Ibaadat, Husn e akhlaaq, Shakhaawat, Sabr, Ilm, aur Shuja’at mash’hoor hai.

**************
Log Aap se ahkaam e shariat ke masa’il jaanne ke liye aate the.

**************
Aap ne 25 martaba paidal Hajj ada kiye.

**************
Ek roz ek shakhs Imaam Husain ki khidmat me haazir hua aur arz kiya ‘Main kaṡrat e ayaal ki wajah se be-had tangi aur iflaas me hu, Yahan tak ki aaj raat khaane ke liye bhi kuchh nahi.’
Hazrat Aap ne use apne paas thehraaya. Itne me Hazrat Ameer Muawiya radiy-Allāhu ta’ala anhu ne 5 tode dinaaro ke Hazrat Imaam Husain ki khidmat me bheje. Aap ne wo sab tode Us shakhs ko inaayat farma diye aur farmaaya ‘Tujhe thoda intazaar karna pada us ke liye maafi chaahta hu.’

**************
Ek martaba ek zaroorat-mand Dehaati Aap ke darwaaze par haazir hua aur ek parcha is tarah likhkar Aap ke paas bheja ‘Mere paas koi aisi cheez nahi hai jis se ek daana khareeda jaa sake. Meri haalat Aap par zaahir hai jise bayaan karne ki zaroorat nahi hai. Maine aabroo bacha rakhi thi use kisi ke haatho farokht karna pasand nahi karta tha. Magar ab khareed-daar mil gaya hai.’
Ittefaaq se jawaab aane me kuchh der lag gai to Dehaati ne phir se ek parcha is tarah likhkar bheja ‘Jab main lautunga to log mujh se puchenge ke Saahibe Fazal sakhi se tujhe kya mila hai to kya jawaab dunga agar kahunga ke nujhe diya hai to jhut hoga aur agar kahunga ke Sakhi ne apna maal rok liya hai (ya’ni nahi diya hai) to ye baat maani na jaayegi.’
Hazrat Imaame Husain ne 10,000 deenaar ki thaili us dehaati saa’eel ke paas bheji aur saath me kuchh Ash’aar likhkar bheje jis ka mafhoom ye tha :
‘Tum ne jald-baazi ki. So tumhe ye qaleel hissa mila. Agar tum jaldi na karte tumhe aur zyada milta. Abhi itna hi le lo. Yun samajhna ke sawaal kiya hi nahi aur hum yun samajhenge ke hum ne kuchh diya hi nahi.’

***********
Ek baar Aap raaste se guzar rahe the ke kuchh miskeeno ne Aap ko daawat ki. Aap ne use qubool kiya. Un logo ne aap ke saamne roti ke kuchh tukde pesh kiye jo un ko kahi se mile the. Aap ko khaane ki haajat nahi thi magar un logo ki khushi ke liye Aap ne chand luqme khaaye aur phir un sab ko apne ghar par le gaye aur unko achha khaana khilaaya aur kapde aur maal ata kiya.

**************
Hazrat Anas radiy-Allāhu ta’ala anhu bayaan farmaate hain ke
‘Ek din main Hazrat Sayyedina Imaame Husain radiy-Allāhu ta’ala anhu ki khidmat me baitha tha. Aap ki ek Qaneez ne phoolo ka ek guldasta laakar Aap ko pesh kiya. Aap ne guldasta haath me lekar sungha aur Qaneez se irshaad farmaaya : Jaao tum ALLĀH ki raah me aazaad ho.
Maine arz kiya : Aye Shehzaade Rasool! Ek guldaste par itni qeemati qaneez ko aap ne aazad farmaaya? Aap ne farmaaya : Aye Hazrat Anas phoolo ke guldaste ke badle sab se achha tohfa yehi ho sakta tha ke use ALLĀH ke liye aazaad kar du.’

**************
Aap se kisi Ne puchha ‘Islaam kya hai ?’
Imaam ne jawaab diya ‘Khaaliq ki ibaadat aur Insaaniyat ki khidmat.’

**************
Aqwaal :
‾‾‾‾‾‾‾‾‾‾
Aap farmaate hain :

(1) Jannat ke muntazir na raho.
Balke aise ban jaao ke Jannat tumhari muntazir rahe.

(2) Jo ALLĀH ki ibaadat ka pura haq ada karta hai, Khuda use us ki zaroorat aur talab se kahin ziyada ata farmaata hai.

(3) Insaan ko izzat aur martaba us ke Husn e akhlaaq aur nek amal se hi milta hai.

(4) Ilm baghair sach ke mukammal nahi ho sakta.

(5) Jo shakhs apne musalman bhaai ki bhalai chaahega,
Wo Qayaamat ke din us ka badla paayega.

(6) Zulm ke khilaaf jitni der se uthoge utni hi zyada Qurbaani deni padegi.

(7) Jo dunya walo ko raazi karne ke liye ALLĀH ki nafarmaani karta hai ALLĀH ta’ala use dunya waalo ke hawaale kar dega.

(8) Agar tumhe yaqeen ho ke ALLĀH ta’ala tumhare saath hai to koi farq nahi padta ke tumhare khilaaf kaun hai.

(9) Kisi nek kaam ko dikhaawe ke liye mat anjaam do aur kisi neki ko sharmindagi ki bina par mat chhodo.

(10) Eimaan waala wo hi hai jo aakhirat ke liye tosha jama kare,
Sacha Aabid wo hi hai jo ALLĀH ta’ala ki taqseem par raazi rahe.

(11) Jab tum kisi shakhs ko us ki daulat ki wajah se izzat dene lago to samajh lena ke tum ne apna Eimaan kho diya hai.

(12) Jo tumhe aa’ine ki tarah tumhari khaamiya bataaye wo tumhara sacha dost hai aur jo sirf khushaamad karta hai aur tumhari khaamiya jaankar bhi bataata nahi wo tumhara dushman hai.

(13) Agar tumhe ek dusre ki niyyaton ka ilm hota to tum ek dusre ko dafn bhi na karte.

(14) Hathiyaro se jung to jeeti jaa sakti hai, magar dil nahi.
Kyun ki Dil sirf Kirdaar ke saath jeete jaate hain.

(15) Aala darje ka faiyaaz who hai jo aise logo se Husn e sulook kare jin se use koi ummeed na ho.

(16) Dosto ke khilaaf taaqat dikhaana aur Dushmano se bhaagna ye Buzdili hai.

(17) Maal ko kharch karne ka sab se achha tareeqa ye hai ke us se kisi ki izzat o aabroo mehfooz ho jaaye.

******************
Pariwaar :
‾‾‾‾‾‾‾‾‾‾‾‾
Aap ki 4 biwiya aur 3 saahabzaade aur 3 saahabzaadiya hain :

(1) Shahar banu binte Yazdegerd se
1 beta – Zain ul aabideen Ali al-awsat,

(2) Rubaab binte Imra al-Qays se
1 beta – Abdullāh Ali al-asghar,
1 beti – Faatima al-kubra urfe Sakeena.

(3) Layla binte Abi Murrah al- Ṡaqafi se
1 beta – Ali al-akbar,
2 betiya – Ruqayya urfe Sakeena al- sughra, Faatima al-sughra.

(4) Umme Is’hāq binte Talha bin Ubaidullāh al-Ta’imi se
1 beti – Faatima.

♦ Aap ki nasl Hazrat Imaam Zain ul aabideen Ali al-Awsat rahmatullāhi alaihi se jaari hai.

**************
Hazrate Uṡmaan Ghani radiy-Allāhu ta’ala anhu ke zamaane me Aap Jung e Tabaristan (30 Hijri) me saamil hue.

35 Hijri me jab raafziyo ne Ameer ul mo’mineen Hazrate Uṡmaan Ghani radiy-Allahu ta’ala anhu ke makaan par ghera daala to tab Aap ne Hazrat Hasan ibn Ali, Hazrat Abdullāh ibn Zubair aur Marwaan ibn Hakam ke saath un ki hifaazat ke liye un ke ghar par pehra diya.

Hazrat Ali radiy-Allāhu ta’ala anhu ke zamaane me Aap Jung e Jamaal (Jamaadi ul awwal 36 Hijri) aur Jung e Siffin (Safar 37 Hijri ) me saamil hue.

******************
Aap Huzoor sallallāhu alaihi wa sallam ke khalifa Hazrat Ali radiy-Allahu ta’ala anhu ke Silsila e tareeqat ke 4 khalifa me se hain.

Aap Aa’imma e Ahle bait ke teesre Imaam hain.
Aap Imaam Hasan al-Mujataba radiy-Allāhu ta’ala anhu ke wisaal ke baad Imaam bane.

************
Rajab 60 Hijri me Hazrate Ameer Muawiya ke inteqaal ke baad un ke bete Yazeed ne Waleed Bin Uqba khat lekar bheja aur Madeena me Hazrat Husain ibn Ali, Abdullāh ibn Abu Bakr, Abdullāh ibne Umar Faarooq aur Abdullāh ibn Zubair radiy-Allāhu ta’ala anhuma ko bai’at ke liye kaha.

Aap ne Yazeed ibne Muawiya se bai’at karne se inkaar kiya.
Kyun ki Yazeed Faasiq tha aur har kaam khilaaf e shariat karta tha.

Jab Yazeed ka zulm badhne laga to Aap Maahe Sha’abaan 60 Hijri me Madeena se Makka tashreef le jaane ka faisla kiya taake Madeena munawwara me jung na ho aur khoon-rezi na ho.

Madeena munawwara se rawaangi se pehle raat ko naana jaan Huzoor Sarwar e Kaunain sallallāhu alaihi wa sallam ke Roza e anwar par haazir hue aur ro rokar haal arz kiya. Phir roza e anwar se lipatkar wahi so gaye. Khawaab me dekha ki naana jaan tashreef laaye hain. Huzoor sallallāhu alaihi wa sallam ne Husain ko chuma aur sina e aqdas se laga liya aur farmaaya ‘Beta Husain! Anqareeb zaalim tumhe Karbala me bhuka pyaasa shaheed kar denge. Tere maa baap aur bhai tere intezaar me hain aur jannat tere liye sajaai jaa rahi hai. Us me aise darzaat e aaliya hain jo shaheed hue baghair tumhe nahi mil sakte. Jaao beta, sabr wa shukr se jaam e shahaadat nosh karke mere paas aa jao.’
Aap yeh khawaab dekhkar ghar aaye. Ahle bait ko jama karke yeh khawaab sunaaya aur Madeena se Makka jaane ka pakka iraada kar liya aur phir apne biradare buzurg Hazrat Imaam Hasan radiy-Allāhu ta’ala anhu ke mazaar par haazir hue aur kalimaat e rukhsat kahe aur phir apni waalida Sayyeda faatim radi-Allāhu ta’ala anha ke mazaar par hazir hue aur arz kiya ‘Aye Ammi jaan, Tumhara Husain aaj tum se juda hone aaya hai aur aakhri salaam arz karta hai.’ Qabr e anwar se aawaaz aai ‘Wa alaikum assalaam Ya mazloom.’ Aap waha kuch der rote rahe aur phir waapas tashreef laaye aur subah ko Makka mukarrama ko rawaana ho gaye.

4 Sha’abaan 60 Hijri ko Aap Madeena ke liye rawaana hue.

******************
Karaamat :
‾‾‾‾‾‾‾‾‾‾‾‾
Jab Imaame Husain radiy-Allāhu ta’ala anhu Madeena munawwara se Makka mukarrama ki taraf rawaana hue to raaste me Hazrat Ibne Mutti’ rahmatullāhi alaihi se mulaaqat hui. Unho ne arz ki ‘Mere kuen me paani bahot kam hai. Bara e karam aap dua e barkat kijiye.’ Aap ne us kuen ke paani ko talab farmaya. Jab paani ka dol haazir kiya gaya to aap ne munh lagakar us me paani piya aur us me kulli ki. Phir dol ke paani ko waapas kuen me daal diya. To kuen ka paani kaafi badh gaya aur pehle se zyada meetha aur lazeez bhi ho gaya.

******************
Jab Aap Makka mukarrama pahunche to Hazrate Abdullāh ibn Zubair radiy-Allāhu ta’ala anhu se mulaaqaat hui aur Aap ne un ke yaha qayaam farmaaya.

Kuchh mahine tak Aap Makka mukarrama me rahe.
Is dauraan Ahle Kufa ne Aap ko khat likhkar Kufa aane ke liye paighaam bheje.
Imaame Husain ko khat likhkar arz kiya gaya ke ‘Hamare sar par koi imaam nahi hai to Aap tashreef laaiye ke Aap ki barkat se hum ko haq ki himaayat naseeb ho.’
Ye pehla khat Abdullāh bin Subi’i Hamadani aur Abdullāh bin Daal ke haatho Imaame ki khidmat me bheja gaya. Jo 10 Ramazaan 60 Hijri ko Makkah mukarrama pahuncha. Is tarah har roz kai khat Aap ko Ahle Kufa ki taraf se milte rahe. Aur wo log khat me kehne lage ke ‘Agar aap bai’at ke liye Kufa tashreef na laaye to hume majbooran Yazeed se bai’at karni hogi.’
Aakhir me Hazrate Haani bin Haani Subi’i aur Saeed bin Abdullāh Hanafi ka khat milne par mashwara karke tay kiya gaya ke aap ke chachazaad bhai Hazrate Muslim bin Aqeel Kufa jaakar haalaat ka jaa’iza len aur phir Imaam Husain waha tashreef le jaayen.
Aap ne jawab likkha ke ‘Tum logon ke jazbaat wa aqeedat o mohobbat ka lihaaz karte hue me apne chachazaad bhai Muslim bin Aqeel ko bhej raha hu. Agar unho ne haalaat saazgaar hone ki khabar di to main bhi jald chala aaunga.’
Imaam Husain ne unhe Kufa ke qaasid Qays bin Saidawi, Ammarah ibn Abdullāh al-Saluli aur Abdur Rahmān ibn Abdullāh al-Azdi ke saath Kufa bheja.

********************
Hazrat Muslim bin Aqeel 15 Ramazaan 60 Hijri ko Makka se rawaana hue aur Madeena pahunche. Roza e Rasool par haazir hone ke baad jab apne ghar par tashreef le gaye aur saari baat batakar Kufa ke rawaana hone ki tayyaari kar rahe the tab aap ke 2 saahabzaade Muhammad aur Ibrāheem ne bhi un ke saath aane ki zid ki.
Dono saahabzaado ko saath lekar 5 Shawwaal ko Kufa pahunche aur Mukhtaar ibn Abu Ubaid al-Ṡaqafi ke ghar par thehre. Ahle Kufa ne un ka isteqbaal kiya aur bahot ta’azeem ki. 12000 logo ne un se bai’at ki. Chand din ke baad unho ne Imaam Husain ko qaasid ke saath Kufa waalo ke husn e sulook ke baare me aur aap ko Kufa tashreef laane ke liye paighaam bheja.

Muslim bin Yazeed Hajrami aur Ammara bin Waleed bin Uqaba ne Kufa Se khufiya tareeqe se Yazeed ko ittela de di. Yazeed ko jab Kufa ke haalaat ka pata chala to us ne Basra ke governer Ubaidullāh ibne Ziyad ko bulaakar Nomaan ibn Basheer ki jagah par use Kufa ka governor banaaya.
Ubaidullāh ibne Ziyad ne logo ko daraaya ke ‘Agar tum Yazeed ke khilaaf rahoge to tum logo ka bura anjaam hoga.’ Hukoomat ke khuaf ki wajah se Kufa ke log aahista aahista Hazrat Muslim bin Aqeel ko chhodkar jaane lage.

Phir Hazrate Muslim Hazrate Haani bin Urwa ke ghar par aa gaye. Ibne Ziyad ne apne ghulaam Ma’aqil ko Hazrat Muslim ke saathiyo me saamil karaaya. Ma’aqil se khabar milne par Ibne Ziyad ne Hazrate Haani ko qaid kiya aur un par bahot zulm kiya.
Hazrat Muslim bin Aqeel khud ko bachaate hue Taw’ah naami aurat ke ghar par pahunche aur peene ke liye paani maanga. Us aurat ne haqeeqat jaankar aap ko panaah di. Magar us ke bete ne Ibne ziyad ko khabar de di. Hazrat Muslim bin Aqeel ko gher liya gaya. Aap ne bahaaduri ke saath sipaahiyo ka muqabala kiya. Aakhir me wo log chhat par chadh gaye aur patthat phenkne lage au un ko qaid kar liya gaya aur un ko shaheed kar diya gaya. Aur is ke baad un ke dono saahabzaado ko bhi bhi shaheed kar diya gaya.

Is ke baad Hazrate Haani bin Urwa ko bhi shaheed kar diya gaya.
Phir Hazrate Muslim ke 2 bache Muhammad aur Ibrāheem ko bhi Haariṡ naai shakhs ne shaheed kar diye.
Phir in bacho ko madad karne ke liye qaid-khaane se baahar nikaalne waale Mashkoor naami daarogha ko bhi shaheed kar diya gaya.

******************
Lekin is duaraan Imaam Husain Ahle bait aur apne saathiyo ke saath Makka se Kufa tashreef le jaane ka faisla kar liya tha.
Jab Ahle Makka ko Imaame Husain ka Iraq ki taraf jaane ka pata chala to Hazrate Abdullāh bin Abbaas, Abdullāh bin Umar, Jaabir, Abu Saeed Khudri, Abu Waqid Laisi aur deegar Jaleel-ul-Qadr sahaaba Aap ke paas aaye aur arz ki ke ‘Aap Koofa hargiz na jaayen. Waha ke log laalachi hain. Aap ko dhoka de sakte hain.’
Aap ne farmaaya ke ‘Main ALLĀH se khair ka taalib hu. Dekhte hain ke kya hota hai.’

Aap 3 Zil Hijja 60 Hijri ko Tawaafe Ka’aba karke apne ahle bait aur aqaarib ke saath Makka mukarrama se Kufa ki taraf rawaana ho gaye.

Maqaame Zaat-ul-Irq par Baser bin Ghaalib Asadi se mulaaqaat hui jo Kufa se aa rahe the un se Kufa waalo ka haal puchha to unho ne jawaab diya ke ‘Huzoor! Kufa waalo ke dil aap ke saath hai aur talwaaren Bani Umayya ke saath hai.’
Maqaame Saffah par Farzaduk naami shaayar se mulaaqaat hui jo Kufa se aa rahe the un se Kufa waalo ka haal puchha to unho ne bhi yehi jawaab diya ke ‘Huzoor! Kufa waalo ke dil aap ke saath hai aur talwaaren Bani Umayya ke saath hai.’

Maqaame Batne Rooma pahunchkar Aap ne Hazrat Qays bin Mushir ke saath Kufa waalo ko ek khat bheja ke ‘Hazrate Muslim bin Aqeel ka khat hume mila. Is liye main anqareeb tumhare paas aa raha hu.’
Hazrat Qays bin Mushir Maqaame Qaadsiya par pahunche to Hasin bin Nameer ko bade lashkar ke saath padaaw daale dekha aur pata chala ke Ibne Ziyad ko ma’aloom ho chuka hai ke Imaame Husain Makka mukarrama se Kufa ke liye rawaana ho chuke hain. Is liye Ibne Ziyad ne tamaam raasto par sipaahiyo ki chokiya bitha di hai.
Ye jaankar Hazrat Qays bin Mushir ne chaaha ke posheeda tor par waha se nikal jaaye. Lekin Hasin bin Nameer ne un ko giraftar kar liya aur Ibne Ziyad ke paas Kufa bhej diya. Ibne Ziyad ne Hazrat Qays bin Mushir se kaha ke ‘Main ek shart par tumhe chhod sakta hu ke Tum Jum’aa ke roz Kufa ki Jaama masjid ke mimbar par Husain ki buraai aur Yazeed ki ta’areef karo.’
Unho ne iqraar farma liya. Magar Jum’aa ke roz mimbar par chade to Yazeed ki khabaasat bayaan karke Imaame Husain radiy-Allāhu ta’ala anhu ki khoob Ta’areef o tausif ki. Ibne Ziyad ne ghusse me aakar un ko chhat par chadwa kar teesri manzil se girakar shaheed kar diya.

****************
Jab Imaame Husain Manzile Batne Rooma se aage badhe to ek kunwe par Hazrat Abdullāh bin Mutee’a se mulaaqat hui. Unho ne Aap se puchha ‘Aye Ibne Rasool-Allāh! Aap kaha tashreef le jaa rahe hain?’ Aap ne apne safar ka maqsad bayaan kiya to Hazrat Abdullāh bin Mutee’a ne arz kiya ‘Aye Sibte Rasool! Main Aap ko Hurmate Islaam, Hurmate Arab aur Hurmate Quraish ka waasta deta hu ke aap Kufa tashreef na le jaayen. Waha yaqeenan shaheed kasr diye jaayeenge.’Aap ne farmaaya ‘Hume hargiz koi takleef na pahunchegi magar sirf wohi jio ALLAH ne hamari taqdeer me likha diya hai wo hoga.’

*****************
Maqaame Zarood par bulandi par ek khaima laga hua nazar aaya. Ma’aloom hua ke Hazrat Zahir bin Keen Bijli hain jo Hajj karke aaye hain aur Kufa jaa rahe hain. Imaame Husain ne unhe bulwaaya. Jab wo aaye aur qaafila e Ahle bait ko dekha to un ke chehre p[ar khushi chha ghai. Apne saathiyo se kaha ke ‘Mera khaima Imaame Aali maqaam ke khaime ke saath laga do.’ Phir farmaaya ‘Jise shahaadat ki tamanna ho wo mere saath rahe aur jo ghar jaana chaahe chala jaaye.’ Phir apni biwi ko bulaakar kaha ‘Main Imaame Aali maqaam ke saath jaa raha hu. Ab Zindagi ka e’tbaar nahi. Lihaaza tum mere maal me se jitna chaaho le lo aur apne waalidain ke ghar chali jaao. Biwi saahiba ne rote hue arz kiya ‘Aap Imaame Aali maqaam ki khidmat ke liye un ke saath jaa rahe hain to main bhi Sayyeda Faatima Zahra radiy-Allāhu ta’ala anha ki saahabzaadiyo ki kaneez bankar chalungi.’

*****************
Maqaame Salba par pahunche Aap ko Hazrat Muslim aur Hazrat Haani bin Urwa ki shahaadat ki khabar mili. Aap ne baar baar padha ‘Inna lillāhi wa inna ilaihi raajioon.’

*****************
Aap Maqaame Sarat se kuchh aage badhe to theek dopahar ke waqt Hazrat Hur ka lashkar raaste me mila. Us lashkar ne chaaro taraf se Aap ke qaafile ko gher liya.
Aap ne is kas maqsad jaanne ke l;ioye aadmi bheja to Hazrat Hoor khud haazire khidmat hue. Aap ne un ko dekhkar farmaaya ‘Aye Hoor! Ye lashkar hamariu madad ke liye aaya hai ya hume giraftaar karne ke liye?’
Hazrate Hur ne jawaab diya ‘Huzoor! Ye lashkar Ibne Ziyad ka hai aur Aap ke muhaasre ke liye hai. Mere zimme sirf ye kaam hai ke main aap ko Kufa ke darwaaze tak pahuncha du.’
Zohar ki namaaz ka waqt hua to Aap ne Hazrat Hoor se kaha ‘Jaao, Tum apne lashkar ke saath namaaz padho, Main apne logo ke saath namaaz ada karunga. Hazrat Hoor ne Aap ki iqtida me namaaz ada karne ke liye arz ki aur dono giroh ne Imaame Aali maqaam ki iqtida me namaaze zohar ada ki.
Namaaz se faarigh hokar Aap ne Hazrate Hur aur un ke saathiyo ko bataaya ke ‘Main Kufa ke liye khud-ba-khud nahi aaya balke mujhe bulaane ke liye Ahle Kufa ne muttwatir payaam Aur musalsal khat bheje hain.’
Hazrat Hoor ne qasam khaakar kaha ke ‘Huzoor! Mujhe is ka kuchh ilm nahi hai.’

Namaaze asr ada karne ke baad Ibne Ziyad ka qaasid ek khat lekar Hazrat Hoor ke paas aaya, jis me likha tha ke Husain ke qaafile ko aisi jagah rok lena ke jaha paani aur ghaas na ho.’ Hazrat Hur ne Imaame Husain se iltija kio ke ‘Huzoor! Aap lashkar se saath aap ka qaafila lekar chalen. Jab raat me sab so jaayen to aap apne qaafile ke saath waha se dusri jaanib rawaana ho jaana. Main ye keh dunga ke raat me sab log chale gaye aur hum be-khabar rahe.’
Chunaanche Imaam Husain raat me apne qaafile ke saath rawaana ho gaye. Raat bhar safar karne ke baad 2 Moharram Jumeraat ke roz Aap ka ghoda ek maqaam par rook gaya aur bahot koshish ke baad bhi aage na badha. Aap ne udhar se guzarne waale ek shaks se pucha ke ‘Is sar zameen ka naam kya hai?’ Us ne kaha ‘Ise Mariya kehte hain.’ Aap ne farmaaya ‘Is ka aur koi naam hai?’ Us ne kaha ‘Ise Karbala bhi kehte hain.’ Aap ne waha qayaam kiya.

Hazrat Hur ne khufiya paighaam bhejkar Aap ko iltija ki ke ‘Huzoor! Karbala se aage kuch kar jaayen.’ 7 Muharram 61 Hijri tak musalsal har raat ko Aap safar farmaate rahe. Magar Subah ko khud ko usi maqam par paate jaha se chale the. Aap jaan gaye ke yehi marzi e khuda hai. Chunaanche Aap ne wahi muqeem hone ka faisla kiya.

********************
Kufa ke governor Ubaidullāh ibne Ziyad ne Umar ibn Sa’ad ki sardaari me ek bada lashkar bheja. Us lashkar ne Aap ko Karbala me gher liya.
Jab Ibne Ziyad ne Imaam Husain ko ye paighaam pahunchaya gaya ke ‘Agar ab bhi Yazeed se bai’at kar lo to amaan paaoge.’ to Aap ne is ko qubool karne se inkaar kar diya aur farmaaya ‘Aise haalaat me main maut ko shahaadat aur zaalimo ke saath zinda rehne ko zillat maanta hu.’

Ibne Ziyad ke hukm par Amr bin Hajjaaj ne 500 sawaaro ke saath Nehr e Furaat (Euphrates) par qabza kar liya.
Yazeedi lashkar ne Imaam Husain aur aap ke saathiyo ke liye paani band kar diya aur be-shumaar gustaakhiya aur zulm kiye.

*******************
Jab jung ke ilaawa aur koi raasta baaqi na raha tab Aap ne Hazrate Abbaas ko bhejkar paighaam diya ke ‘Aaj raat ki mohlat de do taake hum kuchh ibaadat kar len.’ Unho ne ye baat maan li.

Raat ko Imaam Husain radiy-Allāhu ta’ala anhu ne apne saathiyo ko jama karke farmaaya ‘Aye mere saathiyo! Yazeed ki dushmani mujh se hai aur ye lashkar e baatil mujhe qatl karna chaahta hain. Aur ye munaasib nahi ki meri wajah se tum sab ki jaan ko khatra ho. Chunaache aap sab yaha se tashreef le jaao aur salaamat jagah par chale jaao.’
Kuchh der tak koi khaime se baahar nahi gaya to Aap ne farmaaya ‘Lagta hai ki sab ke saamne yaha se jaane me tum log sharm mehsoos kar rahe ho. Is liye khaime ke tamaam chiraagh bujha do. Aur andhere me yaha se baahar nikal jaao.’ Jab chiraag waapas jalaaye gaye to aap ne dekha ki koi waha se baahar nahi gaya tha.
Tab aap ne farmaaya ‘Shaayad tum log ye soch rahe ho ki mehshar me mere naana jaan Huzoor Rasool-Allāh sallallāhu alaihi wa sallam ke saamne kis tarah haazir honge. Magar main ye zimmedaari leta hu ki main waha gawaahi dunga ki mere kehne par hi ye sab mujhe chhodkar gaye the.’
Jab Aap ne ye farmaaya to aap ke saathiyo ne arz kiya ‘Aye Imaam e aali maqaam! Aap hume yaha se jaane ke liye keh rahe hain. Magar hum aashiqaan e Rasool hain aur aap ke wafadaar saathi hain. Aale Rasool ko museebat me chhodkar yaha se jaane waale nahi hain. Hum aap ke saath hi rahenge aur aap ki hifaazat ke liye apni jaano ki qurbaani denge. Aur qayaamat me bhi in sha Allāh aap hi ke saath rahenge.’

Phir Aap ne apne Ahle bait aur saathiyo ko naseehat farmai aur saari raat ibaadat me guzaari.

******************
Is ke baad raat ko pichhle paher Aap apne khaime ke darwaaze par talwaar se tek lagaakar baithe the ke isi haalat me istigraak ki kaifiyat taari hui aur aankh lag gai. Huzoor Rasool-Allāh sallallāhu alaihi wa sallam aap ke khwaab me tashreef laaye aur farmaaya ‘Aye Husain! Mere dil ke chain, Main khoob jaanta hu ke dushman tumhare pichhe pade hain aur tumhe qatl karna chaahte hain. Beta, tum sabr wa shukr se is waqt ko guzaarna. Tere jitne qaatil hain qayaamat ke din meri shafa’at se mahroom rahenge aur tujhe shahaadat ka bahot bada darja milne waala hai. Ab jald hi tum humare paas aane waale ho. Tere waalidain jannat ke darwaaze par teri raah dekh rahe hain.’ Phir Huzoor sallallāhu alaihi wa sallam ne aap ke sar wa seene par haath mubarak pherkar dua ki ‘Aye ALLĀH! Mer Husain ko sabr wa ajr inaayat farma.’ Aap ki aankho se aansoo jaari ho gaye. Aap ki aawaaz sunkar Sayyeda Zainab waha aai to Aap bedaar hue aur Sayyeda Zainab ke puchhne par aap ne ye sab baaten batai. Ye sunkar Aap ki humshira rone lagi. Aap ne unhe tasalli di.

****************
Dusre din Aap ne apne saathiyo ke saath namaaze fajr aur phiz namaaze ada ki.

Phir yazeedi lashkar se mukhaatib hokar shaandaar taqreer farmai.
Jise sunkar Hazrat Hur radiy-Allāhu ta’ala anhu ne Ibne Sa’ad se kaha ke ‘Kya waqaai me tum log Imaame Husain ke saath jung karoge?’ Ibne Sa’ad ne kaha ke ‘Haan, Hum zaroor jung karenge.’ Ye sunkar Hazrate Hoor foran yazeedi lashkar se nikalkar Imaame Aali maqaam ki baargaah me haazir ho gaye aur arz kiya ‘Aye farzande Rasool-Allāh sallallāhu alaihi wa sallam! Main wohi Hoor hu jo Aap ko manzile Suraat par mila tha aur aap ko roka tha. Ab main Baargaahe Rabbul aalameen me tauba karta hu. Kya meri tauba qubool ho sakti hai?’ Aap ne farmaaya ‘Haan, ALLĀH ta’ala tumhari tauba qubool farmaega.’

Umar ibne Sa’ad aur Shimr ne kaha ‘Ab zyada guftagu mat karo aur jung ke liye tayyaar ho jaao.

Aap ne Islaam ki hifaazat ke liye Yazeedi lashkar ke saath jung ki.
Aap ne Memna par Hazrat Zaheer bin Qeen radiy-Allāhu ta’ala anhu ko muqarrar kiya. Meisra par Hazrat Habeeb bin Mazaahir radiy-Allāhu ta’ala anhu ko muqarrar kiya. Alam (Jhanda) apne Bhai Hazrat Abbaas radiy-Allāhu ta’ala anhu ko diya.

Umar ibne Sa’ad ne Husaini lashkar ki jaanib teer chalaaya aur kaha ‘Tum sab gawaah ho jaao ke Husain par sab se pehle maine teer chalaaya hai.’
Is ke baad foran yazeedi lashkar se 10,000 teer chalaaye gaye.
Phir Ziyad bin Abu Sufyaan ka aazaad karda ghulaam Yaasar aur Ibne Ziyad ka aazaad karda ghulaam Saleem maidaan me aaye aur muqaabale ke liye lalkaar. Un ke muqaabale ke liye Hazrat Habeeb bin Mazaahir aur Hazrat Barir bin Hazeer radiy-Allāhu ta’ala anhuma aage badhne lage. Magar Imaam ne unhe rok liya.
Phir Hazrate Abdullāh bin Umer Kalbi Imaame Aali maqam se ijaazat lekar aage aaye. Yaasar aur Saleem ne un se muqaabala karne se inkaar kiya. Magar unho ne talwaar chalaakar dono ko qatl kar diya aur phir jung karte hue shaheed ho gaye.

Is tarah Aap ke jaan-nisaar aur wafaadaar saathi ek ke baad ek aap se ijaazat lekar maidaan e jung me aate rahe aur bahaaduri ke saath Yazeedi lashkar se jung karte rahe aur jaam e shahaadat nosh karte rahe. Tamaam ne azeem qurbaani pesh ki.
Jin me Hazrate Hur bin Yazeed al-Tameemi, Muslim Bin Ausaja al-Asadi, Zuhair ibn Qeen aur Habeeb ibn Muzaahir aur deegar aashiqaan e ahle bait aur phir Aap ke bhai Hazrate Abbaas radiy-Allāhu ta’ala anhu aur deegar bhai, aap ke bhatije Hazrate Qaasim, Abu Bakr aur Abdullāh bin Hasan, aap ke bhaanje Hazrte Aun aur Muhammad ibn Abdullāh, aur aap ke bete Naujawaan Hazrte Ali akbar aur 6 maah ke Ali asghar aur deegar Ahle bait shaheed ho gaye.

*****************
Is ke baad Husaini khaime me aap ke ilaawa chand aurten, chand bache aur shadeed beemaar Hazrat Zainul aabideen Ali ibn Husain baaqi rahe.
Imaam e Husain radiy-Allāhu ta’ala anhu ne Quba-e-Misri Pehni, Amaama Rasool-e-Khuda baandha, Sapar (dhaal) -e–Hamza aur Zulfikar-e-Ali Murtaza lekar maidaan ne jung me jaane ka iraada kiya.

Maidaan e jung me jaane se pehle Aap Hazrat Zainul aabideen ke paas aaye to unho ne bistar se uthne ki koshish karte hue kaha ke ‘Aye Abba jaan! Abhi main maujood hu. Is liye aap se pehle mujhe maidaan e jung me jaane ki ijaazat den.’ Magar beemaari aur kamzori ke sabab khade na ho paaye. Imaame Husain ne farmaaya ke ‘Aye mere bete! Rab ta’ala ki ye hi marzi hai ke tum meri shahaadat ke baad Ahle bait ki aurto ki hifaazat karo aur tum se hi meri nasl jaari rahegi.’
Phir Imaam e Husain ne Hazrat Zainul aabideen ko Khilaafat aur Imaamat ata farmai. Aur wo phir se be-hosh ho gaye.

Is ke baad aap ne apne Ahle bait se wa’az aur naseehat farmaai ke ‘Meri judaai aur museebat par sabr karna. Jab main maara jaaun to hargiz munh aur seena na peetna aur baal na nochna aur girebaan chaak na karna. Aye bahen Zainab! Tum Faatima Zahra ki beti ho. Jis tarah unho ne Huzoor sallallāhu alaihi wa sallam ki judaai par sabr kiya tha usi tarah tum bhi meri museebat par sabr karna.’

******************
Is ke baad aap maidaan e jung me aaye.
Pehle aap ne khutba diya aur farmaaya ‘Aye logo! Mujhe pehchaano, Mujhe Huzoor Rasool-Allāh sallallāhu alaihi wa sallam ne Jannati jawaano ka sardaar bataaya hai. Agar ye nahi maante to kam se kam ye to yaad karo ke main Huzoor Nabi e kareem sallallāhu alaihi wa sallam nawaasa hu aur aaj puri dunya me mere siwa aur koi nabi ka nawaasa maujood nahi. Main Ali ka beta hu aur Faatima ka peesar hu. Agar tum jung rok do aur hume salaamat jaane do to main tumhe muaf kar dunga. Tum me se koi mere bhai ka qaatil hoga, koi mere bhatije ka aur bhaanje ka qaatil hoga, koi mere naujawaan bete Ali akbar ka aur koi mere bete Ali asghar ka qaatil hoga. Magar main use bhi muaf kar dunga. Magar tum ye mat samajhna ke Husain dar gaya hai. Agar Islaam ki azmat aur waqaar ki hifaazat ke liye meri qurbaani bhi deni pade to main is ke liye bhi tayyaar hu.’

Zaalim yazeedi lashkar wale na maane to Islaam ki hifaazat ke liye Aap maidaan e jung me aa gaye aur aisi shuja’at dikhaai ki lashkar ko bhaagne ka raasta dikhai nahi deta tha.
Aap jab ek jagah rook kar khade ho gaye. Jaz’az naami ek zaalim ne aage badhkar aap par talwaar se hamla kiya. Aap ne us ka haath pakadkar aisa jhatka diya ke us ka haath kandhe se juda ho gaya. Ab zaalimo ne door se hi teer chalaana shuru kiya. Chaaro taraf se teer aur nejo ki baarish hone lagi. Ek teer aap ki peshaani mubarak par laga aur khoon ka fawwaara jaari gaya. Aap ne us chullu me lekar apne chehre par mal liya.
Aakhir me jab aap ghode se girkar neeche tashreef laaye to ek zaalim ne aap ko teer maara jo aap ke halak par lag gaya. Phir chand zaalimo ne aap ko gher liya. Jar’aa ibn Shuraik ne aap ke dast e mubarak par talwaar maari, Shimr ibn Zil-Jawshan aap ke gale mubarak par talwaar maari aur Sinaan ibn Anas ne pusht mubarak par neza maara. Phir Shimr ibn Zil-Jawshan aap ke seene ke upar chadh gaya to aap ne us se 2 rak’at namaaz ada karne ke liye mohlat maangi.
Dopahar dhal chuki thi. Aap maidaan e jung me hi namaaz e zohar padhna shuru kiya. Dauraan e namaaz haalat e sajda me Shimr ibn Zil-Jawshan ne khanjar se aap ko shaheed kar diya aur Khauli bin Yazeed ne aap ke sar ko kaatkar jism se juda kar diya.

Imaam ne jung ke duraan namaaz ke liye sajde me sar rakha magar ye aisa bemisaal sajda ban gaya ke sajde se sar waapas utha nahi.

*****************
Is tarah Aap ne Karbala me Islaam ki hifaazat ke liye baatilo ke khilaaf jung ki aur apne khaandaan aur jaan-nisaar saathiyo ki qurbaani di aur khud bhi shaheed ho gaye.
Aur Mo’mino ko ye dars e amal diya ke hamesha haq ka saath dena, Aur koi bhi pareshaani ho Sabr aur Namaaz se ALLĀH ta’ala se madad talab karna.

**************
Karaamat :
‾‾‾‾‾‾‾‾‾‾‾‾
Abdullāh Yemeni naami Imaame Husain radiy-Allāhu ta’ala anhu ke mureed tijaarat ke liye jahaaz me saamaan ke saath samundar me safar kar rahe the. 10 Moharram 61 Hijri ko dopahar ke waqt jahaaz toofaan me phans gaya. Jab laga ke jahaaz doob jaayega to unho ne Imaam ko yaad karke istighaaṡah ki ke ‘Aye farzande Rasool! Khabar lijiye.’
Foran ek naqaab-posh buzurg tezi se paani ke upar ghoda daudate hue tashreef laaye jin ke kapdo par gard o gubaar aur khoon ke chheente hain Aur dono haatho se ek nanhe bache ko gale lagaaye hue hain. Us bache ke hulkum se khoon ke qatre tapak rahe hain.
Toofaan ke andar ghode ko laakar jahaaz ke paas tashreef laaye. Haath to khaali nahi the. Lihaaza apne daahine baazu se jahaaz ko sahaara dekar toofaan se baahar pahunchaaya.

Hazrat Abdullāh Yemeni ne ye hairat afroz manzar dekhkar arz kiya ‘Huzoor! Aap kaun hain?’ Us buzurg ne apne chehre se naqaab hataaya to dekha ke Imaame Husain jalwa afroz hain.
Hazrat Abdullāh Yemeni be-chain hokar arz kiya ‘Aye Aaqa! Meri jaan aap par qurbaan, mere maa-baap aap par qurbaan, Main Sarkaar ko kis haal me dekh raha hu.’
Imaame Aali maqaam farmaaya ‘Aye Abdullāh Yemeni! Mere naana jaan ka kalma padhne walo aur un ke ummati kehlaane waale zaalimo ne Maidane Karbala me mere qaafile ko ghera hai. Chaahte hai ke faasiq o faajir, be-namaazi Yazeed se Bai’at karke Aaqa sallallāhu alaihi wa sallam ke deen e paak ko paamaal kar du.’

**************
Aap 10 Moharram 61 Hijri (10 October 680 A.D.) ko Jum’aa ke roz shaheed hue.

Aap ka mazaar Karbala (Iraq) me hai.

*************
Imaam e Aali maqaam Shaheed e aazam ki karaamat shahaadat ke baad bhi jaari hai.
Shahaadat ke baad bhi aap ka sar mubarak Tilaawat e Qur’an kar raha tha.

Hazrate Zaid bin Arqaam radiy-Allāhu ta’ala anhu se riwaayat hai ke
Jab yazeediyo ne Imaame aali maqam Sayyeduna Imaam Husain radiy-Allāhu ta’ala anhu ke sare anwar ko naize par chadha kar Kufa ki galiyo me gasht kiya us waqt main apne makaan ke baalakhane par tha.
Jab sare mubarak mere samne se guzra to maine suna ke sare paak ne Qur’an majeed ki Surah al-Kahf ki Aayat -9 tilaawat farmai.
Tarjuma : ‘Kya tumhe ma’aloom hua ke pahaad ki khoh (gaar) aur jangal ke kinaare wale hamari ek ajeeb nishaani the.’

Ek buzurg se riwaayat hai ke Jab yazeediyo ne Imaam Husain radiy-Allāhu ta’ala anhu ke sare mubarak ko naize se utarkar Ibne Ziyad ke mahel me daakhil kiya to aap ke muqaddas honth hil rahe the aur zabaane aqdas par Surah Ibrāheem ki aayat – 42 ki tilaawat jaari thi.
Tarjuma : ‘Aur hargiz ALLĀH ta’ala ko be-khabar na jaanna zaalimo ke kaam se.’

**************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Imaam Husain radiy-Allāhu ta’ala anhu aur Shohada e Karbala aur Ahle bait waseele se
Sab ko mukammal ishqe Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

The Fikreummat Foundation

Hazrat Imaam Abu Haneefa Nomaan bin Ṡaabit rahmatullāhi alaihi :

Alqaab :
‾‾‾‾‾‾‾‾
Imaam e aazam, Siraaj-ul-Ummah.

*******************
Aap ki wilaadat 80 Hijri (5 September 699 A.D.) me Kufa (Iraq) me hui.

Aap ke waalid ka naam Ṡaabit bin Zuta hai.

Aap ke daada Faars (Iran) se Arab aa gaye the.

***********************
Ek baar Aap apni waalida ko kuchh paighaam pahunchane ke liye jaa rahe the.
Jab Aap Kufa ke mashh’oor aalim Hazrat Sha’bi rahmatullahi alaihi ke ghar ke paas se guzre. Hazrat Sha’bi ne Aap ko apna shagird samajhkar kaha ‘Apni class me jaakar padho.’ To Aap ne kaha ‘Main to madrase me padhta nahi hu.’
Tab Hazrat Sha’bi ne farmaaya ki ‘Mujhe tum behad zaheen lagte ho. Tumhe kisi aalim ya buzurg ki sohbat me rehna chaahiye.’

Hazrat Sha’bi ki baat maankar Aap Hazrat Hammaad ibn Abi Sulaimān rahmatullāhi alaihi ki sohbat me rehkar Ilme deen sikhne lage.

Aap ne Hazrat Imaam Sha’bi Kufi aur Hazrat Imaam Hammaad se Hadeeṡ ki aur Hazrate Hammaad se Fiqh ki ta’aleem haasil ki.
In ke ilaawa Aap ne Hazrat Aamir ibn Shurahbeel, Alqaama ibn Marthad, Ziyaad ibn Ilaqa, Adi ibn Saabit, Qataada Basri, Muhammed ibn Munkadir Madani, Simaak ibn Harb, Qais ibn Muslim Kufi aur Mansoor ibn Umar se bhi ta’aleem haasil ki.

Phir 102 Hijri me Aap Madeena shareef gaye aur Hazrat Imaam Ja’afar al-Saadiq rahmatullāhi alaihi se ta’aleem haasil karna shuru kiya.

Aap mash’hoor tabi’een me se hain.
Aap ne Sahaabi e Rasool Hazrat Anas ibn Maalik radiy-Allāhu ta’ala anhu (Basra) aur dusre bahot saare ashaaba bhi Ahadeeṡ sikhi.
Jin me Abdullāh ibn Abi Aufa (Kufa), Suhail Sa’ad (Madeena) Abu Tufail Aamir ibn Waasila (Makka) radiy-Allāhu ta’ala anhuma saamil hain.

***********************
Aap ki Ibaadat, Taqwa, Husn e akhlaaq, Sakhaawat aur Imaandaari mash’hoor hai.

Aap khaamosh rehna zyada pasand farmaate aur logo se bahes o mubaahisa se bachne ki koshish karte.

***********************
Aap ki umr 9 saal thi tab ek yahudi ne majme me musalmano se 3 sawaal puchhe :
(1) ALLĀH agar hai to ALLĀH se pehle kaun tha?
(2) ALLĀH ka chehra kis taraf hai?
(3) ALLĀH ka waqt kya kar raha hai?

Majme me maujood bahot saare ulema yahudi ke sawaalo ke jawaab ke baare me sochte rahe. Tab aap khade hokar aage aaye aur yahudi se kaha ‘Main tumhare sawal ke jawaab deta hu.’
Aap ne us se kaha ‘Ginti gino.’ Yahudi bola ‘1, 2, 3, 4, 5, 6, ….., 10.’
Aap ne use rokkar kaha ‘Ab ulta gino.’ Wo bola ‘10, 9, 8,7, 6, ….., 2, 1.’
Aap ne kaha ‘Ye batao 1 se pehle kya aata hai?’ Wo bola ‘Kuchh bhi nahi.’
Aap ne farmaaya ‘Isi tarah ALLĀH se pehle koi bhi nahi.’

Phir aap ne ek chiraag liya aur us se puchha ‘Is chiraag ki roshni ka munh kis taraf hai?’ Us ne kaha ‘Chaaro taraf hai.’
Aap ne farmaaya ‘Isi tarah ALLĀH ka noor har taraf hai.’

Phir aap ne farmaaya ‘Tum jaanna chaahte ho ki ALLĀH is waqt kya kar raha hai to uska jawaab ye hai ki ALLĀH ek 9 saal ke bache se ek yahudi ko zaleel karwa raha hai.’

***********************
Aap ke waalid Kabul (Afghanistan) me kapdo ka kaarobar karte the.
Aap apne waalid ke saath us kaarobar me the.

***********************
Ek baar Aap ne Hazrat Hafs bin Abdur Rahmān ko maal e tijaarat bheja aur taaqid farmaai ke ‘Falaan kapde me kuchh nuqs hai jab tum use farokht karo to nuqs bayaan kar dena.’
Hazrat Hafs bin Abdur Rahmān ne kapda becha lekin bechte hue nuqs bataana bhool gaye aur yeh bhi yaad na raha ke kis ko becha hai. Jab aap ko pata chala to aap bahot afsos karne lage kyun ki ye mumkin na tha ke aap us mulk me jaakar un khariddaar ko un ki raqam waapas lauta sake. Aap ne foran wo sab maal ghareebo ko khairaat kar dene ka hukm kiya.

***********************
Aap tijaarat se saal bhar me jo munaafa hota us se khaane peene ki cheeze, kapde aur deegar cheeze khareed kar Mudarriseen, Ulama, Muhaddiṡeen aur Mashai’kh ki khidmat me pesh karte. Aur jo maal naqd baaqi reh jaata wo un Hazraat ki khidmat me bataure nazraana pesh karke farmaate ‘Ye sab maal ALLĀH ta’ala ka hai aur us ne apne fazl o karam se aap Hazraat ke liye ye maal mujhe ataa farmaaya hai. Jo main aap ki khidmat me pesh kar raha hu.’

Aap ki baargaah me koi shakhs haazir hota to us ke muta’alliq daryaaft karte agar woh mohtaaj hota to use kuchh ataa farmaate. Aur un se farmaate ‘ALLĀH ta’ala ki Hamd o Ṡanaa karo ki usi ne tumhe yeh ataa farmaaya.’

***********************
Aap ke saahabzaade Hazrate Hammaad ne ustaad se Surah al-Faatiha padhi to Aap ne un ke ustaad ko 1000 dirham nazraana pesh kiya. Wo kehne lage ‘Huzoor! Maine kaun sa itna bada kaarnama sar anjaam diya hai ke Aap itni zyada raqam ka nazraana de rahe hain? Aap ne farmaaya ‘Aap ne mere bete ko jo daulat inaayat ki hai us ke saamne to ye nazraana bahot haqeer hai. Bakhuda agar mere paas is se zyada hota to wo bhi pesh kar deta.’

***********************
Ek baar Aap ne dekha ki ek shakhs ne Aap ko dekhkar apna raasta badal diya. Jab use puchhne par pata chala ki us ne aap se 10000 dirham ka qarz liya tha aur abhi us ke haalat aise the ki wo use ada nahi kar sakta tha. Aap ne foran us ka qarz ma’af kar diya taake agli baar use Aap ke saamne aane par sharminda na hona pade.

***********************
Ek baar Aap mehfil me baithe the aur pata chale ki koi shakhs chhat se gir gaya hai. Aap foran waha se nikalkar us jakhmi aadami ke paas gaye aur uski khidmat ki. Aur phir jab tak wo theek ho gaya tab tak roz us ki iyaadat aur khidmat ke liye tashreef le jaate.

***********************
Ek martaba Aap janaaza padhaane tashreef le gaye. Tez dhoop hone ki wajah se logo ne Aap ko ek makaan ke saaye me khade hone ke liye arz kiya. Aap ne farmaaya ‘Is makaan ke maalik ne mujh se qarz liya hai. Agar main is ke makaan ki deewaar se kuchh nafa haasil kiya to mujhe dar hai ke kahi ye sood me shumaar na ho jaaye.’ Chunaanche Aap dhoop me hi khade rahe.

***********************
Ek baar Aap ko pata chala ke kisi ka bhed (sheep) chori ho gaya hai. Is ke baad khaane me us chori kiye gaye jaanwar ka gosht na aa jaaye is dar se aap ne 7 saal tak gosht nahi khaaya kyun ki Aap ko ma’aloom tha ki bhed ki umr 7 saal hoti hai.

***********************
Ek baar kisi ne Aap se puchha ki ‘Hazrat Alqaama radiy-Allāhu ta’ala anhu afzal hain ya Hazrat Aswad radiy-Allāhu ta’ala anhu?’
Aap ne farmaaya ‘Khuda ki qasam, Hum to is laa’iq bhi nahi ki in sahaaba ka zikr bhi karen, phir un me mawaazana (farq) kaise kar sakte hain?’

***********************
Ek shakhs Ameer-ul-Momineen Hazrat Uṡmaan Ghani radiy-Allāhu ta’ala anhu se bughz rakhta tha aur hatta ki Hazrat Uṡmaan ko (ma’az Allāh) Yahudi kehta tha.
Imaame aazam ko is baat ka pata chala to Aap ne use bulaaya aur us se farmaaya ‘Maine tumahri ladki ke liye ek munaasib rishta talaash kiya hai. Ladke me har qism ki khubi maujood hai, Sirf itni si baat hai ki wo Yahudi hai.’
Us shakhs ne jawaab diya ki ‘Bade afsos ki baat hai ki Aap itne bade Imaam hokar ek Musalman ladki ka nikaah ek yahudi ke saath jaa’iz samajhte hain. Main to hargiz is nikaah ko jaa’iz nahi samajhta.’
Aap ne farmaaya ‘Sub’hān Allāh! Magar tumahre jaa’iz na samajhne se kya hota hai, Jab ki Huzoor sallallāhu alaihi wa sallam ne apni 2 saahab-zaadiyo ka nikaah ek yahudi se kar diya tha.’
Wo shakhs foran samajh gaya ki Hazrat Imaame aazam kis baat ki hidaayat farma rahe hain. Chunaanche foran us ne Hazrat Uṡmaan Ghani radiy-Allāhu ta’ala anhu ki zaat e paak ke muta’alliq khayaal e baatil se tauba ki aur Imaame aazam ke faiz se maalamaal ho gaya.

***********************
Ek martaba ek shakhs apna kuchh maal zameen me dafn karke bhul gaya. Wo Imaame ki baargaah me haazir hua aur waqia arz kiya. Aap ne farmaya ke “Jaao, Aaj tum saari raat namaaz padhte raho, tumhe yaad aa jaayega ke tumne maal kaha dabaaya tha.”
Chunaanche wo shakhs apne ghar gaya aur raat ko us ne namaaz padhna shuru kiya. Abhi chand rak’at hi padhi thi ke use yaad aa gaya ke us ne maal kaha dabaaya hai.
Wo shakhs bada khush hua aur subah Aap ki khidmat me haazir ho kar kehne laga ke “Huzoor! Aap ki batai hui tadbeer se kaam ho gaya.’ Aap ne irshaad farmaaya ke “Mujhe ma’aloom tha ke Shaitaan tujhe raat bhar namaaz nahi padhne dega aur tujhe tera maal yaad dila dega taaki tu namaaz chhod de. Afsos ke tune maal milne ke Shukraane me raat bhar namaz kyun na padhi?’

***********************
Ek baar Aap ke shaagird ne Aap se kaha ki ‘Log kehte hain ki Imaam saahab raat bhar jaagkar ibaadat karte hain.’
Aap ne farmaaya ‘Aaj se main aisa hi kiya karunga aur puri raat jaaga karunga. Kyun ki ALLĀH ta’ala farmata hain ke Jo bande us cheez ki ta’arif ko pasand karte hain jo us me nahi hai wo hargeez azaab se na bach sakenge.’

Is ke baad Aap ne 40 saal tak Isha’ ke wuzu se Fajr ki namaaz padhi.

Qur’an shareef ki koi surah baaqi nahi thi jo Aap ne apni nafl namaaz me na padhi ho.

Aap ne jis jagah wafaat paai waha Aap ne 7000 martaba Qur’an shareef mukammal kiya tha.

Har saal Maah e Ramazaan me Aap roz ek baar din me aur ek baar raat me Qur’an shareef mukammal kiya karte aur is tarah Taraweeh me Imaamat ke dauraan 1 Qur’an milaakar Maah e Ramazaan me kul 61 baar Qur’an shareef hote the.

Aap ne 55 baar Hajje baitullāh ki sa’adat haasil ki.

***********************
Ek martaba jab Huzoor sallallāhu alaihi wa sallam ke Roza e anwar par ziyarat ke liye haazir hue aur Aap ne Salaam Arz kiyab ‘Assalaamu alaikum Ya Sayyed-ul-Mursaleen.’
To Roza e anwar se jawaab mila ‘Wa alaikum assalaam Ya Imaam-ul-Muslimeen.’

***********************
Ek martaba Aap Ka’abatullāh ke andar tashreef farma the aur keh rahe the ke ‘Aye mere Rab! Mujhe muaf farma, Main sahi tareeqe se teri ibaadat ka haq ada nahi kar paaya.’ Aap baar baar ye alfaaz dohra rahe the. Aakhir me raat ke khatm hone se pehle ghaib se aawaaz aai ke ‘Aye mere bande! Hum ne tumhe bakhsh diya aur tumhare liye khushkhabari hai ke tumhari pairwi karne waale ko bhi hum jannat ata farmaenge.’

***********************
Aap ke waalid ke intiqaal ke baad Aap apni kapdo ki dukaan par baithe the. Aap se bughz rakhne waala ek shakhs aaya aur kehne laga ‘Suna hai ke tumhare waalid ka inteqaal ho gaya hai aur tumhari maa bewa ho gai hai.’ Aap ne farmaaya ‘Ji sahi baat hai.’ Us shakhs ne kaha ‘Suna hai tumhari maa nahot khubsurat hai. Tum apni maa ka nikaah mujh se kyun nahi kara dete?’ Aap ne jawaab diya ‘Meri waalida Aaqil aur baaligh hai. Chunaanche un ka nikaah un ki marzi se hi ho sakta hai. Main un tak tumhari baat pahuncha dunga.’ Ye kehkar Aap dukaan ke baahar tashreef laaye aur ghar ki jaanib rawaana hue. Kuchh qadam hi aage badhe the ke wo shakhs chillaaya ‘Nomaan! Waapas aao.’ Aap ne moodkar pichhe dekha to wo shakhs zameen par gir gaya tha. Aap us ke qareeb aaye to dekha ke wo kutte ki tarah zabaan baahar nikaale hue zameen par pada hai aur kuchh hi lamho me wo mar gaya. Aap ne kaha ‘Nomaan ke sabr par ALLĀH ne apni qudrat se badla liya.’

***********************
Ek martaba Aap Koofa ki Jaama Masjid ke wuzu khaane me tashreef le gaye to ek nau-jawaan ko wuzu karte hue dekha. Us ke aaza se tapakte hue wuzu ke paani ke qatre dekhkar Aap ne farmaaya ‘Aye nau-jawaan! Maa-Baap ki naa farmani se taubah kar le.’ Us ne foran kaha ‘Maine tauba ki.’ Phir ek aur shakhs ke aaza se tapakte hue wuzu ke paani ke qatre dekhkar Aap ne us shakhs se farmaaya ‘Aye mere bhai! Tu badkaari se tauba kar le.’ Us ne kaha ‘Maine tauba ki.’ Phir ek aur shakhs ke aaza se tapakte hue wuzu ke paani ke qatre dekhkar us se farmaaya ‘Sharaab noshi aur gaane baaje sunne se tauba kar le.’ Us ne kaha ‘Maine tauba ki.’
Is tarah chunki is kashf ke bayees logo ke uyoob zaahir ho jaate the. Lihaaza Aap ne baargaah e Khudawandi me is kashf ke khatm ho jaane ki dua maangi aur ALLĀH ne dua qubool farmaai jis se Aap ko wuzu karne waalo ke gunaah jhadte nazar aana band ho gaya.

***********************
Aqwaal :
‾‾‾‾‾‾‾‾‾‾
Aap farmaate hain :
(1) Agar koi dunya me martaba ya shohrat ya maal o daulat haasil karne ke liye ilme deen sikhta hai to wo ilm kabhi us ke dil me nahi reh sakta.
(2) Baghair amal ke Ilm baghair rooh ke jism jaisa hai. Jo amal nahi karta wo na to mukhlis hota hai aur na qaabile pairwi hota hai.
(3) Hume jis se koi bhi baat sikhne mile wo hamara ustaad hai chaahe wo aala ho ya adna.

(4) Shaagiro ke saath aise khulos aur mohabbat se pesh aao ke koi dekhe to yeh samjhe ke us ki apni aulaad hai.

(5) Hamsaaya (padosi) ke saath ache sulook se pesh aaya karo aur unhe tang na kiya karo.

***********************
Aap Aa’imma e Araba me se hain.
Aap ka mazhab e fiqh (School of law or Islamic jurisprudence) ‘Hanafi’ naam se mash’hoor hai aur dunya me 50% se zyada musalman us ki taqleed karte hain.

***********************
Tasannif :
‾‾‾‾‾‾‾‾‾‾‾‾
Aap ne bahot saari kitaaben likhi hai.
Jin me ye mash’hoor hain :
(1) Kitaab-ul-Aasaar (70,000 Ahadeeṡ) (Imaam Muhammad al-Shaybani)
(2) Kitaab-ul-Aasaar (Imaam Abu Yousuf)
(3) Musnad Imaam-ul-Aazam
(4) Fiqh al-Akbar
(5) Kitaab ul Rad alal Qaadiriyah
(6) Aalim wal-muta’allim

***********************
Aap ke mash’hoor shaagird :
Imaam Muhammad al-Shaibani, Imaam Qaazi Abu Yousuf, Imaam Zufar ibn Huzail, Abdullāh ibn Mubarak, Abdur Razzaaq, Abu Naeem Faza, Abu Aasim, Muhammad ibn Hasan, Ismat Mugheera ibn Miqsam,Younus ibn Is’haaq, Abu Bakr ibn Ayyaash, Ali ibn Aasim, Jaafar ibn Awn, Ubaidullāh ibn Moosā.

Hazrat Fuzail bin Ayyaaz, Hazrat Ibrāheem bin Ad’ham, aur Hazrat Bishr Haafi rahmatullāhi alaihi ne bhi Aap se faiz haasil kiya.

*******************
Aap ka 2 saahabzaade hain :
(1) Hammaad (2) Abdus Salaam.

*******************
Aakhri Umayya Khalifa Marwaan ibn Muhammad ke zamaane me Iraq ke Governor Yazeed ibne Amr ne aap ko Qaazi ke ohade ke liye kaha. Aap apna waqt khidmate deen me guzaarna chaahte the aur dunya ke muamalaat me phansna nahi chaahte the. Is liye Aap ne inkaar kiya to us ne Aap ko bahot aziyat di. Aap waha se Makka chale gaye.

Phir 150 Hijri (767 A.D.) me, Abbaasi Khalifa Abu Jafar Mansoor ne Aap ko Qaazi ke ohade ke liye kaha. Inkaar karne par us ne Aap ko qaid me daal diya aur bahot aziyat di aur aakhir me zeher dekar Aap ko shaheed kar diya.

Jab Aap ne mehsoos kiya ki zeher diya gaya hai to foran Aap ne wuzu kiya aur Namaaz e Shukr ada karne lage. Haalat e namaaz me hi Aap ka wisaal hua.

***********************
Aap ka wisaal 2 Sha’abaan 150 Hijri (767 A.D.) ko 70 saal ki umr me hua.

Aap ke janaaza me 50000 se zyada log saamil hue aur 6 baar namaaz e janaaza padhai gai.

Aap ka mazaar Baghdad (Iraq) me hai.

***********************
ALLĀH ta’ala us ke Habeeb sallallahu alaihi wa sallam ke sadqe me
Aur Hazrat Imaam e aazam Abu Haneefa Nomaan bin Ṡaabit rahmatullāhi alaihi aur Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

The Fikreummat Foundation

ILM me barkat ke liye aur Imtihaan me kaamyaabi ke liye Duaen :

(1) Har farz namaaz ke baad
Aankho par haath rakhkar 11 martaba ‘Ya Nooru Ya Rahmānu’ padhen ke is se in shaa Allāh aankho ki roshni achhi rehti hai.
Aur phir paishaani par haath rakhkar 11 martaba ‘Ya Qawiyyu Ya Hafeezu’ padhen ke is se in shaa Allāh yaaddaasht tez hoti hai.

(2) Duaen :
‾‾‾‾‾‾‾‾‾‾‾‾‾
[1] رَبِّ زدْنيِ عِلْماً
Rabbi zidnee ilmaa.

Tarjuma :
Aye Mere Rab! Mere ilm me ijaafa ata farma.

Translation :
O My Lord! Advance me in knowledge.

[2] اَللَّهُمَّ إِنِّي أَسْأَلُكَ عِلْمًا نَافِعًا
Allāhumma inni as’aluk Ilman naafi’an.

Tarjuma :

Aye ALLĀH! Main sawaal karta hu nafa bakhsh ilm ka.

Translation :
O ALLĀH! I ask You for knowledge that is of benefit.

[3] يَا عَلِيمُ عَلِّمْنِى
Ya Aleemu Alimnee.

Tarjuma :
Aye har cheez ka ilm rakhne waale! Mujhe ilm ata farma.

Translation :
O All-Knowing! Grant me knowledge.

[4] اللَّهُمَّ انْفَعَنِىْ بِمَا عَلَّمْتَنِىْ وَ عَلِّمْنِىْ مَا يَنْفَعَنِىْ
Allāhumma infa’anee bimaa allamtanee wa alimnee maa yanfa-unee.

Tarjuma :
Aye ALLĀH! Tune mujhe jo ilm diya hai use mere liye nafa dene waala bana aur mujhe wo ilm ata farma jo mere liye nafa bakhsh ho.

Translation :
O ALLĀH! Make useful for me what you has taught me & teach me knowledge that will be useful for me.

[5] اللَّهُمَّ لَا سَهْلَ إِلَّا مَا جَعَلْتَهُ سَهْلًا وَأَنْتَ تَجْعَلُ الْحَزْنَ إِذَا شِئْتَ سَهْلًا.

Allāhumma laa sahla illa maa ja’altahu sahla, wa anta taj’alul hazna izaa shi’anta sahla.

Tarjuma :
Aye ALLĀH! Kuchh aasaan nahi siwa e us ke jise tu aasaan farma de aur tu mushkil ko aasaan farma deta hai agar teri marzi ho.

Translation :
O ALLĀH! There is nothing easy except what You make easy, and You make the difficult easy if it be your will.

[6] اللَّهُمَّ إِنِّي أَسْتَوْدِعُكَ مَا قَرأتُ وَمَا حَفَظْتُ، فَرُضُهُ عَليّ عِنْدَ حَاجَتِي إِلَي
Allāhumma inni astaudiuka maa qara-atu wa maa hafaztu, Faradduhu alayya inda haajatee ilayhi.

Tarjuma :
Aye ALLĀH! Main amaanat ke taur par tere hawaale karta hu jo kuchh maine padha hai aur yaad kiya hai, Mujhe wo waapas karna jab mujhe is ki zaroorat ho.

Translation :
O ALLĀH! I entrust You with what I have read and I have studied. Bring it back to me when I am in need of it.

[7] صَلّىَ اللهُ عَلى مُحَمّدٍ وَآلِ مُحَمّد. اللَّهُمَّ إِنِّي أَسْألُكَ يَا مُذَكِرَ الخَيْرِ وَفَاعِلَهُ وَالآمِرَ بِهِ ذَكِرّنِي مَا اَنّسَانِهِ الشّيطَان
SallAllāhu ala Muhammad wa aali Muhammad. Allāhumma inni as’aluka ya Muzakkiral khair wa faa-ilahu wal-aamira bihi zakirni ma ansaaneehshi shaitaan.

Translation :
Blessings of ALLĀH be upon Muhammad and his progeny.
O ALLĀH! I ask You, The One who mentions goodness and actualizes it and commands it, Remind me of that which the shaitaan makes me forget.

[7] Imtihaan ya interview ke 21 din pehle se rozaana namaaz e Isha ke baad 300 baar ‘Al Malikul Quddoos’ Dua karen.

(3) Jab bhi faarigh ho to kasrat se Durood shareef padhte rahen.

******************
Imtihaan ke liye jaane se pehle :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

(1) 2 rak’at nafl namaaz ‘Salaat-ul-Haajat’ ki niyyat se padhen aur Dua karen.

(2) Ye dua 7 martaba padh len :
فَإِنَّ حَسْبَكَ الله ، هُوَ الَّذِيْ أَيَّدَكَ بِنَصْرِه وَ بِالْمُءْمِنِيْنَ
Fa-inna hasbukallāh, Huwallazee ayyadaka bi-nasrihi wa bil-mu’amineen.
(8 Surah al-Anfaal , Aayat 62)

Tarjuma :
Beshak mere liye ALLĀH kaafi hai, Wohi hai jis ne mujhe apni madad ke zariye aur mo’mino ke zariye taaqat bakhshi.

Awwal aakhir 11 Durood shareef bhi padhen.

(3) اللھم افتح علینا حکمتک وانشرعلینا رحمتک یا ذا الجلال والاکرام
Allāhumma-fat’h alayna hikmataka wanshur alayna rahmataka ya zal-jalaali wal ikraam.

(4) سُبْحَانَكَ لَا عِلْمَ لَنَا إِلَّا مَا عَلَّمْتَنَا ۖ إِنَّكَ أَنْتَ الْعَلِيمُ الْحَكِيمُ
Sub’hānaka laa ilma lana illa maa allamtana, Innaka antal aleemul hakeem.
(2 Surah al-Baqarah, Aayat 32)

Tarjuma :
(Aye ALLĀH!) Teri zaat paak hai Hume kuchh ilm nahi magar is qadar jo tune hume sikhaaya hai, Beshak tu hi sab jaanne waala hikmat waala hai.

Translation :
(O ALLĀH!) Glory to You, You are Holy We have no knowledge except that which You have taught us, Surely, You alone are All-Knowing, All-Wise.

******************
Imtihaan ke dauraan :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Jab Imtihaan me likhna shuru karen to pehle ‘Bismillāhir Rahmānir Raheem’ padhkar sab se upar Shahaadat ki ungli se ye Dua likh len :
رَبَّهُ أَنِّي مَغْلُوبٌ فَانْتَصِ
Rabbahū innee maghloobun fantasir.
(54 Surah al-Qamar, Aayat 10)

(2) Phir Awwal aakhir 3-3 martaba Durood shareef ke saath ye Dua 11 martaba padhen :
ربي يسر ولا تعسر ,ربي تمم بالخير
Rabbi yassir wa laa tu’assir wa tammeem bil khair.

(3) Paper likhne ke dauraan kuchh bhool jaayen to Durood e paak padhen. In shaa ALLĀH yaad aa jaayega.

**********************
ALLĀH ta’ala us ke Habeeb sallallāhu alaihi wa sallam ke sadqe me
Sab ko Imtihaan me kaamyaabi aur tarakki ata farmae.
Aur Sab ki nek jaa’iz muraado ko puri farmae.
Aur Islaam ka bolbala farmae.
Aameen.

****************
For more posts Visit :

The Fikreummat Foundation

Hazrat Shaikh Shams-ud-deen Mohammad Tabrizi rahmatullāhi alaihi :

Laqab :
‾‾‾‾‾‾‾‾
Shams-e-Tabriz.

**************
Aap ki wilaadat 580 Hijri (1185 A.D.) me Tabriz (Iran) me hui.

Aap ke waalid ka naam Ali bin Malik-e-Daad hai.

***************
Aap ne bachpan me Hazrat Shaikh Abu Bakr Sallebaf rahmatullāhi alaihi se ta’aleem haasil ki.

Is ke baad Aap ne Shaafi mazhab ki Fiq’h ki Hazrat Abu Is’hāq al-Shirazi rahmatullāhi alaihi ki kitaab ‘al-Tanbih fil fiqh al-Shafi’i’ ki taaleem haasil ki.

Aap ne Fiq’h, Kalaam, Ilm e Istadalaal (Mantiq), Falsafa, aur Tasawwuf ki ta’aleem haasil ki.

***************
Aap Baghdad, Damishq (Damascus), Halab (Aleppo), Kayseri, Aksaray, Sivas, Erzurum aur Erzincan ka safar karte rahe.

Aap apne saath sirf ek chattai rakhte. Aap jab kisi jagah wuqoof karte to kisi khaanqaah me theharne ke bajay saraay me theharte aur khud ko ek musaafir batate. Aur tokriya banakar ya kamar-band banakar use bechkar apna guzraan kar lete.
Aur akṡar waqt sufiya e kiraam aur ulama ki mehfilo me guzaarte aur tanhai me ibaadat aur riyaazat me guzaarte.

***************
642 Hijri (November 1244 A.D.) me Aap Konya pahunche.
Ek baar Maulana Jalaal-ud-deen Rumi rahmatullāhi alaihi bahot saari kitaaben saath rakhkar padh rahe the. Itne me Hazrat Shams Tabrizi waha se guzre. Aap ne puchha ‘Kya kar rahe ho?’ Aap ka saada libaas dekhkar Maulana Rumi ne kaha ‘Aap nahi samajh sakenge.’ Aap ne un kitaabo ko lekar qareeb me ek jhil ke andar phenk diya. Maulana Rumi ne jab un kitaabo ko paani se baahar nikala to wo sab bilkul sookhi thi. Unho ne puchha ‘Hazrat, ye kaise hua?’ Aap ne farmaya ‘Ye tum nahi samajh sakoge.’

Ye dekhkar Maulana Rumi samajh gaye ke Hazrat Shams Tabrizi ek wali e kaamil hain. Unho ne din wa raat saara waqt un ki sohbat me guzaarna shuru kar diya. Aur apni Mudarris ki aur apne pariwar ki zimmedaari bhi bhul gaye. Jab aap ko pata chala ke Maulana Rumi ke shaagird is baat ki wajah se naraaz ho gaye hain tab Shawwaal 643 Hijri (March 1246 A.D.) me baghair kisi ko bataaye Konya se rawaana ho gaye.
Aap ke achaanak chale jaane se kuchh waqt tak Maulana Rumi ghamzada ho gaye.
Unho ne Hazrat Shams Tabrizi ko waapas aane ke liye bahot saare paighaam bheje. Aakhir me jab apne saahbzade Sultaan Walad ko bheja tab Aap Konya waapas aaye. Aap ke waapas aane se Maulana Rumi bahot khush hue aur un ki sohbat me rehkar faiz haasil karne lage.

Kuch arsa Maulana Rumi ke saath Konya me guzaarne ke baad Aap waha se Khoy aa gaye.

***************
Tasannif :
‾‾‾‾‾‾‾‾‾‾‾‾
Aap ne ‘Maqaalat’ (Discourses) naam ki ek kitaab likhi hai.

***************
Aqwaal :
‾‾‾‾‾‾‾‾‾‾
Aap irshaad farmaate hain :
(1) Khush-mijaazi us saaf paani ki tarah hai jis se paid-paudhe khilte hai aur sabz wa taaza rehte hai aur Gham-geeni us kichad ki tarah hai jis se khile hue paid-paudhe murza jaate hain.
(2) Achha insaan fariyaad karne me aur dusro ke aib dekhne me waqt zaaya nahi karta.
(3) Jaisa tum kahoge achha ya bura, waisa hi tumhare saamne aayega. Is liye agar koi tumhare baare me bura sochta hai aur agar tum bhi us ke baare me bura kahoge to is se sirf baat bigdegi aur tum us daayre me phanse hue rahoge.

***************
Aap Hazrat Baaba Kamaal-ud-deen Jundi rahmatullāhi alaihi ke mureed hain.
Aur ‘Suharwardi Kubrawiya’ silsila ke shaikh hain.

Aap ke Khalifa Hazrat Maulana Jalaal-ud-deen Rumi rahmatullāhi alaihi hain.

***************
Aap ka wisaal 8 Rajab 646 Hijri (1248 A.D.) ko hua.

Aap ka mazaar Khoy (Iran) me hai.

***************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Shams Tabrizi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

The Fikreummat Foundation

Hazrate Sayyeda Faatima Zahra radiy-Allāhu ta’ala anha :

Alqaab :
¯¯¯¯¯¯¯¯¯
Khaatoon-e-Jannat, Khair-un-nisaa, Sayyedat-un-nisaa, Umm-ul-Saadaat, Tayyeba, Taahira, Zahra, Batul, Raadiyah.

*************** *****
Aap ki wilaadat 20 Jamaadi uṡ ṡaani, Elaan e Nabuwwat ke 4 baras pehle 605 A.D. me Makka me hui.

Aap ke waalid Hazrat Mohammad Mustafa Rasool-Allāh sallallāhu alaihi wa sallam aur waalida Hazrate Khadeejatul Kubra binte Khuwaylid radiy-Allāhu ta’ala anha hain.

Hazrate Khadeejatul Kubra radiy-Allāhu ta’ala anha farmaati hain ke “Jab Faatima mere shikam me thi, qasam Khuda ki meri saanso se khushboo aati aur mere shikam se ALLĀH ta’ala ke zikr ki aawaaze aati.”

10 Ramazaan 10 Nabawi (619 A.D.) ko jab Aap ki umr 14 saal ki thi tab Aap ki waalida Hazrate Khadeejatul Kubra radiy-Allāhu ta’ala anha ka wisaal hua.

*************** *****
Aap ka nikaah Hazrate Ali al-Murtaza radiy-Allāhu ta’ala anhu ke saath 1 Zil Hijjah 2 Hijri (623 A.D.) ko hua.

Jab Huzoor Sarwar e kaa’inat Rasool-Allāh sallallāhu alaihi wa sallam ne Hazrate Faatima radiy-Allāhu ta’ala anha se farmaaya ke ‘Aye beti Faatima! ALLĀH ta’ala ke hukm se tumhara aqd (nikaah) Hazrate Ali se 200 miskaal chaandi mehar ke saath tay kiya hai, tumhe manzoor hai?’ Sayyeda Faatima ne farmaaya ke ‘Ali manzoor hai, magar ye mehar manzoor nahi. Tab Hazrate Jibr’eel alaihis salaam ne aakar kaha ke ‘Ya Rasool-Allāh sallallāhu alaihi wa sallam! Faatima se farma dijiye ke ALLĀH unke mehar me saari jannat de raha hai.’ Sayyeda Faatima ne ye sunkar kaha ke ‘Ye mehar bhi mujhe manzoor nahi hai.’ Huzoor sallallāhu alaihi wa sallam ne farmaaya ke ‘Aye beti Faatima! To phir tumhari kya marzi hai?’ Hazrate Faatima radiy-Allāhu ta’ala anha ne farmaaya ke ‘Mujhe mehar me ummate Mustafa ki maghfirat chaahiye.’ Itne me Hazrate Jibr’eel alaihis salaam ne phir se aakar ek jannati kaagaz ka tukda diya aur farmaaya ke ‘ALLĀH ta’ala ne Faatima ke mehar me ummate Mustafa ki maghfirat ata kar di hai.’
Jab Hazrate Faatima ne ye suna to nikaah ke liye raazi hue.

Huzoore akram sallallāhu alaihi wa sallam ke farmaan par Hazrat Ali radiy-Allāhu ta’ala anhu ne jung e Badr me jo girah mili thi use 480 dirham me bechkar us me se aadhi raqam se mehar ada kiya.
Aur baaqi raqam se Huzoore akram sallallāhu alaihi wa sallam ne kuchh saamaan khareeda aur Aap ko bidai ke waqt ek lihaaf, ek chamde ka gadda jis ke andar khajoor ke patte bhare hue the, ek rangi hui khaal, do chakkiya, ek mashk, do mitti ke ghade, ek piyaala aur ek tasbeeh diye aur Is tarah ye paighaam diya ke Aurat ALLĀH ta’ala ki Ibaadat kare aur Apne shohar aur us ke ghar waalo ki khidmat kare aur apni aulaad ko sahi tarbiyat wa ta’aleem de to wo Jannati hai.

************
Aap ke 2 bete aur 2 betiya hain :
Saahabzaade – Hazrat Hasan aur Husain radiy-Allāhu ta’ala anhuma,
Saahabzaadiya – Hazrat Zainab Aur Umme Kulsum radiy-AllĀhu ta’ala anhuma.

Aap ki aulaad aur nasl ‘Aale Rasool’ aur ‘Saadaat’ kehlaate hain.

*************** *****
Ek bar kuchh yahudi aurto ne Huzoore akram sallallāhu alaihi wa sallam ke paas aakar kaha ke ‘Hum aap ki beti Faatima ko humare yaha shaadi me aane ke liye dawat dene aaye hain.’ Aap sallallāhu alaihi wa sallam ne kaha ‘Theek hai, Faatima aap ke yaha zaroor aaegi.’
Jab Faatima ne ye baat suni to aankho me aansu aa gaye. Pyaare Aaqa sallallāhu alaihi wa sallam ne puchha to bataaya ke ‘Mere paas achhe kapde nahi hai jise pehankar main un yahudiyo ke yaha jaau. Agar mere puraane kapde pehankar jaaugi to wo sab ye kehkar mazzaaq udayenge ke musalmano ke nabi ki beti ke paas achhe kapde bhi nahi. Main aap ki tauhin bardaasht nahi kar sakti.’
Itne me Hazrate Jibr’eel alaihis salaam jannti libaas ka ek joda lekar aaye aur farmaya ‘Ya rasool-Allāh sallallāhu alaihi wa sallam! Ye kapde Faatima ko de dijiye aur ise pehankar wo un yahudiyo ke yaha daawat me jaaye.’
Jab Sayyeda Faatima radiy-Allahu ta’la anha wo kapde pehankar yahudiyo ke yaha pahunchi to un aurto ne us noorani kapdo ko dekhkar hairaan hokar puchha ke ‘Aye Faatima ye kapde tumhe kisne diye?’ Sayyeda Faatima ne farmaaya ki ‘Mere baaba jaan Rasool-Allāh sallallāhu alaihi wa sallam ne.’ Un aurto ne puchha ‘Unhe kis ne diye?’ To Faatima ne farmaaya ‘ALLĀH ta’ala ke hukm se Jibr’eel alaihis salaam ne jannat se laakar diye.’
Ye sunkar wo sab aurte foran kalma padhkar musalman ho gai.

*************** *****
Huzoore akram sallallāhu alaihi wa sallam apni beti Faatima ke sar ko sungha karte the.
Ashaaba ne puchha ki ‘Ya Rasool-Allāh sallallāhu alaihi wa sallam chumne ki baat to samajh me aati hai, ye sunghne ki kya wajah hai?’ tab aap ne farmaaya ‘Mujhe Faatima me se jannat ki khushboo aati hai.’

Huzoor sallallāhu alaihi wa sallam ne farmaaya ‘Mujhe apne Ahle Bait me se sab se pyaari Faatima hai.’

*************** *****
Aap ke baare me Huzoor sallallāhu alaihi wa sallam ne farmaaya hai :

(1) Meri beti Faatima insaani hoor hai. ALLĀH ta’ala ne use haiz o nifaas se paak rakha hai.
(2) Faatima mere jigar ka tukda hai. Jis ne use naraaz kiya us ne mujhe na-raaz kiya.
(3) Jannat me daakhil hone waali aurto me sab se pehle meri beti Faatima hogi.
Qayaamat ke din ghaib se ek nida (aawaaz) aayegi ki ‘Aye hashr ke maidaan me jama hone waalo apni nigaahen jhuka lo yaha tak ke Faatima binte Muhammad sallallāhu alaihi wa sallam guzar jaayen. Aur Aap 70,000 hooro ke saath bijli ki tarah guzar jaayengi.
(4) ALLĀH ne Faatima Zahra aur us ki aulaad par Jahannam ko haraam farma diya hai.

************
Aqwaal :
¯¯¯¯¯¯¯¯¯
(1) Apni betiyo ko bachpan se hi parda karna sikhao.
Jis tarah Moti ke liye sadaf aur Jawahiraat ke liye sandooq zaroori hai usi tarah Aurat ke liye parda zaroori hai.
Aurat me sab se bentar woh hai jo na kisi ghair-meharam ko dekhe aur na koi ghair-mehram us ko dekhne paaye.

(2) Jab aurat ghar ka kaam aur bacho ki tarbiyat kar rahi ho,
Us waqt wo ALLĀH ta’ala ke sab se zyada qareeb hoti hai.

******************
Ek martaba Huzoor sallallāhu alaihi wa sallam ne Sahaaba-e-kiraam se farmaaya ‘Bataao! Aurat ke liye kaun si cheez behtar hai?’ Tamaami ashaaba khaamosh rahe, kisi ne koi jawaab na diya.
Hazrate Ali radiy-Allāhu anhu foran ghar gaye aur Shehzaadi e Rasool Sayyeda Faatima Zahra radiy-Allāhu anha se kaha ke ‘Aaj ALLĀH ke Habeeb sallallāhu alaihi wa sallam ne ye sawaal kiya hai. Aap bata’iye ke kya jawaab du?’
Sayyeda Faatima Zahra radiy-Allāhu anha ne farmaaya ‘Na Aurat ajnabi mard ko dekhe, Na ajnabi mard use dekhe.’
Hazrate Ali radiy-Allāhu anhu farmaete hain ke ‘Maine jab jaakar ye Huzoor sallallāhu alaihi wa sallam ko pesh kiya to Aap sallallāhu alaihi wa sallam ne farmaya ke :- Faatima mere jigar ka tukda hai.’

********************
Ek martaba Hazrate Ali radiy-Allāhu anhu ne dekha ki Ghar ka kaam karte karte Sayyeda Faatima ke haatho me chhale pad gaye hain. Unho ne farmaaya “Aap Huzoor sallallāhu alaihi wa sallam ki khidmat me jaao aur un se baat karo. Agar Huzoor sallallāhu alaihi wa sallam jo kaneeze aai hain un me se ek ata kar de to wo tumhare kaam me madad karegi.” Aap Huzoor sallallāhu alaihi wa sallam ki khidmat me tashreef le gai magar Huzoor sallallāhu alaihi wa sallam se kuchh kehne ki himmat na hui. Kuchh der baithkar Aap waapas aa gai. Hazrat Ali samajh gaye. Phir wo khud Huzoor sallallāhu alaihi wa sallam ki khidmat me hair hue. Huzoor sallallāhu alaihi wa sallam ne daryaaft kiya “Ali! Kuchh der pehle Faatima aai thi. Kuchh der baithkar chali gai. Kya kuchh kaam tha?” Hazrat Ali ne arz kiya “Ya Rasool-Allāh sallallāhu alaihi wa sallam! Faatima tanha ghar ka saara kaam kaaj karti hain. Is liye thak jaati hain. Agar Aap ek londi ataa kar den to woh us ke kaam me madad kar degi.” Huzoor sallallāhu alaihi wa sallam ne farmaaya “Ali! Main tumhe is se behtar raasta bataata hu. Faatima se kehna ki har farz namaaz ke baad 33 martaba Sub’hān Allāh, 33 mataba Alhamdulillāh aur 34 martaba Allāhu akbar padhkar badan par dam kar le. Is se us ki saari thakaan door ho jaayegi.”

*************** *****
Ek baar Huzoor Nabi e kareem sallallāhu alaihi wa sallam beemaar huwe to Sayyeda Faatima radiy-Allāhu ta’ala anha tashreef laai. Aap sallallāhu alaihi wa sallam ne dekha to farmaaya “Marhaba Aye meri beti!” Aur mohabbat se apne pass bithakar aahista aahista un se kuchh baaten ki, jis se Aap rone lagi. Huzoor sallallahu alaihi wa sallam ne un ke malaal ko dekha to phir aahista aahista kuchh baaten ki, jis se wo muskuraane lagi.
Ummul mo’mineen Hazrate Aa’isha Siddeeqa radiy-Allāhu ta’ala anha ne Sayyeda Faatima se puchha ki “Nabi e kareem sallallāhu alaihi wa sallam ne aap se kya guftgu farmai hi jis se pehle aap rone lagi aur phir muskurane lagi?’ To aap ne farmaaya ‘Main Huzoor sallallāhu alaihi wa sallam ke raaz ko zaahir nahi karna chaahti.”

Huzoor sallallāhu alaihi wa sallam ka wisaal ke baad Hazrate Aa’isha Siddeeqa radiy-Allāhu ta’ala anha ne Sayyeda Faatima se kaha “Main tumhe qasam deti hu aur is haq ka waasta deti hu jo mera tum par hai ab mujhe us raaz se aagah karo.” To Aap ne farmaaya “Ab is raaz ko zaahir karne me koi harz nahi hai. Baat ye hai ki mujhe pehli martaba Huzoor Rasool-Allāh sallallahu alaihi wa sallam ne farmaaya tha ki ‘Aye Faatima! Meri wafaat ka waqt qareeb aa gaya hai aur main tujh se juda hone waala hu, Pus tum ALLĀH se darti rehna aur sabr karti rehna.’ Ye sunkar main rone lagi thi aur jab Huzoor sallallāhu alaihi wa sallam ne mujh ko zyada ghamgeen dekha to mujh se farmaaya ki ‘Kya tum is par raazi nahi ki tum saare jahaan ki aur jannat ki aurton ki sardaar bano? Aur mere ahle bait me sab se pehe tum hi mujh se milogi.’ Ye sunkar main khush ho gai aur muskuraane lagi.”

Huzoor sallallāhu alaihi wa sallam ke wisaal ke 6 mahine baad Sayyeda Bibi Faatima ka intiqaal hua.

*************** *****
Aap ke wisaal ke din jab Hazrate Ali radiy-Allāhu ta’ala anhu ghar me tashreef laaye to dekha ke Hazrate Faatima kaam me masroof hain.
Aap ne puchha ke “Aye Faatima! Kya wajah hai ke aaj kuchh zyada masroof lagti hain?”
Aap ne farmaaya ke “Aap logo se rukhsat hone ka waqt qareeb hai. Is liye main Aap ke kapde dhokar rakh dena chaahti hu aur Aap sab ke liye khaana banaakar rakh dena chaahti hu taaki mere jaane ke baad aap ko pareshaani na ho.”
Ye sunkar Hazrate Ali ki aankho me aansoo aa gaye to Aap ne farmaaya ke “Aap ko har haal me sabr karna hai aur hamare bacho ka khayaal rakhna hai.”

Phir Aap ne Hazrate Ali se kuchh wasiyaten ki, jin me se ek ye thi ke “Mere janaaze ko raat ke waqt andhere me nikaala jaaye aur ghar ke log hi us me saamil de. Jis se Faatima ka parda rahe.”
Aur us kaagaz ko qabr me rakhne ke liye farmaaya jis me ALLĀH ta’ala ne Aap ke mehar me ummate Mustafa ki maghfirat likhkar bheja thi.

********************
Aap ka wisaal 3 Ramazaan 11 Hijri (632 A.D.) ko hua.

Aap ka mazaar Jannatul Baqi, Madeena munawwara me hai.

********************
Ye hai Hazrate Faatima radiy-Allāhu ta’ala ka martaba.
Aap ke Waalid Sarwar e kaa’inat, Khair ul Bashar, aur Ashraf ul Ambiya hain.
Aap ke Shohar Sher e khuda, Maula e kaa’inat aur Faatih e wilaayat hain.
Aap ke Saahabzaade Jannati jawaano ke sardaar hain.

Aap Sayyedat-un-nisa (Jannati aurto ki sardaar) aur Khair-un-nisa (Tamaam aurto me behtar) hain.

Jab maa ka martaba itna buland ho aur wo neki wa parhezgaari aur sabr me bemiṡaal ho to Bete bhi Shaheed e Abraar aur Shaheed e Moazzam hote hain aur Beti bhi Siddeeqa-e-Sughra hoti hain aur neki wa parhezgari aur sabr me bemiṡaal hote hai.

*************** *****
ALLĀH ta’ala us ke Habeeb sallallāhu alaihi wa sallam ke sadqe me
Aur Sayyeda Faatima Zahra radiy-Allāhu ta’ala anha aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

The Fikreummat Foundation

Eid-e-Meelaad-un-Nabi sallallāhu alaihi wa sallam ka bayaan :

Nisaar teri chahel pahel par hazaaro eiden Rabi ul awwal,
Siwa e Iblees ke sabhi to khushiyan mana rahe hain.

******************
Iblees 4 martaba sab se zyada roya hai :

(1) Jab us par la’anat bheji gai.
(2) Jab use (aasmaan se nikalkar) zameen par bheja gaya.
(3) Jab Huzoor Rasool-Allāh Sarwar e Kaunain sallallāhu alaihi wa sallam ki wilaadat (be’asat) hui.
(4) Jab Surah al-Faatiha naazil hui.

(Al-Bidaayah wal Nihaayah, Jild -2, Safa -166)

************
Qur’an :
93 Surah ad-Duha, Aayat 11 :

Aur apne Rab ki ne’amato ka khoob tazkeera karo.

Qur’an :
3 Surah Aale Imraan, Aayat 164 :

Beshak ALLĀH ne musalmano par bada ehsaan farmaaya ke un me unhi me se (azmat waala) Rasool bheja jo un par us ki aayate padhta aur unhe paak karta hai aur unhe kitaab wa hikmat ki ta’aleem deta hai agarche wo log us se pehle khuli gumraahi me the.

Hadeeṡe Qudsi :
Laulak lama khalaqtul ardi wal aflak.

ALLĀH ta’ala farmaata hai :
Aye mehboob agar tujhe paida karna maqsood na hota to main zameen aur aasmaano ko paida na karta.

(Firdaus-ul-akhbaar, Jild -2, Safa -45, Hadeeṡ -8095)

**********************
ALLĀH ta’ala ki tamaam ne’amato me behtareen ne’amat us ke Habeeb sallallāhu alaihi wa sallam hain.
Aap Rab ta’ala ki Ne’amat e kubra aur ehsaan e azeem hain.

Hamare Nabi sallallāhu alaihi wa sallam ka martaba itna aa’la aur afzal hai ke ALLĀH ta’ala ne sab se pehle Noor e Mustafa ko banaaya aur puri kaa’inat ko un ke liye hi banaaya.
ALLĀH ta’ala ne Huzoor Mohammad Mustafa sallallāhu alaihi wa sallam ko sab se pehle banaaya aur dunya me tamam ambiya ke baad Khaatim-ul-Ambiya banaakar bheja. Is tarah Aap sallallāhu alaihi wa sallam takhleeq me sab se Awwal aur Be’asat (Zahoor) me sab (ambiya) se Aakhir hain.

ALLĀH ta’ala ne aap ke waseele se sab ko Hidaayat ata farmai, Aap ne ilm o hikmat se jahaalat ka andhera door kiya, Aap ne aadami ko insaan banaaya, Aap ne deen e Islaam dekar zindagi jine ka sahi aur khubsurat tareeqa sikhaya, Aap ne ibaadat ka aur Rab ko raazi karne ka tareeqa sikhaaya, Aap ne dunya aur aakhirat me bhalaai aur kaamyaabi ka raasta sikhaaya.

Aur beshak hum khushnaseeb hain ke hame ALLĀH ne us ke Habeeb sallallāhu alaihi wa sallam ka ummati banaaya jis ne har haal me Wilaadat par, Makka me, Madeena me, Me’araaj me, Gaar me, Hajj me, Umrah me hum gunaahgaar ummatiyo ko yaad kiya aur har zulm sehkar hamare liye khuda se dua ki ‘Rabbi habli ummati’.

Aap ke sadqe me ALLĀH ta’ala hamari duao ko qubool karta hai aur hume sab ne’amaten ata karta hai.

Aap roze mehshar me ummatiyo ki shafa’at karke jahannam ki aag aur azaab se bachaayenge.

Is liye Huzoor Rasool-Allāh sallallāhu alaihi wa sallam ke ehsaano ko yaad karke Yaum e Meelaad-un-Nabi ke mauqe par khushiya manaani chaahiye.

Yun to pura saal hame Sarware Kaunain Pyare Aaqa sallallāhu alaihi wa sallam ke ehsaano ko yaad karna chaahiye aur Aap ki wilaadat aur Hayaat e tayyabah ka aur aap ke kamaalat aur moazeezaat ka zikr karte rehna chaahiye. Magar Yaum e Milaad-un-Nabi ke mubarak mauqe par ALLĀH ki is azeem ne’amat ka khaas kasrat se zikr karna chaahiye.

***************
Eid-e-Meelaad-un-Nabi sallallāhu alaihi wa sallam manaana jaa’iz hai aur baa’iṡ e rahmat aur barkat hai :

Eid-e-Meelaad-un-Nabi sallallāhu alaihi wa sallam manaana jaa’iz hai aur baa’iṡ e rahmat aur barkat hai :

Aashiqaane Mustafa se guzarish hai ki
Is link ko open karke Post padhen aur Share karen.

************
Eid-e-Meelaad-un-Nabi sallallāhu alaihi wa sallam manaane ka sahi tareeqa :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Qur’an :
2 Surah al-Baqarah, Aayat 208 :

Aye Eimaan waalo, Islaam me pure daakhil ho jaao.

Aashiqaan e Rasool ko chaahiye ke Eid-e-Meelaad-un-Nabi ko Islaami tareeqe se manaaye aur aise amal karen jis se Islaam aur Musalmano ko aur izzat mile.

Eid-e-Meelaad-un-Nabi ko Subah Saadiq ke waqt khaas Salaat o Salaam pesh karen aur Dua e khair karen.
Fajr ki namaaz ada karne ke baad bhi Dua e khair karen.

Ghusl karen, Miswaak karen, Khushbu lagaayen, Surma lagayen, Achhe kapde pehnen.
Achha khaana khaas kar meetha pakakar khud bhi khaayen aur azeezo, rishtedaaro aur padosiyo ko hadiya bhejen aur ghareebo ko bhi den.

Mehfil e Meelaad me aur Juloos me ikhlaas, adab o ehtaraam aur khushi ke saath saamil ho aur Raza e ilāhi aur Izhaar e ishq e Rasool ki nek niyyat rakhen.
Hattal imkaan Ba-wuzu rahen.
Har fuzool baat aur amal se bachen.
Juloos me Zikr e Ilāhi aur Hamd e Baari ta’ala, Naate Rasool aur Manqabat padhte rahen.
Kaṡrat se Durood o Salaam padhte rahen.
Tilaawat e Qur’an karen.
Kaṡrat se Astaghfaar karen.

Nafl Namaaz padhen.
Jin ki namaazen Qaza ho gai hain wo pehle jitni mumkin ho utni Qaza namaaz padhen taake bariuz zimma ho jaayen.
Nafl namaaz ka pura ṡawaab usi ko milta hai jo Farz namaaz waqt par ada karta hai aur pehle un namaazo ki qaza padh leta hai jo chhut gai hai.

5 waqt ki Qaza namaaz me Rak’at ki ta’adaad :
Fajr 2, Zohar 4, Asr 4, Maghrib 3, Isha 4, Witr 3.

Husne akhlaaq ka bentareen muzaahira karen taake Islaam aur musalmano ki shaan buland ho.

Sadqa- Khairaat zyada karen.
Ghareebo, Mohtaajo ki imdaad karen.
Beemaar aur kamzor ki khidmat karen.
Saadaat ki khidmat karen.
Taalibaan e ilm ko madad karen.
Buzurgo ko isaal e ṡawaab karte rahen.

Apne gharo aur mohallo ko khub sajaayen aur Roshni karen.
Magar aam raasto par ya choraaho par is tarah sajaawat na karen ki waha se guzarne walo ko takleef ho.

Najam ki CD/DVD bajaate waqt ye khayaal rakhen ki itni buland aawaaz na ho ki is ki wajah se mareezo, jaeefo, buzurgo aur chhote bacho ko takleef ho aur Azaan aur Namaaz ke awqaat ka bhi khayaal rakhen.

Islaam me Naachna aur Gaana-bajaana haraam hai, Chunaanche Juloos e meelaad me in baato se bachen.
Aatishbaazi na karen ke ye Fuzool-kharchi aur gunaah hai.

Juloos me paan, maava, tambaku khaane se ya bidi, cigarate pine se parhez karen.

Aurto ko be-parda nikalna ya mardo ke bich me aana mana hai. Is liye Juloose milaad dekhne ke liye aurto ko apne gharo se baahar nahi nikalna chahiye.

Azaan aur Namaaz ke awqaat ka khaas khayaal rakhen.
Azaan ka ehtaraam karen aur azaan sunkar us ka jawaab den.
Juloos ke daurazn bhi masjid me ba-jama’at namaaz ada karen.
Aur namaaz ke baad ALLĀH ta’ala se Huzoor sallallāhu alaihi wa sallam ke waseele se sab ke liye Dua e khair karen.

Tabarrukaat ki ziyaarat karen.
Auliya Allāh ki ziyarat ke liye jaayen.
Qabrastan jaayen aur isaal e ṡawaab aur Dua e maghfirat karen.

Sahi ilm e deen sikhen aur dusro ko sikhayen.
Taake sahi aqeede ke saath nek amal kar saken.
Sunnato ko apnayen.
Har gunaah se bachne ki koshish karen.

Sab ke liye Hidaayat ki aur Sahi aqeede ke saath sahi nek amal karne ki taufiq ki dua karen.
Khaatma bil khair ki aur Maut ki, Qabr ki aur Qayaamat ki pareshaaniyo se hifazat ki aur maghfirat aur najaat ki dua karen.

************
Eid e Meelaad-un-Nabi ki Nafl Ibaadat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Rabi ul awwal mubarak ki 12wi tareekh ko
(Tulu aaftaab ke 20 minute baad) Namaaz e Ishraaq ada karne ke baad
2 rak’at nafl namaaz Shukraane ki padhen.
Aur phir 11 martaba Durood shareef aur 11 martaba Astaghfaar padhne ke baad ALLĀH ta’ala ka shukr ada karen ke hume Ummat e Mustafa me aur Ahle Sunnat wal Jama’at me saamil kiya. Aur Dua karen ke puri zindagi aur nazaa ke waqt Eimaan ki salaamati ata farmae.

(2) Namaaz e Zohar ke baad
20 rak’at namaaz 2-2 karke padhen.
Har rak’at me Surah al-Faatiha ke baad Surah al-Ikhlaas 21 martaba padhen.
Aur is ko Huzoore akram sallallāhu alaihi wa sallam ki rooh e aqdas ko isaal e ṡawaab karen.

Phir Durood shareef padhkar Dua e khair karen aur Eimaan ki hifaazat ke liye aur Khaatma bil khair ke liye dua karen.

Is namaaz ko padhne waale ko ALLĀH ta’ala Tauheed par qaayam rakhega aur Khaatma bil khair ata farmaega aur Huzoore akram sallallāhu alaihi wa sallam ki ziyarat naseeb hogi. In shaa Allāh.

(3) Awwal Aakhir 3-3 martaba Durood shreef padhkar ye Wazeefa padhen.
Bismillāhir Rahmānir Raheem
Ya Allāhu (7 martaba)
Ya Ghafooru (7 martaba)
Ya Rahmānu (7 martaba)
Ya Hannanu (7 martaba)
Ya Mannanu (7 martaba)
Ya Rayyanu (7 martaba)
Ya Sub’hānu (7 martaba)

In shaa Allāh ALLĀH ke fazl se pura saal khush-haal aur amn me guzrega aur Mehshar me hisaab o kitaab me aasaani ke saath Jannat me daakhil hoga.

***************
ALLĀH ta’ala us ke Habeeb sallallāhu alaihi wa sallam ke sadqe me
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae aur Islaam ka bolbala ata farmae.
Aur in baato ko yaad rakhkar amal karne ki aur dusro ko bataane ki taufiq ata farmae.
Aur sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

FikreUmmat.net Updating… .. .

Eid-e-Meelaad-un-Nabi sallallāhu alaihi wa sallam manaana jaa’iz hai aur baa’iṡ e rahmat aur barkat hai :

▪▪► ALLĀH ta’ala musalmano ko koi bhi khaas ne’amat ata farmaata hai wo ALLĀH ke khaas dino me se hai aur un dino ko yaad karte rehna zaroori hai.

Qur’an :
14 Surah Ibrāheem, Aayat 5 :

Aur unhe ALLĀH ke dino ko yaad dilao.

ALLĀH ta’ala ne Hazrate Moosā alaihis salaam se farmaaya tha ke ‘Bani Isrā’eel ko un dino ko yaad karne ke liye kaho jab ALLĀH ta’ala ne un ko khaas ne’amate ata farmai ya’ni un ki haajat par un ko Mann wa Salwa (paka pakaaya khaana) ata farmaaya aur peene ke liye paani ka chashma ata farmaaya aur us me un ke 12 qabeelo ke liye 12 hisse kar diye.

Ummate Muhammadi ke liye Yaum e Meelaad-un-Nabi sallallāhu alaihi wa sallam, Eid-ul-Fitr, Eid-ul-Ad’ha, Shab-e-Qadr, Shab-e-Baraat, Yaum e Aashura, Shab-e-Me’araaj ye sab ALLĀH ta’ala ke khaas din aur raat hain.
Aur in me ALLĀH ta’ala ki ibaadat aur zikr karke un khaas ne’amato ka shukr ada karna chaahiye.

*********
▪▪► Yaum e Meelaad-un-Nabi sab se khaas din hai kyun ki ALLĀH ta’ala ne ye tamaam kaa’inat apne Habeeb sallallāhu alaihi wa sallam ke liye banaai hai aur ye tamaam muqaddas aur mubarak din aur raat Nabi e kareem sallallāhu alaihi wa sallam ke sadqe me musalmano ko ata kiye hain.

Hadeeṡe Qudsi :
Laulak lama khalaqtul ardi wal aflak.

ALLĀH ta’ala farmaata hai :
Aye mehboob agar tujhe paida karna maqsood na hota to main zameen aur aasmaano ko paida na karta.

(Firdaus-ul-akhbaar, Jild -2, Safa -45, Hadeeṡ -8095)

Hamare nabi sallallāhu alaihi wa sallam ka martaba itna aa’la aur afzal hai ke ALLĀH ta’ala ne sab se pehle Noor e Mustafa ko banaaya aur puri kaa’inat ko un ke liye hi banaaya.

ALLĀH ta’ala ne Huzoor Mohammad Mustafa sallallāhu alaihi wa sallam ko sab se pehle banaaya aur dunya me tamam ambiya ke baad Khaatim ul Ambiya banaakar bheja. Is tarah Aap sallallāhu alaihi wa sallam takhleeq me sab se Awwal aur Be’asat (Zahoor) me sab (ambiya) se Aakhir hain.

*********
▪▪► ALLĀH ta’ala ki tamaam ne’amato me behtareen ne’amat us ke Habeeb sallallāhu alaihi wa sallam hain.
Aap Rab ta’ala ki Ne’amat e kubra aur ehsaan e azeem hain.

ALLĀH ta’ala ne aap ke waseele se sab ko Hidaayat ata farmai, Aap ne ilm o hikmat se jahaalat ka andhera door kiya, Aap ne aadami ko insaan banaaya, Aap ne deen e Islaam dekar zindagi jine ka sahi aur khubsurat tareeqa sikhaya, Aap ne ibaadat ka aur Rab ko raazi karne ka tareeqa sikhaaya, Aap ne dunya aur aakhirat me bhalaai aur kaamyaabi ka raasta sikhaaya.

Aur beshak hum khushnaseeb hain ke hame ALLĀH ne us ke Habeeb sallallāhu alaihi wa sallam ka ummati banaaya jis ne har haal me Wilaadat par, Makka me, Madeena me, Me’araj me, Gaar me, Hajj me, Umrah me hum gunaahgaar ummatiyo ko yaad kiya aur har zulm sehkar hamare liye khuda se dua ki ‘Rabbi habli ummati’.

Aap ke sadqe me ALLĀH ta’ala hamari duao ko qubool karta hai aur hume sab ne’amaten ata karta hai.

Aap roze mehshar me ummatiyo ki shafa’at karke jahannam ki aag aur azaab se bachayenge.

Qur’an :
3 Surah Aale Imraan, Aayat 164 :

Beshak ALLĀH ne musalmano par bada ehsaan farmaaya ke un me unhi me se (azmat wala) Rasool bheja jo un par us ki aayate padhta aur unhe paak karta hai aur unhe kitaab wa hikmat ki ta’alim deta hai agarche wo log us se pehle khuli gumraahi me the.

*********
▪▪► Is liye Huzoor Rasool-Allāh sallallāhu alaihi wa sallam ke ehsaano ko yaad karke Yaum e Meelaad-un-Nabi ke mauqe par khushiya manaani chaahiye.

Yun to pura saal hame Sarware Kaunain Pyare Aaqa sallallāhu alaihi wa sallam ke ehsaano ko yaad karna chaahiye aur Aap ki wilaadat aur Hayaat e tayyabah ka aur aap ke kamaalat aur moazeezaat ka zikr karte rehna chaahiye. Magar Yaum e Milaad-un-Nabi ke mubarak mauqe par ALLĀH ki is azeem ne’amat ka khaas kasrat se zikr karna chaahiye.

Qur’an :
10 Surah Younus, Aayat 58 :

Farma dijiye (ye sab kuchh) ALLĀH ke fazl aur us ki rahmat ke baa’is hai (jo be’asat e Mohammad Mustafa sallallāhu alaihi wa sallam ke zariye tum par hua hai) pas musalmano ko chaahiye ke us par khushiya manaayen ye us se kahi behtar hai jise wo jama karte hain.

*********
▪▪► Ahkaam e shariat ke masaa’il 4 cheezo ko milaakar samajh sakte hain :
(1) Kitabullāh (Qur’an shareef)
(2) Hadeeṡ wa Sunnat e Nabawi (Prophetics Sayings & Traditions)
(3) Ijma e Ashaaba wa Ulama (Consensus of Companions of Prophet , Followers of companions & Muslim scholars)
(4) Qiyaas (Analogical Deduction by Muslim scholars)

Qur’an :
4 Surah an-Nisaa, Aayat 59 :

Aye Eimaan walo, ALLĀH ki ita’at karo aur Rasool ki ita’at karo aur (apno me se) saahibaan e amr ki aur phir kisi mas’ale par tum baahum ikhtelaaf karo to use ALLĀH aur us ke Rasool (sallallāhu alaihi wa sallam) ki taraf lauta do, Agar tum ALLĀH par aur aakhirat ke din par yaqeen rakhte ho to yehi (tumhare liye) behtar aur anjaam ke lihaaj se bahot achha hai.

Ya’ni ALLĀH ta’ala farmaata hai ki tum me ilm waalo ke upar ilm wala hoga jo tumhare liye saahibaan e amr hoga aur jo tumhe ALLĀH aur us ke Rasool sallallāhu alaihi wa sallam ki ita’at ka sahi tareeqa sikhaayenge. Aam halaat me us Imaam ki ita’at karte raho aur jab kisi mas’ale par ikhtelaaf ho jaaye to Qur’an aur Sunnat ki taraf ruju karo.

Saahibaan e Amr me Ameer ul Mo’mineen (Khulfa e Raashideen) aur Aa’imma e Islaam saamil hain.

Hadeeṡe Nabawi :
Ulama e ummatika ambiya e Bani Isrā’eel.

Meri ummat ke ulama Bani Isrā’eel ke nabiyo ke maanind hai.

*********
▪▪► Aur Huzoor Rasool-Allāh sallallāhu alaihi wa sallam ne aur Khulfa e Raashideen aur Aa’imma e Islaam ne Meelaad-un-Nabi jaa’iz maankar apne apne tareeqe se manaaya hai.

[1] ALLĀH ta’ala ne apne Habeeb sallallāhu alaihi wa sallam ki zahoor /be’asat par apni qudrat se aap ki fazeelat ko zaahir karke khaas khushi ka izhaar kiya.

Aap Makka mukarrama me Peer ke din Subah saadiq ke waqt mushk ki khushbu mehkaate, paakiza badan, naaf burida, khatna shuda, dono shaano ke darmiyaan mohar e nubuwwat darakhshaa aur dono haath zamin par rakhe hue sare paak aasmaan ki taraf uthaaye hue tashreef laaye .

Aap ki wilaadat ke waqt jaha par Hazrate Aamena radi-Allāhu ta’ala anha tashreef farma thi us ghar me koi chiraag na hone ke ba-wajood ghar me itni roshni ho gai ki agar koi chaahe to sooi me dhaaga piro le.
Zameen se aasmaan tak noor hi noor chhaa gaya.
Tamaam but sar ke bal aundhe gir pade.
Aatash-qada e Faars khud ba-khud gul ho gaya.
Hukm e ilāhi se Ka’aba ne sajda kiya.

[2] Huzoor Nabi e kareem sallallāhu alaihi wa sallam ne apne Yaum e wilaadat par khushi ka izhaar kiya hai aur ALLĀH ta’ala ka shukr ada karne ke liye khaas ibaadat ki hai.

Masjid e Nabawi me mehfile milaad me khud Huzoor Rasool-Allāh sallallāhu alaihi wa sallam ne apni wilaadat ke fazaa’il bayaan farmaaye.
(Tirmizi, Jild -2, Safa -201)

Huzoor Nabi e kareem sallallāhu alaihi wa sallam ne khud apna Milaad manaaya hai aur Madeena me bakare zibah karke miskeeno ko khilaayen hain.
(Al Haawil-il Fatawi, Jild -1, Hadeeṡ -196)

Hazrat Abu Qataada radiy-Allāhu ta’ala anhu se riwaayat hai ki :
Huzoor sallallāhu alaihi wa sallam se Peer (Monday) ke din roza rakhne ke baare me puchha gaya to
Aap ne farmaaya ke ‘Isi din meri Wilaadat hui thi aur isi din mujh par Qur’an majeed naazil huwa.’

(Muslim, Jild -2, Kitaab us Siyaam, Safa -367, Hadeeṡ -2850)

[3] Maula e kaa’inat Hazrat Ali radiy-Allāhu ta’ala anhu ALLĀH ki baargaah me Huzoor Sarwar e kaa’inat sallallāhu alaihi wa sallam ke naam se ek mendha zibah kiya karte the.

(Jaame Tirmizi, Jild -1, Safa -538;
Sunan Abu Daawūd, Jild -2, Safa -29)

[4] Isi tarah har zamaane ke mash’hoor Aa’imma e Islaam ne Jashn e Meelaad-un-Nabi manaane ko jaa’iz bataaya hai.

(1) Hazrat Imaam Ibne Jawzi Muhaddeeṡ (Wilaadat 510 Hijri) ne ‘Bayaan al-Maulid un Nabawi’ me.
(2) Hazrat Imaam Abu Shama (Wilaadat 599 Hijri) ne ‘Al Baais Ala inkaril Bada wal Hawadis’ me.
(3) Hazrat Imaam Shams-ud-deen al-Juzri (Wilaadat 660 Hijri) ne ‘Husn ul Maqsid fi Amalil Maulid’ me.
(4) Hazrat Imaam Shams-ud-deen Muhammad al-Zahabi (Wilaadat 673 Hijri) ne ‘Sayer ul A’alam wan nubala’ me.
(5) Hazrat Imaam Ibne Kaṡeer (Wilaadat 701 Hijri ) ne ‘Al Bidaaya wan Nihaaya’ me.
(6) Hazrat Imaam Shams-ud-deen bin Naseer-ud-deen Damishqi (Wilaadat 777 Hijri) ne ‘Mawridul Saawi fi Maulidil Haadi’ me.
(7) Hazrat Imaam Shams-ud-deen al-Sakhawi (Wilaadat 831 Hijri) ne ‘Sublul Huda wal Rushad’ me.
(8) Hazrat Imaam Jalaal-ud-deen Suyuti (Wilaadat 849 Hijri) ne ‘Husnul Maqsad fi Amalil Maulid’ me.
(9) Hazrat Imaam Shahaab-ud-deen Ahmad al-Qastallani (Wilaadat 851 Hijri) ne ‘Al Muwahib ul Ladunniya’ me.
(10) Hazrat Imaam Shahaab-ud-deen Ibne Hajar Haytami al-Makki (Wilaadat 909 Hijri) ne ‘Fataawa Haadisia’ me.
(11) Hazrat Imaam Qutub-ud-deen Hanafi (Wilaadat 988 Hijri) ne apni kitaab ‘Al a’alam be A’alam e Baitillāhil Haram’ me.
(12) Hazrat Allama Shahaab-ud-deen Khifaaji ‘Risaalah Amalal Maulid’ me
(13) Hazrat Shaikh Abdul Haq Muhaddeeṡ Dehlawi (Wilaadat 958 Hijri) ne ‘Ma sabat minas sunnah’ me.
(14) Hazrat Mulla Ali Qaari (Wilaadat 1014 Hijri) ne ‘Al Murid ul Rawi fee Maulid-un-Nabi’ me.
(15) Hazrat Imaam Zarqani (Wilaadat 1055 Hijri) ne ‘Sharah Muwaahibul Ladunniya’ me.
(16) Hazrat Shaah Abdur Raheem Muhaddeeṡ Dehlawi (Wilaadat 1054 Hijri) ‘Ad Durrus sameen’ me.
(17) Hazrat Shaah Waliyullāh Muhaddeeṡ Dehlawi (Wilaadat 1174 Hijri) ne ‘Fuyuz ul Haramain’ me.
(18) Hazrat Haaji Imdaadullāh Muhaajir Makki (Wilaadat 1233 Hijri) ne ‘Shamaim e Imdaadiya’ Aur ‘Faisla Haft Mas’ala’ me.
(19) Hazrat Maulaana Abdul Hay Lakhnawi (Wilaadat 1264 Hijri) ne ‘Fataawa Abdul Hay’ me.

*********
▪▪► Qur’an :
93 Surah ad-Duha, Aayat 11 :

Aur apne Rab ki ne’amato ka khub tazkeera karo.

Hazrat Abu Saeed Khudri radiy-Allāhu ta’ala anhu se riwaayat hai ki
Hazrat Muawiya radiy-Allāhu ta’ala anhu farmaate hain ki Huzoor Rasool-Allāh sallallāhu alaihi wa sallam baahar tashreef laaye aur sahaaba ke halqe ko dekhkar aap ne farmaaya ‘Tum yahan kis wajah se baithe ho?’
Unho ne kaha ‘Hum ALLĀH se dua kar rahe hain aur us ka shukr ada kar rahe hain ki us ne apna deen hum ko batlaaya aur hum par ehsaan kiya aap ko bhejkar.’

(Sanan Nisai, Hadeeṡ -5432)

Is tarah Maah e Rabi-ul-Awwal me Mehfil e Meelaad munaaqid karna jis me Huzoore akram sallallāhu alaihi wa sallam ki wilaadat, aap ki sirat e hasana, aap ki Sunnate aur Hadeeṡ e paak aur deegar fazaa’il, kamaalat aur moazeezaat bayaan karna aur Ambiya aur Auliya Allāh ke bayaan karna ye baa’iṡ e ṡawaab hai.

Yaum e Meelaad-un-Nabi ke Mubarak mauqe par shaan ke saath Juloos nikaalna, jis me Zikr e Ilāhi aur Hamd e Baari ta’ala, Naat e Rasool aur Manqabat padhna ye baa’iṡ e ṡawaab hai.

ALLĀH ta’ala aur us ke Habeeb wa Rasool sallallāhu alaihi wa sallam ka zikr karna baa’is e barkat aur rahmat hai aur dil ka sukoon paane ka aur use paak karne ka zariya hai.
Aur Ambiya aur Auliya ka bayaan sunna ilm e deen me izaafa karta hai aur unke darse par amal karna bhi nek banne ka aur foyuz o barkaat haasil karne ka zariya hai.

Aur Mehfil e Meelaad aur Juloos e Milaad se Shaan e Islaam aur Ittehaad e Millat ka muzaahira bhi hota hai.

*********
▪▪► Koi agar is mubarak din me khushi manaane se ya Ishqe Rasool ke saath Zikre Rasool ki mehfil munaaqid karne ya Juloos nikaalne se roke to ye munaasib bhi nahi aur mumkin bhi nahi.
Kyun ki khud ALLĀH chaahta hai ke us ke Habeeb Khaatim ul Ambiya sallallāhu alaihi wa sallam ka zikr hamesha buland rahe.
ALLĀH ta’ala ne aap ko Habeebullāh, Afzal ul Bashar, Khair e Khalqillāh, Asharaf ul Ambiya aur Sayyed ul Ambiya, Rasool e aazam, Sarwar e Kaunain, Shaah e Ṡaqlain, Sultaan e daarain, Noor e mujassam, Saahib e laulak, Saahib e Me’araaj, Saahib e Ilm o hikmat, Haadi us subool, Mustafa, Mujtaba, Mukhtaar, Shafi e Mehshar, Khaatim ul Ambiya, Nabi e aakhiruz zamaan, Rasool e kaa’inat, Rahmatalil aalameen, Aneesil ghareebeen, Makhzan e jood o sakhaawat, Mohsin e insaaniyat, Qaasim e ne’amat, Waseela e akbar banaaya hai.

Qur’an :
94 Surah Alam nasrah, Aayat 4 :

Aur hum ne aap ki khaatir aap ka zikr (hamare zikr ke saath milaakar har jagah) buland farmaaya.

*******************
Aur Huzoor Rasool-Allāh sallallāhu alaihi wa sallam ne aur Khulfa e Raashideen aur Aa’imma e Islaam ne Meelaad-un-Nabi jaa’iz maankar apne apne tareeqe se manaaya hai.
Chunaanche is daur me bhi musalman ishqe Rasool ke saath Mehfil e meelaad munaaqid karke aur Juloos nikaalkar Yaum e wilaadat manaate hain.

▪▪► Jo Aashiqane Rasool is me saamil hote hain wo sa’adat-mand hain aur jo saamil nahi hona chaahte un ko har achhi cheez par aitraaz karne ki aadat ho gai hai.
Mo’mino ko chaahiye ki unhe Eid-e-Meelaad-un-Nabi ki haqeeqat samjhaane ki koshish karen aur agar wo nahi maante to unhe un ke haal par chhod den aur zyada bahes na karen.

Qur’an :
2 Surah al-Baqarah, Aayat 7 :

ALLĀH ne un ke dilo aur kaano par mohar laga di hai aur un ki aankho par parda pad gaya hai aur un ke liye sakht azaab hai.

*********
▪▪► Aur Aashiqaan e Rasool ko bhi chaahiye ke Eid-e-Meelaad-un-Nabi ko Islaami tareeqe se manaayen aur aise amal karen jis se Islaam aur Musalmano ko aur izzat mile.

Qur’an :
2 Surah al-Baqarah, Aayat 208 :

Aye Eimaan waalo, Islaam me pure daakhil ho jaao.

Is mubarak dino me Ishq e Rasool ke saath Mehfil e Meelaad, Mehfil e Zikr aur Mehfil e Tilaawat e Qur’an me saamil hote rahen.
Kaṡrat se Durood o Salaam padhen.
Zyada Namaaz padhen aur Tilaawat e Qur’an karen.
Sadqa- Khairaat zyada karen.
Ghareebo, Mohtaajo ki imdaad karen.
Beemaar aur kamzor ki khidmat karen.
Saadaat ki khidmat karen.
Buzurgo ko isaal e ṡawaab karte rahen.
Kaṡrat se Astaghfaar karen.

Nafl Namaaz padhen.
Jin ki namaazen Qaza ho gai hain wo pehle jitni mumkin ho utni Qaza namaaz padhen taake bariuz zimma ho jaayen.
Nafl namaaz ka pura sawaab usi ko milta hai jo Farz namaaz waqt par ada karta hai aur pehle un namaazo ki qaza padh leta hai jo chhut gai hai.

Apne gharo aur mohallo ko khub sajayen aur Roshni karen.
Magar aam raasto par ya choraaho par is tarah sajaawat na karen ki waha se guzarne walo ko takleef ho.

Najam ki CD/DVD bajaate waqt ye khayaal rakhen ki itni buland aawaaz na ho ki is ki wajah se mareezo, jaeefo, buzurgo aur chhote bacho ko takleef ho aur Azaan aur Namaaz ke awqaat ka bhi khayaal rakhen.

Eid-e-Meelaad-un-Nabi ko Subah Saadiq ke waqt khaas Salaat o Salaam pesh karen aur Dua e khair karen.
Fajr ki namaaz ada karne ke baad bhi Dua e khair karen.

Ghusl karen, Miswaak karen, Khushbu lagayen, Surma lagayen, Achhe kapde pehnen.
Achha khaana khaas kar meetha pakakar khud bhi khaayen aur azeezo, rishtedaaro aur padosiyo ko hadiya bhejen aur ghareebo ko bhi den.

Mehfil e Meelaad me aur Juloos me ikhlaas, adab o ehtaraam aur khushi ke saath saamil ho aur Raza e ilāhi aur Izhaar e ishqe Rasool ki nek niyyat rakhen.
Hattal imkaan Ba-wuzu rahen.
Har fuzool baat aur amal se bachen.
Juloos me Zikre Ilāhi aur Hamd e Baari ta’ala, Naat e Rasool aur Manqabat padhte rahen.
Kaṡrat se Durood o Salaam padhte rahen.
Tilaawat e Qur’an karen.
Kaṡrat se Astaghfaar karen.
Husne akhlaaq ka bentareen muzaahira karen taake Islaam aur musalmano ki shaan buland ho.

Islaam me Naachna aur Gaana-bajaana haraam hai, Chunaanche Juloos e meelaad me in baato se bachen.
Aatishbaazi na karen ke ye Fuzool-kharchi aur gunaah hai.

Juloos me paan, maava, tambaku khaane se ya bidi, cigarate peene se parhez karen.

Aurto ko be-parda nikalna ya mardo ke bich me aana mana hai. Is liye Juloos e milaad dekhne ke liye aurto ko apne gharo se baahar nahi nikalna chaahiye.

Juloos e meelaad me oont, ghode ya bail jaise jaanwaro ko saath me na rakha jaaye ki in ke peshaab aur leed se logo ke kapde na-paak hone ka andesha rehta hai.

Azaan aur Namaaz ke awqaat ka khaas khayaal rakhen.
Azaan ka ehtaraam karen aur azaan sunkar us ka jawaab den.
Juloos ke dauraan bhi masjid me ba-jama’at namaaz ada karen.
Aur namaaz ke baad ALLĀH ta’ala se Huzoor sallallāhu alaihi wa sallam ke waseele se sab ke liye Dua e khair karen.

Tabarrukaat ki ziyaarat karen.
Auliya Allāh ki ziyarat ke liye jaayen.
Qabrastan jaayen aur isaal e sawaab aur Dua e maghfirat karen.

Sahi ilm e deen sikhen aur dusro ko sikhayen.
Taake sahi aqeede ke saath nek amal kar saken.
Sunnato ko apnayen.
Har gunaah se bachne ki koshish karen.

Sab ke liye Hidaayat ki aur Sahi aqeede ke saath sahi nek amal karne ki taufiq ki dua karen.
Khaatma bil khair ki aur Maut ki, Qabr ki aur Qayaamat ki pareshaaniyo se hifaazat ki aur maghfirat aur najaat ki dua karen.

****************
ALLĀH ta’ala us ke Habeeb sallallāhu alaihi wa sallam ke sadqe me
Sab ko in baato ko yaad rakhkar is par amal karne ki aur dusro ko sikhaane ki taufiq ata farmae.
Sab ko mukammal ishq e Rasool ata farmae aur hidaayat ata farmae aur Sab ko sahi tareeqe se ishq e Rasool ke saath Eid-e-Meelaad-un-Nabi manaane ki aur foyuz o barkaat haasil karne ki taufiq ata farmae.
Sab ke Eimaan ki hifaazat farmae aur Sahi ilme deen haasil karne ki aur Sahi baat samajhne ki taufiq ata farmae aur Sahi nek amal karne ki aur Gunaaho aur buri bid’ato se bachne ki taufiq ata farmae aur Islaam ka bolbala ata farmae.
Aur Sab ko dunya wa aakhirat me kaamyaabi aur izzat ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

FikreUmmat.net Updating… .. .

Aashoora ka bayaan :

Aashoora ki Fazeelat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Is mubarak din me ALLĀH ta’ala ki qudrat aur fazl o ne’amat ki bahot si badi badi nishaaniya zaahir hui.

(1) Isi din arsh wa kursi, loh wa qalam, aasmaan wa zameen, chaand wa sooraj aur sitaare aur jannat banaaye gaye.
(2) Isi din sab se pehli aasmaan se zameen par baarish hui.
(3) Isi din Hazrat Ādam alaihis salaam ki tauba qabool hui.
(4) Isi din Hazrat Idrees alaihis salaam ko aasmaan par uthaaye gaye.
(5) Isi din Hazrat Nooh alaihis salaam ki kashti toofaan ke baad salaamati ke saath Zoodi pahaad par pahunchi.
(6) Isi din Hazrat Ibrāheem alaihis salaam ki wilaadat hui.
(7) Isi din Hazrat Ya’aqoob alaihis salaam ki apne bete Hazrat Yousuf alaihis salam se mulaaqaat hui aur un ki aankho ki roshni waapas mili.
(8) Isi din Hazrat Younus alaihis salaam machhli ke pait se najaat mili.
(9) Isi din Hazrat Ayyoob alaihis salaam ki takleef door ki gai.
(10) Isi din Hazrat Yousuf alaihis salaam gehre kuwe se nikaale gaye.
(11) Isi din Hazrat Moosā alaihis salaam ko Fir’aun se najaat mili aur Fir’aun apne laskar samet dariya me gharq ho gaya.
(12) Isi din Hazrat Daawūd alaihis salaam ki lagzish muaf hui.
(13) Isi din Hazrat Sulaimān alaihis salaam ko jinn wa insaan par hukoomat ata hui.
(14) Isi din Hazrat Saalih alaihis salaam ki dua qubool hui thi.
(15) Isi din Hazrat Eisā alaihis salaam ki wilaadat hui aur isi din aasmaan par uthaaye gaye.
(16) Isi din Huzoor Muhammad Mustafa sallallāhu alaihi wa sallam ne elaan e nabuwwat kiya.
(17) Isi din Hazrat Imaam Husain ibn Ali radiy-Allāhu ta’ala anhu aur Aap ke jaan nisaar saathiyo ne maidaan e Karbala me 3 din ke bhooke pyaase rehkar Islaam ki hifaazat ke liye jaam e shahaadat nosh farmaaya.
(18) Isi din Qayaamat aayegi.

♦ Is mubarak din me mo’min ki Ibaadat qubool hoti hai, Tauba qubool hoti hai, Dua qubool hoti hai.

Is liye hume chaahiye ke is din ko sahi tareeqe se ibaadate ilāhi karne me guzaare aur sachi tauba karen aur tamaam mo’mino ke liye dua e khair karen.

**********************
Hadeeṡe Nabawi :
‾‾‾‾‾‾‾‾‾‾‾‾‾‾‾‾‾‾‾‾‾‾

(1) Jo shakhs Aashoora ke roz Ghusl kare to kisi Marz me mubtala na hoga siwa e marz e Maut ke .

(2) Jo shakhs Aashoora ke roz Asmad ka Surma aankho me lagaaye to us ki aankhen kabhi nahi dukhengi.
(Sho’abul Eimaan, Hadeeṡ -3797)

(3) Jo koi Aashoora ke din apne Ahl o ayaal par Nafqa me wus’at karega to ALLĀH ta’ala us par pura saal wus’at farmayega.

(4) Jo Shakhs Aashoora ke din Yateem ke sar par haath pherega to ALLĀH ta’ala us ke liye Yateem ke sar ke har baal ke badle ek ek darja Jannat me Buland farmayega .

(5) Jis ne Aashoora ki shaam ko kisi mo’min ko roza iftaar karaaya us ko puri ummat ke roze ke barabar sawaab milega.
(Gunyatut Taalibeen)

**********************
♦ Aashoora ke din ghusl karna, miswaak karna, khushboo lagaana, aankho me surma lagaana aur achha khaana pakakar khaana aur kasrat se Khairaat karna aur miskeeno aur yateemo ko madad karna Sunnat hai.

**********************
♦ Shab e Aashoora ki Ibaadat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

(1) 2 Rak’at namaaz padhen.
Har rak’at me Surah al-Faatiha ke baad 3 martaba Surah al-Ikhlaas padhen.
In shaa Allāh ALLĀH ta’ala is namaaz ko padhne waale ki qabr ko qayaamat tak roshan farmaega.

(2) 4 Rak’at namaaz ek salaam se padhen.
Har rak’at me Surah al-Faatiha ke baad 50 martaba Surah al-Ikhlaas padhen.

(3) 4 Rak’at namaaz ek salaam se padhen.
Har rak’at me Surah al-Faatiha ke baad 1 martaba Aayatul Kursi aur 10 martaba Surah al-Ikhlaas padhen.
Namaaz ke baad baithkar 100 martaba Surah al-Iklaas padhen.

(4) 8 Rak’at namaaz 2-2 karke padhen.
Har rak’at me Surah al-Faatiha ke baad 25 martaba Surah al-Ikhlaas padhen.
Phir baithkar 70 baar ‘Astaghfaar’ aur 70 baar Durood shareef padhen.

♦ Yaum e Aashoora ki Ibaadat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(Is ka waqt 10wi Muharram ko Tuloo e aaftaab ke 20 minute baad se Zawaal shuru hone se pehle tak hai.)

(1) 2 Rak’at nafl Tahyatul Wuzu padhen.
Pehli rak’at me Surah al-Faatiha ke baad 3 baar Surah al-Kaafirun aur Dusri rak’at me Surah al-Faatiha ke baad 3 baar Surah al-Ikhlaas padhen.

(2) 6 rak’at namaaz Salaat-ul-Aashura ki niyyat se 2-2 karke padhen.
Is ke baad Durood shareef padhkar ALLĀH se Aashura ki barkat ata farmae.

(3) 4 Rak’at namaaz ek salaam se padhen.
Pehli rak’at me Surah al-Faatiha ke baad Surah ad-Duha padhen, dusri rak’at me Surah Alam nashrah padhen, teesri rak’at me Surah al-Zilzaal padhen aur chothi rak’at me Surah al-Ikhlaas padhen.
Ise Huzoor Nabi e kareem sallallāhu alaihi wa sallam ko isaal e ṡawaab karen.
Is ke baad wahi par baithkar 41 martaba Aayate Kareema padhen.
‘Laa ilāha illa anta sub’hānaka inni kuntu minaz zaalimeen.’
Phir sajde me sar rakhkar ALLĀH ta’ala se Eimaan ki salaamati ki dua karen.

(4) 4 Rak’at namaaz ek salaam se padhen.
Pehli rak’at me Surah al-Faatiha ke baad Surah al-Kaafiroon padhen, dusri rak’at me Surah al-Ikhlaas padhen, teesri rak’at me Surah al-Falaq padhen aur chothi rak’at me Surah al-Naas padhen.
Ise chaaro Khulfa e raashideen radiy-Allāhu ta’ala anhuma ko isaale ṡawaab karen.
Phir baithkar 70 martaba ‘Hasbunallāhu wa ni’amal wakeel wa ni’amal mawla wa ni’aman naseer’ padhen.

(5) 2 Rak’at namaaz padhen.
Har rak’at me Surah al-Faatiha ke baad 3 martaba Surah al-Ikhlaas padhen.
Ise Sayyeda Faatima Zahra radiy-Allāhu ta’ala anha ko isaale ṡawaab karen.

(6) 4 Rak’at namaaz ek salaam se padhen.
Pehli rak’at me Surah al-Faatiha ke baad Aayat ul Kursi padhen, dusri rak’at me Surah al-Takaasur padhen, teesri rak’at me Surah al- Kaafirun padhen aur chothi rak’at me Surah al-Ikhlaas padhen.
Ise Imaame Hasan aur Imaame Husain radiy-Allāhu ta’ala anhuma ki arwaah e paak ko isaale ṡawaab karen.

(7) 4 Rak’at namaaz ek salaam se padhen.
Har rak’at me Surah al-Faatiha ke baad 3 martaba Surah al-Ikhlaas padhen.
Ise Shohada e Karbala radiy-Allāhu ta’ala anhuma ki arwaah e paak ko isaale ṡawaab karen.

(8) 4 Rak’at namaaz ek salaam se padhen.
Har rak’at me Surah al-Faatiha ke baad 1 baar Aayat ul Kursi aur 3 martaba Surah al-Ikhlaas padhen.
Ise apne waalidain ko isaale ṡawaab karen.
Is ke baad 100 baar Astaghfaar aur 100 baar Durood shareef padhen.
Phir 3 martaba ye dua padhen :
Allāhumma inni asaluk bihaqqil hasani wa akheehi wa ummihi wa abeehi wa jadadihee wa baneehi farrij hammee maa ana feehi bi rahmatika ya arhamar raahimeen.

(9) 2 Rak’at namaaz padhen.
Har rak’at me Surah al-Faatiha ke baad 3 martaba Surah al-Ikhlaas padhen.
Ise khud apni rooh ko isaale ṡawaab karen.

(10) Yaume Aashura ko ba-wuzu hokar 70 martaba ye padhen :
Hasbiyallāhu wa ni’amal wakeel.

(11) Kaṡrat se Durood shareef padhen.

************
▪▪► In namaaz me agar dusri Surah yaad na ho to us ke badle Surah al-Faatiha ke baad Surah al-Ikhlaas (Qul huwallāhu ahad) ya aur koi Surah yaad ho wo padhen.

▪▪► Kisi wajah se tamaam namaaz na padh saken to jitni padh sakte hain utni padhen aur phir Tilaawat e Qur’an, Kalma, Zikr ya Durood shareef padhte rahen.

▪▪► Aur apne liye aur tamaam ummate Mustafa ke liye Dua e khair aur apne aaba wa ajdaad aur tamaam marhoomeen ke liye Due e maghfirat karen.

▪▪► Jin ki namaazen Qaza ho gai hain wo pehle jitni mumkin ho utni Qaza namaaz padhen take bariuz zimma ho jaaye.
Aur tauba karke ye pakka ahad karen ke aainda sab namaaz waqt par ada karne ki koshish karenge aur namaaz ke foyuz o barkaat haasil karte rahenge.
Nafl namaaz ka pura sawaab usi ko milta hai jo Farz namaaz waqt par ada karta hai aur pehle un namaazo ki qaza padh leta hai jo chhut gai hai.

5 waqt ki Qaza namaaz me Rak’at ki ta’adaad :
Fajr 2, Zohar 4, Asr 4, Maghrib 3, Isha 4, Witr 3.

**********************
Is ke baad Dua e Aashoora zaroor padhen.
Is dua ko padhne waala in shaa Allāh pura saal maut se mehfooz rahega.

Dua e Aashoora :


Ya Qaabila tawbati Ādama Yawma Aashuraă-a Ya faarija karbi Zin-nooni yawma Aashuraă-a Ya jaami’a shamli Ya’aqooba yawma Aashuraă-a Ya saami’a da’awati Moosā wa Hāroona yawma Aashuraă-a Ya mughisa Ibrāheema minan naari yawma Aashuraă-a Ya rafi’a Idreesa ilas samaa’i yawma Aashuraă-a Ya mujeeba da’awati saalihin feen naaqati yawma Aashuraă-a Ya naasira sayyidina Muhammadin sal-lallāhu alayhi wa sallama yawma Aashuraă-a Ya rahmānad dunya wal aakhirati wa raheemahumaa salli alā sayyidina Muhammadiw wa alā jamee’il ambiyaa’i wal-mursaleena waqdi haajaatina fid dunya wal aakhirati wa atil umranaa fee taa’atika wa mahabbatika wa ridaaka wa ah’yinaa hayatan tayyibatanw wa tawaffana alal eimaani wal islaami bi-rahmatika Yaă arhamar raahimeen, Allāhumma bi-sirril hasani wa akheehi wa ummihī wa abeehi wa jaddihī wa banihi farriju anna maa nahnu feehi.

Phir ye Dua 7 baar padhen :

Sub’hānallāhi mil’al-meezaani wa muntahal ilmi wa mablaghar rida wa zinatal arshi laa maljaa-aa wa laa manjaa-aa minallāhi illa ilayhi, Sub’hānallāhi adadash shaf’i wal witri wa adada kalimaatillāhit tammaati kullihaa nas’alukas salaamata bi-rahmatika yaa arhamar raahimeen, Wa huwa hasbunaa wa nai’mal wakeel, Ni’mal mawla wa ni’man naseer, Wa laa hawla wa laa quwwata illa billāhil aleeyil azeem, Wa sallallāhu ta’aala ala sayyidina Muhammadiw wa ala aalihi wasahbihi wa alal muamineena wal muaminaati wal muslimeena wal muslimati adada zarratil wujoodi wa adada ma’aloomaatillāhi wal hamdulillāhi rabbil aalameen.

**********************
Aashoora ka Roza :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Hadeeṡ e Nabawi :
Jo musalman Aashoora ke din Roza rakhega us ke pure saal ke gunaah ALLĀH ta’ala muaf farmaega.

Hadeeṡ e Nabawi :

Hazrate Abu Huraira radiy-Allāhu anhu se riwaayat hai ki :
Huzoor Rasool-Allāh sallallāhu alaihi wa sallam ne farmaaya
‘Ramazaan ke roze baad sab Roze me afzal Moharram ke roze hain, jo ALLĀH ka mahina hai aur Namaaz e Farz ke baad afzal Tahajjud ki mamaaz hai.’

(Sahih Muslim , Jild -3, Hadeeṡ -2755)

›› Behtar hai ke 2 din roze rakhen, 9 aur 10 ya 10 aur 11.
Agar kisi wajah se 9 Moharram ka Roza na rakh saken to 10 aur 11 ka rakhen.

**********************
ALLĀH ta’ala us ke Habeeb sallallāhu alaihi wa sallam ke sadqe me
Aur Imaam e Husain radiy-Allāhu ta’ala anhu aur Shohada e Karbala aur Ahle bait waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur in sab baato ko yaad rakhkar us par amal karne ki aur dusro ko bataane ki taufiq ata farmae.
Aur Sab ko nek amal karne ki taufiq ata farmae aur Aashura me sahi tareeqe se Ibaadat karne ki taufiq ata farmae aur har buri bid’at aur gunaah se aur fuzool-kharchi se bachne ki taufiq ata farmae aur Ahle bait, Shohda aur Auliya ko isaale ṡawaab karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

FikreUmmat.net Updating… .. .

Taaziya-daari ka bayaan :

★ Imaam e Ahle Sunnat aur Radd e Bid’at ★

(1) Taaziya Mamnoo’aa hai. Shariat me is ki koi asl nahi hai.
Taaziya banaana, dekhna, chadhaava chadhaana, niakaalna, aur us ki kisi aqeedat ya kuchh tasawwur karke Ta’azeem karna sakht haraam hai.
(Fataawa Razawiya, Jild 24, Safa -489,490)

(2) Moharram me Taaziyadaari wa Seena kubi Haraam hai.
(Fataawa Razawiya, Jild 24, Safa -141)

(3) Taaziya (ka juloos) dekhna bhi jaa’iz nahi.
(Fataawa Razawiya, Jild -24, Safa -143)

(4) Kisi ne agar Taaziye par Mannat maani to ye Nazr baatil aur najaa’iz hai.
(Fataawa Razawiya, Jild -24, Safa -501)

(5) Taaziya, Alam, Sawaari, Mehandi jaise tareeqe [rasm] jaari karna Bid’at hai aur is se Islaam ki shaan badhti nahi hai.

(6) Kuchh utaara, Baaqi toda aur dafan kar diya, Ye har saal maal ko barbaad karne ka Gunaah hai.
Taaziya-daari is Galat tareeqe ka naam hai, Jo Bid’at aur bilkul Najaa’iz wa Haraam hai.
(Taaziyadaari, Safa -4)

(7) Taaziya ko Haajat ko pura karne wala maanna Jahaalat hai, Is ki Mannat be-waqoofi hai aur na karne me Nuqsaan jaanna wahem hai. Musalman ko aisi harkat se bachna chaahiye.
(Taaziyadaari, Safa -59)

(8) Taaziye par chadha khaana nahi khaana chaahiye, Agar Niyaaz dekar chadhaayen, Ya chadhaakar Niyaaz den to bhi us ke khaane se parhez karen.
(Taaziyadaari, Safa -11)

(9) Taaziya banaana aur us par Nazr wa Niyaaz karna, Zarooraten puri hone ki ummeed me Mannate latkaana, Ye saare kaam jis tarah logo me aaj ke zamaane me mashhoor hain, Bid’at aur Haraam wa Najaa’iz hain.
(Irfaan-e-Shariat, Safa 15-16)

(10) Taaziya aata dekh kar nazren pher len, Us ki taraf dekhna hi nahi chahiye.
(Irfaan-e-Shariat, Jild 1, Safa -15)

(11) Moharram me Marasiya padhna ya us me shirkat karna najaa’iz hai, Wo gunaaho se bhare hote hain.
(Irfaan-e-Shariat, Jild 1, Safa -16)

(12) Moharram me Siyah ya Sabz kapde gham ki nishaani hai Aur gham Haraam hai.
(Ahkaam-e-Shariat, 171)

(13) 1. Kuchh log Muharram ke dino me na to din bhar roti pakaate hain, Na jhaadu dete hain, Kehte hain ke dafn karne ke baad pakaai jaayegi.
2. In 10 dino me kapde nahi badalte.
3. Maah e Moharram me koi Shaadi-biyah nahi karte.

Teeno baaten Gham hain, Aur gham Haraam hai.
(Ahkaam-e-Shariat, Jild 1, Safa 171)

(14) Najaa’iz baat ka tamaasha dekhna bhi najaa’iz hai.
(Malfuzaat, Safa -286)

**************
▪▪► Maah e Moharram me 10 roz tak Milaad ki mehfil karna aur Huzoor e akram sallallāhu alaihi wa sallam, Khulfa e Rashideen, Ahle bait, Imaam e Husain, Ashaaba aur Shohda e Karbala radiy-Allāhu ta’ala anhuma ke fazaa’il bayaan karna, isaal e ṡawaab ke liye Qur’an khwaani ya Durood shareef aur Kalma ka khatm karna ya Niyaaz khilaana, Paani aur sharbat pilaana ye sab Bid’at e Hasana aur jaa’iz hai.

Aur Taaziyadaari ya’ni Taaziya banaana aur pure ilaaqe me ghumaana aur juloos ke baad use paani me dafn karna ya taaziyagaah (imaam baada) me rakhna, Taaziya ko sajda karna ya Rooku’ ki tarah jhukna ya Tawaaf ki tarah us ke chakkar lagaana ya use chumna ya taaziya ki tasweere rakhkar use chumna ya use lobaan ya agarbatti wagairah karna ye sab BID’ATE MUKAFFARAH (ya’ni Kufr aur Shirk tak pahunchaane waali) hai.

aur Isi tarah khoon nikaalna, maatam karna, noha karna, kaale kapde pehnna, chokaara karna, naachna aur gaana-bajaana, khel tamaasha karna, Kartab dikhaana aur Aur is me aurto ko saamil hona ya dekhne ke liye baahar nikalna ye sab bhi BID’ATE MUKAFFARAH hai.

♦ Kaafiro ka koi bhi tareeqa ya rasm sahi maankar apnaana bhi KUFR hai.

**************
▪▪► Is liye mo’mino ko chaahiye ke Yaum e Aashura wa Shahaadat Ishq e Rasool ke saath sahi tareeqe se manayen aur ALLĀH ki raza haasil karen.

Maah e Moharram me Nafl Namaaz padhkar aur Tilawaat e Qur’an karke, Zikr o Durood padhkar aur Roza rakhkar aur Khairaat karke Imaame Husain aur Shohada e Karbala aur Ahle bait radiy-Allāhu ta’ala anhuma ko Isaale ṡawaab karen.
Aur Meelaad ki mehfil me samil hokar in Hazraat ke fazaa’il sunkar un ke dars par amal karne ki koshish karen aur Sunnat e Rasool ko apnayen.
Aur ALLĀH ta’ala se un ke waseele se dua karen aur foyuz o barkaat hasil karen.

▪▪► Aur Taaziyadaari aur Tamaam buri bid’ato aur khuraafaat se hamesha bachen aur dusro ko bhi in se bachne ke liye kahen.

Aur jo waqt aur maal in me zaaya karke fuzulkharchi karte hain use sahi ilm e deen sikhne me istemaal karen taake sahi aqeede ke saath sahi amal kar saken.
Namaaz, Tilaawat e Qur’an, Zikr o Durood padhen aur Roza rakhen.
Apne Waalidain aur buzurgo ki khidmat karen.
Saadat e kiraam ki khidmat karen.
Zyada se zyada khiraat karen.
Ghareebo aur mohtaajo aur beemaaro ko imdaad karen.
Taalibaan e ilm ko imdaad karen.

**************
Chand shara’it ki paabandi ke saath Taaziyadaari jaa’iz hai :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Taaziya sirf Imaame Husain radiy-Allāhu ta’ala anhu ke Karbala maujood mazaar (dargaah) ke mutaabiq naqsha hona chaahiye.
Magar Taaziya me Turbat banaana na-jaa’iz hai. Isi tarah Taaziya ke andar ya us ke saath Buraaq ya Duldul ghoda wagairah banaana bhi na-jaa’iz hai.
Aur use sirf Imaame Aali maqaam ki dargaah ka naqsha maana jaaye, Taaziya ko Shabi e Imaam Husain maanna galat hai.

(2) Taaziya ko Imaam Husain samajhkar Taaziya se maangna galat hai.
Haan, sirf Imaam Husain aur Ahle bait aur Shohada ke waseele se ALLĀH ta’ala se dua maangna jaa’iz hai.

(3) Taaziya ko paani me dafn karne be-adabi hai. Balke Taaziya ko sambhaal kar ek maqaam par hifaazat ke saath rakha jaaye.
Log us taaziya ke ziyarat karke Imaame Husain aur Shohada e Karbala ki qurbaaniyo ko yaad kar saken.
Taaziya ya’ni Roza e Imaame Husain ki ziyarat karte waqt Ba-adab aur Paak saaf hona zaroori hai.
Taaziya chhoone se bachen taake be-adabi na ho, Sirf khade rehkar ziyarat karen.
Aurten ba-parda ziyarat kar sakti hain.

(4) Taaziya ke saath photo ya video banaana na-jaa’iz hai.
Taaziya ki tasweere rakhkar use chumna ya use lobaan ya agarbatti wagairah karna na-jaa’iz hai.

(5) Mehfile Imaam Husain munaaqid karke Zikre Imaam Husain wa Shohada karna ba-barkat hai.
Juloose Imaame Husain me ba-adab Hamd, Na’at, Manqabat aur Salaat o Salaam padhna jaa’iz hai.
Magar is juloos me Taaziya ko saath lekar ghumaana jaa’iz nahi. Sirf mard baghair taaziya ke zikr karte hue nikle.
Juloos me Maatam, Noha, Chokaara, Naachna, Gaana bajaana, Khel kartab dikhaana ye sab galat aur na-jaa’iz hai.
Aurto ka juloos me ka saamil hona na-jaa’iz hai. Aurten sirf ghar me rehkar juloos me jo Na’at, Manqabat wagairah padha jaaye wo sune.

(6) Isaale ṡawaab ke liye Shabeel banaana, Niyaaz khilaana, Paani aur sharbat pilaana jaa’iz hai.

*************
▪▪► Kuchh sunni sahi ilm e deen na hone ki wajah se sahi amal nahi karte aur khilaaf e shariat amal karte hain.
Hume un ko sahi baat narmi ke saath samajhani hai.

Lekin un nadaan sunniyo ki wajah se koi Imaam e Ahle sunnat aur Maslak e Aala Hazrat ko galat nahi keh sakta.

Aur ye bad-mazhab jo Ahle sunnat wal jama’at ke khilaaf hain
wo bhi sirf aise logo ko dekhte hain jo sunni hone ka dikhaawa karte hain,
Aur phir Maslak e Aala Hazrat ko galat maante hain.

Asl me wo un sunniyo se mile jo shariat e islaam par sahi amal karte hain aur Imaam e Ahle Sunnat ki Kitaaben padhen to
Un ki galat fehmiya door ho jaaye aur unhe pata chale ke Maslak e Aala Hazrat sahi aur behtareen hai aur us me koi baat khilaaf e shariat nahi.

**************
Agar koi sahi ilm na hone ki wajah se sahi baat ko nahi maante to unhe un ke haal par chhod den aur zyada bahes na karen.

Qur’an :
2 Surah al-Baqarah, Aayat 7 :

ALLĀH ne un ke dilo aur kaano par mohar laga di hai aur un ki aankho par parda pad gaya hai aur un ke liye sakht azaab hai.

**************
ALLĀH ta’ala us ke Habeeb sallallāhu alaihi wa sallam ke sadqe me
Sab ko mukammal ishq e Rasool ata farmae aur Sab ko hidaayat ata farmae aur Sab ke Eimaan ki hifaazat farmae aur Sahi ilm e deen haasil karne ki aur Sahi baat samajhne ki taufiq ata farmae aur Sahi nek amal karne ki aur gunaaho aur buri bid’ato aur khuraafaat se bachne ki aur Yaum e Aashura wa Shahaadat sahi tareeqe se manaane ki taufiq ata farmae aur Islaam ka bolbala ata farmae.
Aur in sab baato ko yaad rakhkar amal karne ki aur dusro ko bataane ki taufiq ata farmae.
Aameen.

****************
For more posts Visit :

FikreUmmat.net Updating… .. .

Ahle Bait ka bayaan :

♦ Ahle bait ka Martaba aur fazaa’il :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Aayat e Tat’heer :
Qur’an :
33 Surah al-Ahzaab, Aayat 33 :

إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا

ALLĀH to yehi chaahta hai ke Aye Ahle bait, Tum se har napaaki door kar de aur tumhe paak kar de khub saaf kar de.

›› Rabbul aalameen Ahle bait ko zaahiri aur baatini har tarah ki napaaki se paak saaf karna chaahta hai.

(2) Qur’an :
42 Surah ash-Shoora, Aayat 23 :

قُلْ لَا أَسْأَلُكُمْ عَلَيْهِ أَجْرًا إِلَّا الْمَوَدَّةَ فِي الْقُرْبَىٰ ۗ وَمَنْ يَقْتَرِفْ حَسَنَةً نَزِدْ لَهُ فِيهَا حُسْنًا ۚ إِنَّ اللَّهَ غَفُورٌ شَكُورٌ

Farma do Aye Nabi ki main tum ko Qur’an sunaane ki ujrat nahi maangta, magar sirf mere Aqaraba se mohabbat rakhna.

(3) Hadeeṡ e Saqlain :
Hadeeṡ e Nabawi :

Huzoor Rasool-Allāh sallallāhu alaihi wa sallam ne farmaaya ki :
‘Main tum me 2 bhaari (qeemati) chize chhod raha hu
1. Kitaabullāh (Qur’an shareef) aur 2. Mere Ahle bait.
In dono ko mazbooti se thaame rehna taake tum gumraah na ho.’

(Sahih Muslim, Jild -6, Safa -122;
Tirmizi, Jild -2, Safa -219, Hadeeṡ -3718;
Abu Daawūd;
Nisaai, Khasa’is, Safa 30;
Tibraani, Taarikh-e-Kabeer;
Hakeem, Mustadrak, Jild -3, Safa -109 aur 148;
Zahabi , Talkhis-e-Mustadrak)

(4) Hadeeṡ e Nabawi :

Huzoor Rasool-Allāh sallallāhu alaihi wa sallam ne farmaaya ki :
‘Mere Ahle bait Hazrate Nooh alaihis salaam ki kashti ke maanind hain,
Jo un ke saath ho gaya wo najaat paaya aur jo un se door hua wo doob gaya.’
(Mishkaat)

(5) Hadeeṡ e Nabawi :

Huzoor Rasool-Allāh sallallāhu alaihi wa sallam ne farmaaya ki :
‘Mujh se mohabbat karo ALLĀH ta’ala ki muhabbat ki khaatir aur mere Ahle bait se mohabbat karo mujh se mohabbat rakhte ho is bina par.’

(Tirmizi , Jild -2 , Safa -220)

(6) Hadeeṡ e Nabawi :

Huzoor Rasool-Allāh sallallāhu alaihi wa sallam ne farmaaya ki :
‘Jo mere Ahle bait me kisi ke saath achha sulook karega main roz e Qayaamat us ka sila use ata farmaunga.’

(Kashaf-ul-Khafaa , 2/313;
Kanz-ul-Ummal 12/90, 34182;
Jaam e Sagheer, 2/533)

(7) Hadeeṡ e Nabawi :

Huzoor Rasool-Allāh sallallāhu alaihi wa sallam ne farmaaya ki :
‘4 khushnaseeb aise hain ke main qayaamat ke din un ki shafa’at karunga.
[1] Mere Ahle bait ki ta’azeem wa izzat karne waala,
[2] Un ke liye un ki zaroorat ki cheezen paish karne waala,
[3] Zaroorat ke waqt un ke kaamo ko pura karne waala,
[4] Dil wa zubaan se un ki mohabbat rakhne waala.’

(Kanz-ul-Ummal, Hadeeṡ -34180)

**********

♦ Ahle Bait ya’ni Rasool-Allāh sallallāhu alaihi wa sallam ke ghar (khaandaan) wale.

♦ Ahle bait e Nabi (Noble Family of Holy Prophet) sallallāhu alaihi wa sallam) me saamil afraad :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

(1) Huzoor Rasool-Allāh Muhammad Mustafa sallallāhu alaihi wa sallam ki Azwaaj e mutahharaat aur Aap ki Aulaad e amjaad radiy-Allāhu ta’ala anhuma,
(Noble Wives & Children of Holy Prophet sallallāhu alaihi wa sallam) :
›› Azwaaj e mutahharaat :
Hazrat Khadeejah bint Khuwaylid radiy-Allāhu ta’ala anha,
Hazrat Sawdah bint Zam’ah radiy-Allāhu ta’ala anha,
Hazrat Aa’isha bint Abu Bakr Siddeeq radiy-Allāhu ta’ala anha,
Hazrat Hafsa bint Umar Faarooq radiy-Allāhu ta’ala anha,
Hazrat Umm-ul-Masaakin, Zainab bint Khuzayma radiy-Allāhu ta’ala anha,
Hazrat Umme Salama, Hind bint Abu Umayya Sohail radiy-Allāhu ta’ala anha,
Hazrat Zainab bint Hajash radiy-Allāhu ta’ala anha,
Hazrat Juwairiya bint Haariṡ radiy-Allāhu ta’ala anha,
Hazrat Umme Habeeba Ramlah bint Abi Sufyaan Sakhr radiy-Allāhu ta’ala anha,
Hazrat Safiya bint Huyaee radiy-Allāhu ta’ala anha,
Hazrat Maymuna bint Haariṡ Aamariya radiy-Allāhu ta’ala anha,

›› Saahabzaade :
Haaris radiy-Allāhu ta’ala anha,
Hazrat (Umme Habeeba) Ramlah bint Abi Sufyaan radiy-Allāhu ta’ala anha,
Hazrat Safiya bint Huyaee radHazrat Qaasim, Abdullāh wa, Ibrāheem radiy-Allāhu ta’ala anhuma.
›› Saahabzaadiya :
Hazrat Zainab, Ruqayya, Umm Kulṡoom, wa Faatima Zahra radiy-Allāhu ta’ala anha.

(2) Abu Taalib Imraan ibne Abdul Muttalib ki aulaad
ya’ni Hazrate Ali, Ja’afar wa Aqeel ibne Abu Taalib aur Umme Haani Faakhitah, Jumaanah, Rayta [Asmaa] binte Abu Taalib radiy-Allāhu ta’ala anhuma;
(3) Hazrate Hamza ibne Abdul Muttalib radiy-Allāhu ta’ala anhu aur un ki aulaad;
(4) Hazrate Abbaas ibne Abdul Muttalib radiy-Allāhu ta’ala anhu aur un ki aulaad;
(5) Hazrate Haariṡ ibne Abdul Muttalib ki aulaad
ya’ni Hazrate Ubaida, Abu Sufyaan Mugheerah, Naufal, Abdullāh, wa Rabia ibne Haariṡ aur Arwa binte Haariṡ radiy-Allāhu ta’ala anhuma;
(6) Hazrate Utbah wa Muattab bin Abu Lahab aur Durrah [Fakhitah] binte Abu Lahab radiy-Allāhu ta’ala anhuma.

›› Huzoor Rasool-Allāh Muhammad Mustafa sallallāhu alaihi wa sallam ke chacha me se Hazrate Hamza aur Hazrate Abbaas radiy-Allāhu ta’ala anhuma ne eimaan ka izhaar kiya tha aur aap ki phuphi me se Hazrate Ateeqa aur Safiya radiy-Allāhu ta’ala anha eimaan laai thi.

♦ Ahle bait ke 3 darje (hisse) hain :
(1) Saakani (Residing) – Huzoor Rasool-Allāh Muhammad sallallāhu alaihi wa sallam ki Azwaaj e mutahhiraat aur Aap ki Aulaad e amjaad radiy-Allāhu ta’ala anhuma;
(2) Nasabi (Successor) – Hazrate Ali al-Murtaza & Hazrate Faatima radiy-Allāhu ta’ala anhuma aur un ki aulaad (nasl);
(3) E’azaazi (Honoured) – Ahle bait ke baaqi afraad.

♦ Huzoor Muhammad Mustafa sallallāhu alaihi wa sallam ke saath Hazrate Ali, Sayyeda Faatima, Imaam e Hasan aur Imaam e Husain Radiy-Allāhu ta’ala anhuma ‘Panjatan’ me saamil hain.

♦ Hazrate Ali al-Murtaza radiy-Allāhu ta’ala anhu aur Sayyeda Faatima radiy-Allāhu ta’ala anha ki aulaad ya’ni Imaame Hasan aur Imaame Husain radiy-Allāhu ta’ala anhuma ko ‘Aale Rasool’ ka martaba mila hai aur Un ki aulaad ko ‘Saadaat’ ka kaha jaata hai.

Hazrat Imaam Hasan al-Mujtaba radiy-Allāhu ta’ala anhu ki nasl Hazrat Imaam Hasan al-Musanna aur Hazrat Zaid rahmatullāhi alaihi se jaari hai.
Aur Hazrat Imaam Husain radiy-Allāhu ta’ala anhu ki nasl Hazrat Imaam Ali al-Awsat Zain-ul-Aabideen rahmatullāhi alaihi se jaari hai.

♦ Hazrat Ali ki dusri biwiyo ke saahabzaade aur un ki aulaad (nasl) ‘Awaan’ kehlaate hain.
In me Hazrat Abbaas, Hazrat Mohammad bin Hanafiya, aur Hazrat Umar al-Atraf rahmatullāhi alaihi ki aulaad saamil hain.

♦ Hazrat Imaam Hasan al-Mujtaba radiy-Allāhu ta’ala anhu Hazrate Ismāeel bin Hazrate Ibrāheem alaihis salaam ki miṡl hain aur Hazrat Imaam Husain radiy-Allāhu ta’ala anhu Hazrate Is’hāq alaihis salaam ki miṡl hain.
Hazrate Ismāeel bin Hazrate Ibrāheem alaihis salaam ki nasl me Sayyed-ul-Ambiya Sarware kaa’inaat Huzoor Mohammad Mustafa sallallāhu alaihi wa sallam tashreef laaye aur Hazrat Imaam Hasan al-Mujtaba radiy-Allāhu ta’ala anhu ki nasl me Sayyed-ul-Auliya Hazrate Mohiy-ud-deen Abdul Qaadir Jeelaani tashreef laaye.
Hazrate Is’hāq alaihis salaam ki nasl me Bani Isrāeel me 70000 Ambiya e kiraam tashreef laaye aur Hazrat Imaam Husain radiy-Allāhu ta’ala anhuki nasl me Aa’imma e Ahle bait tashreef laaye.

***********
Ahle bait se muta’alliq chand khaas baaten :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Azwaaj e mutahhiraat (Huzoor Rasool-Allāh sallallāhu alaihi wa sallam ki biwiya) Ummahaatul mo’mineen hain ya’ni Tamaam ummatiyo ki maan.

Qur’an :
33 Surah al-Ahzaab, Aayat 6 :
Aur aap ki azwaaj e mutahharrat un [mo’mino] ki maaen hain.

(2) Hadees e Nabawi :

Hazrate Ali radiy-Allāhu ta’ala anhu se riwaayat hai ki
Huzoor Rasool-Allāh sallallāhu alaihi wa sallam ne farmaaya
‘(Jis tarah) Apne zamaane ki behtareen aurat Maryam hain aur apne zamaane ki behtareen aurat Khadeeja hain.’

(Bukhari, 3/1388, Hadeeṡ -3604;
Muslim, 4/1886, Hadeeṡ -2430;
Ibn Abi Shaibah Fil-Musannaf, 6/390, Hadeeṡ -32289)

(3) Hazrate Ali radiy-Allāhu ta’ala anhu Maula e kaa’inat aur Faatih e Wilaayat aur Wali e Awwal hain.

Hadeeṡ e Nabawi :

Huzoor sallallāhu alaihi wa sallam farmaate hain :
[1] Ali mujh se hai aur Main Ali se hu.
[2] Aye ALLĀH, Tu us ko dost rakh jo Ali se dosti rakhe aur zaleel kar usko jo Ali se dushmani rakhe.
[3] Jis ka main Maula hu, Ali bhi us ka maula hai.
[4] Aye Ali, Tumhara martaba mere darbaar me aisa hai jaisa Hazrate Moosā ke darbaar me Hazrate Hāroon ka, magar mere baad koi Nabi tashreef nahi laayega.
[5] Main ilm ka shaher hu aur Ali us ka darwaaza.
[6] Ek martaba Huzoor Nabi e kareem sallallāhu alaihi wa sallam ne apna daste e aqdas apne sine mubarak par rakhkar farmaaya ‘Aye Ali! Tum Haadi ho aur mere baad raah paane waale tum se raah paaynge. Wilaayat ke silsile tum se jaari rahenge aur ummat ke Aulia, Ulema aur Ghaus o Aqtaab tum se faiz paaynge.’
[7] Tamaam Nabiyon ki zurriyaat (nasab) un ki sulb me hain aur meri zurriyaat Ali ibne Abu Taalib ki sulb me hai.

(4) Hazrate Sayyeda Faatima Zahra radiy-Allāhu ta’ala anha Khatoon e Jannat aur Sayyedatan Nisa hain ya’ni Tamaam jannati aurto ki Sardaar.

Hadeeṡ e Nabawi :

Huzoor sallallāhu alaihi wa sallam farmaate hain :
ALLĀH ne Faatima aur us ki Aulaad par aag Haraam kar di hai.

(Tirmizi;
Abu Naeem)

(5) Hazrate Imaam e Hasan aur Imaam e Husain radiy-Allāhu ta’ala anhuma Sayyed ush Shababi Ahlil Jannah hain ya’ni Tamaam jannati nau-jawaano ke Sardaar.

Hadeeṡ e Nabawi :

[1] Ye mere bete (Hasan aur Husain) musalmano ke Imaam hain, chaahe wo baithe ho ya khade ho.

[2] Mere tamaam Ahle bait me se Hasan aur Husain se main sab se zyada mohabbat karta hu.

[3] Jis ne Hasan aur Husain se mohabbat ki us ne mujh se mohabbat ki aur jis ne Hasan aur Husain se bughz rakha us ne mujh hi se bughz rakha.

(Sunan Ibne Maajah)

[4] Aye ALLĀH! Main Hasan se muhabbat karta hu, tu us se mohabbat rakh aur jo us se mohabbat rakhe us se tu muhabbat rakh.

(Sahih Bukhari, Hadeeṡ –2122, 5884;
Sahih Muslim, Baab -08, Hadeeṡ –6206;
Ibne Maajah, Hadeeṡ –142)

[5] Husain mujh se hai aur Main Husain se hu.

[6] Ek Din Sayyeda Faatima Zahra Radiy-Allāhu ta’aala anha apne dono shehzaade Hazrate Hasan wa Husain radi-Allāhu ta’ala anhuma ko Leker Huzoor sallallāhu alaihi wa sallam ki baargaah me haazir hui aur arz kiya ki ‘Ya Rasool-Allāh sallallāhu alaihi wa sallam, In dono ko kucha ata farmaiye.’
Huzoor sallallāhu alaihi wa sallam ne farmaya ‘Theek hai. Hasan ko maine Ilm wa Haibat ata kiya aur Husain ko apni Shuja’at wa Karam baksha.’

(Ibne Asaakir, Alal-Amn-wal-Ula, Safa-99)

(6) Hazrate Ameer Hamza ibne Abdul Muttalib radiy-Allāhu ta’ala anhu Sayyed ush Shohada hain ya’ni Tamaam Shaheedo ke Sardaar.

Hadeeṡ e Nabawi :
Jin ki dua qubool hone me der hoti ho unhe chaahiye ke Hazrate Hamza ke waseele se dua karen.

(7) Hazrate Abbaas ibne Abdul Muttalib radiy-Allāhu ta’ala anhu ke waseele se Khalifa aur Ameer-ul-mo’mineen Hazrate Umar Faarooq radiy-Allāhu ta’ala anhu dua maangte to baarish hoti.

(8) Hazrat Anas Radiy-Allāhu ta’ala anhu bayaan karte hain ke Maine Huzoor Rasool-Allāh sallallāhu alaihi wa sallam ko farmaate hue suna hai ki
‘Hum Abdul Muttalib ibn Haashim ki aulaad Ahle Jannat ke Sardaar honge ya’ni Main, Hamza, Ali, Ja’afar, Hasan, Husain Aur Mahadi (radiy-Allāhu ta’ala anhuma).’

(Ibne Maajah, 2/1368, Hadeeṡ -4087;
Al-Minhaaj-us-Sawi, Safa -638, Hadeeṡ -716)

(9) Jung e Badr me kaafiro ne muqabale ke liye ahle Quraish ko bhejne ke liye kaha tab Huzoor Rasool-Allāh sallallāhu alaihi wa sallam ne Hazrate Hamza ibne Abdul Muttalib, Hazrate Ali ibne Abu Taalib aur Hazrate Ubaida ibne Haaris Radiy-Allāhu ta’ala anhuma ko bheja tha.

(10) 10 Hijri me Fateh Makka ke baad Yemen ke Najraan qabeele ke Nasraaniyo (Eisaai) ko Islaam apnaane ka paighaam bheja gaya aur unho ne Huzoor Rasool-Allāh sallallāhu alaihi wa sallam ke saath mubaahila karne ka iraade se chand logo ko Madeena bheje tab Aayat e Mubaahila ke zariye hukm e ilāhi ke baad Huzoor Rasool-Allāh sallallāhu alaihi wa sallam apne saath Hazrat Ali, Sayyeda Faatima, Hazrat Hasan aur Hazrat Husain radiy-Allāhu ta’ala anhuma ko lekar tashreef le gaye. In hazraat ke nooraani chehre dekhkar Nasraaniyo khauf ki wajah se mubaahila karna mauqoof rakha aur ‘Jaziya’ dena muqarrar karke waapas laut gaye.

***********
Mas’ala :
(1) Ye martaba in Hazraat ko nisbat e Rasool-Allāh ki wajah se mila hai.
Kisi bhi Imaam ya Wali ko ye martaba haasil nahi.

(2) Ahle bait ko Zakaat ya Sadqa dena mana hai. Unhe sirf Hadiya de sakte hain.

***********
Ahle bait ke foyuz o barkaat haasil karne ke 9 Tareeqe hain :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

(1) Bai’at – Peer e tareeqat ka mureed hona.

(2) Ta’azeem – Ahle bait aur un se nisbat rakhne waali har cheez ki ta’azeem wa ehtaraam karna.

(3) Sohbat wa khidmat – Ahle bait ki sohbat me rehna ya un ki mehfil me jaana ya un ki khidmat karte rehna aur un ko Nazraana e aqeedat paish karte rehna.

(4) Ita’at – Ahle bait ki ita’at karna aur un ke farmaan par amal karna.

(5) Itteba (Pairwi) – Ahle bait ke Aa’imma wa akaabir ke dars e amal (Qaul o fail) par amal karna.

(6) Tawassul wa Istegaasah – Ahle bait ke waseele se ALLĀH ta’ala se dua karna.

(7) Madah wa Zikr – Apni guftagu me, bayaan me ya manqabat me Ahle bait ke fazaail wa martaba, sirat wa amal, zindagi aur karaamat wagairah ka tazkira karna.

(8) Isaal e ṡawaab – Koi bhi nek kaam karke ya’ni Namaaz, Tilaawat e Qura’n, Zikr o Durood, Roza, Sadqa-Khiraat, Hajj ya Umrah, Tawaaf e Ka’aba, Qurbaani, Nyaaz karke un ko isaal e ṡawaab karna.

(9) Ziyarat – Ahle bait ke mazaar par haazir hona.

***********
Ahle bait se mohabbat ka izhaar karne ke aur un ke foyuz o barkaat haasil karne ke sirf yehi tareeqe hain aur is ke ilaawa kisi bhi naye tareeqe ko sahi maanne waala na-daan hai.
Bad-mazhabo ke galat tareeqe par amal karna ya’ni Moharram me ya Ahle bait ke afraad ke yaum e wisaal ya urs ke mauqe par Maatam, Chokaara, Naachna gaana bajaana, Khel tamaasha ko Ahle bait se mohabbat ki nishaani maanna ye sab naadaani hai.
Aur in sab ko sahi saabit karne ke liye galat daleelen pesh karna ye waqt aur mahenat ko zaaya karna hai.

***********
ALLĀH ta’ala us ke Habeeb sallallāhu alaihi wa sallam ke sadqe me
Sab ko mukammal ishq e Rasool ata farmae aur Sab ke Eimaan ki hifaazat farmae.
Aur Sab ko Ahle bait ki sachi mohabbat ata farmae aur un ki Ta’azeem karne ki aur un ko haajat me imdaad karne ki taufiq ata farmae.
Aur Ahle bait ke waseele se Sab ko un ki pairwi karne ki aur nek amal karne ki taufiq ata farmae.
Aur ye sab baaten yaad rakhne ki aur dusro ko bataane ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.

****************
For more posts Visit :

FikreUmmat.net Updating… .. .