Hazrat Abu Bakr Siddeeq radiy-Allāhu ta’ala anhu

Hazrat Abu Bakr Siddeeq radiy-Allāhu ta’ala anhu :

Alqaab :
‾‾‾‾‾‾‾‾
Siddeeq e akbar, Ateeq, Afzal-un-naas ba’adal Ambiya, Yaar e gaar e nabi, Saani e isnain fil ghaar, Khalifatul Rasool-Allāh, Saalaar e sahaaba.

*************
Aap ki wilaadat 573 A.D. me Makka me hui.

Aap ka asl naam Abdullāh hai.

Aap ke waalid ka naam Hazrat Abu Quhaafa Usmaan ibn Aamir radiy-Allāhu ta’ala anhu aur waalida ka naam Ummul Khair Salma bint Sakhar hai.

Aap Quraish ke Banu Taym qabeele se ta’alluq rakhte hain.

*************
Aap jab bache the tab ek baar aap ke waalid aap ko Ka’aba me le gaye aur buto ki ibaadat ke liye kaha. Jab aap ke waalid kisi kaam se bahar gaye to aap ne ek but ke saamne khade hokar kaha ‘Aye but! mujhe achhe kapde chaahiye. Kya tum de sakte ho?’ But me se koi jawaab na mila. Phir aap ne dusre but ke saamne khade hokar kaha ‘Aye but! Mujhe achha khaana chaahiye. Kya tum de sakte ho?’ But me se koi jawaab na mila. Aap ne gusse me aakar ek patthar uthakar kaha ‘Ab main tumhe patthar maarne waala hu. Agar tum khuda ho to khud ko bacha lo.’ Ye kehkar aap ne but ko patthar maara aur waha se nikal gaye.
Is ke baad aap kabhi kisi but ki ibaadat ke liye nahi gaye.

*************
Makka me Aap Mohalla Misfalah me sukoonat pazeer the.

591 A.D. me 18 baras ki umr me Aap ne apna khaandaani kapdo ka kaarobaar samhala aur Yemen, Shaam aur dusre mulko me qaafile ke saath safar karne lage. Is tarah Aap ne tajurba aur maal o daulat haasil kiya.

Aap apne amaanatdaari aur husn e akhlaaq ke sabab mash’hoor the. Sardaarane Quraish mukhtalif umoor aur muamalaat me Aap se mashwara kiya karte the.

*************
Aap elaan e nabuwwat se pehle bhi Huzoor sallallāhu alaihi wa sallam ke dost the aur Aap ne Huzoor sallallāhu alaihi wa sallam ke saath qaafile me safar kiya tha aur Aap Huzoor sallallāhu alaihi wa sallam ki sadaaqat aur amaanatdaari se waaqif the.

Jab Huzoor sallallāhu alaihi wa sallam ka nikaah Hazrate Khadeejatul kubra radiy-Allāhu ta’ala anh ke saath hua us me bhi Aap saamil hue.

Ek marataba Hazrate Abu Bakr radiy-Allāhu ta’ala anhu tijaarat ke liye mulk e Shaam gaye tab ek raat aap ne khwaab me dekha ke ek noor utra aur aap ke daaman me sama gaya. Jab aap ki aankh khuli to aap ne logo ko is ajeeb khwaab ke baare me bataakar un se is ki taabeer puchhi.
Buhaira naami raahib ne aap se puchha ‘Tum kaha se aaye ho?’ Aap ne use bataaya ‘Main Makka se aaya hu.’ Us ne puchha ‘Kaun se qabeele se ho?’ Aap ne kaha ‘Quraish se.’ Us ne puchha ‘Kya karte ho?’ Aap ne kaha ‘Taajir hu.’
To us raahib ne kaha ‘Humari kitaab me ye bayaan hai ke Ahmad naam ke ALLĀH ke Nabi Makka me zaahir honge. Shaayad ye is baat ki taraf ishaara hai. Aur tum un ke wazeer aur un ke baad un ke khalifa banoge.’
Is ke baad Aap Makka waapas aaye.

610 A.D. me Huzoor Rasool-Allāh sallallāhu alaihi wa sallam ne Makka me ALLĀH ke hukm se elaan e nabuwwat kiya hai tab aap Yemen me the. Makka waapas aane par jab aap ko pata chala to aap Huzoore akram sallallāhu alaihi wa sallam ki baargaah me gaye aur puchha ‘Kya aap ne elaan e nabuwwat kiya hai?’ Huzoor sallallāhu alaihi wa sallam ne farmaaya ke ‘Us raahib ne tumhe jo bataaya wo sach hai.’
Hazrate Abu Bakr radiy-Allāhu ta’ala anhu jaante the ke unho ne Makka me ye baat kisi ko nahi bataai thi. Is liye ye sunkar aap foran kalma padhkar musalman ho gaye.

Is tarah Aap mardo me sab se pehle eimaan laaye aur saabiqeen me saamil hue.

Aap ki biwi Qutaylah bint Abdul Uzza eimaan na laai to aap ne use talaq de diya.
Aur apne bete Abdur Rahmān ko bhi isi wajah se chhod diya.

3 saal baad jab musalmano ki ta’adaad 38 hui aur Huzoor sallallāhu alaihi wa sallam ne Islaam ki daawat ko zaahir aur aam karna shuru kiya tab sab se pehle aap ne Huzoor sallallāhu alaihi wa sallam ki taraf se logo ko jama karke Islaam ki daawat di. Ye sunkar Quraish ke kuchh naujawaano ne aap par hamla karke aap ko jakhmi kar diya.

Is ke baad aap ki waalida bhi musalman ho gai.

*************
Aap ki daawat aur mashware se bahot saare log Islaam me daakhil hue,
Jin me Hazrat Usmaan Ghani bin Affaan, Zubair ibn Awwaam, Talha ibn Ubaidullāh, Abdur Rahmān bin Awf, Sa’ad ibn Abi Waqqaas, Abu Ubaidah ibn Jarrah, Abu Salama Abdullāh bin Abdul Asad, Khaalid ibn Sa’eed, Abu Huzaifa ibn Mughirah aur Arqaam bin Abil Arqaam radiy-Allāhu ta’ala anhuma mash’hoor hain.

Aap ne 8 ghulaamo ko aazaad karaaya jo musalman ho gaye the.
Jin me mardo me Hazrate Bilaal Habashi ibn Ribah, Ammaar ibn Yaasir, Abu Fakih aur Abu Fuhaira aur aurto me Lubainah, Nahdiah, Umme Ubais, Harisah bint Muammil saamil hain.
Is ke liye aap ne 40,000 deenaar kharch kiye. Aap ke waalid ne kaha ‘Tum budhe aur kamzor ghulamo ko aazaad karate ho jis se hame koi faa’ida nahi hoga.’ Aap ne farmaaya ‘Main to ALLĀH ki raza ke liye musalmano ko aazaad karaata hu.’

*************
Ek din Huzoor sallallāhu alaihi wa sallam Hateem e Ka’aba me namaaz padh rahe the ki Uqba bin Muyeet ne Huzoor sallallāhu alaihi wa sallam ki gardan me kapda daal kar itni zor se khincha ki aap sallallāhu alaihi wa sallam ka gala (dam) ghutne laga. Itne me Hazrat Abu Bakr Siddeeq waha pahunche to aap ne foran Uqba ko dhakka maara aur Qur’an majeed ki yeh aayat tilaawat ki : ‘Kya tum ek shakhsh ko is baat par qatl karte ho ki woh kehta hai ki mera Rab sirf ALLĀH hai, Aur apni nabuwwat aur risaalat ki khuli nishaaniya tumhare paas tumhare Rab ki taraf se lekar aaya hai.’

*************
Jab Ahle Makka ke zulm badhne lage 6 Nabawi (615 A.D.) me Huzoor sallallāhu alaihi wa sallam ki ijaazat se aap hijrat karke Habasha (Abyssinia) gaye.
8 Nabawi (617 A.D.) me jab Quraish ne Banu Haashim se tamaam ta’aalluqaat tod diye aur Huzoor sallallāhu alaihi wa sallam ko bahot takleef dene lage aur aap ka baahar aana jaana mushkil ho gaya tab ye sunkar Hazrate Abu Bakr ne waapis Makka aane ke liye iraada kiya. Aap Qara ke sardaar Ibne Daghinna ki madad aur hifaazat se Makka waapas aaye.

*************
12 Nabawi (621 A.D.) me Me’araaj ke baad Huzoor Rasool-Allāh sallallāhu alaihi wa sallam ashaaba ko me’araj ki baaten bayaan farmaai. Kuffaar e Makka ne Hazrate Abu Bakr radiy-Allāhu anhu ko jaakar bataaya aur kaha ke ‘Kya aap is baat ki tasdeeq kar sakte hain jo aap ke dost ne kahi hai ke unho ne raat o raat Masjid e Haraam se Masjid e Aqsa ki sair ki?’ Aap ne farmaaya ‘Kya Huzoor sallallāhu alaihi wa sallam ne waaqai ye bayaan farmaaya hai?’ Unho ne kaha ‘Ji haan.’ Aap ne farmaaya ‘Agar Aap sallallāhu alaihi wa sallam ne ye irshaad farmaaya hai to yaqeenan sach farmaaya hai. Aur main un ki is baat ki bila jhijhak tasdeeq karta hu.’
Phir jab Aap Huzoor sallallāhu alaihi wa sallam ki baargaah me aaye aur qareeb jaakar baithe to Huzoor sallallāhu alaihi wa sallam ne phir se shuru se pura waaqya bayaan karna shuru kiya. Aur Hazrate Abu Bakr radiy-Allāhu anhu har baat par farmaate ‘Sadaqata Ya Rasool-Allāh sallallāhu alaihi wa sallam.’
Huzoor sallallāhu alaihi wa sallam ne khush hokar aap ko ‘Siddeeq e akbar’ ka laqab ata farmaaya ya’ni Tamaam Siddeeq me sab se bada.

*************
Ek baar Huzoor sallallāhu alaihi wa sallam ne ashaaba se farmaaya ‘Anqareeb ALLĀH ke hukm se hame Makka se hijarat karni hai.’
Is ke kuchh din baad jab Huzoor Rasool-Allāh sallallāhu alaihi wa sallam hijrat ke liye ALLĀH ta’ala ka hukm hua aur aap Hazrate Abu Bakr Siddeeq radiy-Allāhu anhu ke ghar pahunche aur abhi aap ne darwaaze par ek hi baar halki si dastak di ke Siddeeq e akbar ne foran darwaaza khol diya.
Aap ne farmaaya ‘Abu Bakr! Hume hijrat ka hukm mila hai. Kya tum hijrat ke liye tayyaar ho?’
Siddeeq e akbar ne farmaaya ‘Ya Rasool-Allāh sallallāhu alaihi wa sallam, Maine to tab se tayyaari kar li hai jab aap ne hijrat ke liye farmaaya tha. Aur roz raat ko main jaagta rehta tha ke agar hijrat ke liye nikalna ho to mere aaqa ko der na ho.’
Aap ne ye sochkar ke shaayad zaroorat paish aaye apna maal bhi saath me liya jis ki miqdaar 5000 dirham thi.

Hijrat ke liye Makka se nikalne ke baad kuchh door jaane par ek shakhs mila jo Huzoor sallallāhu alaihi wa sallam ko nahi pehchaanta tha. Us ne puchha ‘Aye Abu Bakr, Tumhare saath ye kaun hai?’
Siddeeq e akbar ne socha ke agar main Huzoor sallallāhu alaihi wa sallam ke baare me ise ko bata dunga to shaayad ye shakhs mere aaqa ko nuqsaan pahunchaaye.
Aap ne us se kaha ke ‘Ye mujhe sahi raasta bataane waala (rehnuma) hai.’
Ye sunkar wo shakhs chala gaya.

Phir aap Huzoor sallallāhu alaihi wa sallam ke saath chalne lage. Aap kabhi Huzoor sallallāhu alaihi wa sallam ki daahini taraf ho jaate, kabhi baanyi taraf, kabhi aage, kabhi pichhe chalte ke kisi bhi taraf se koi dushman Huzoor sallallāhu alaihi wa sallam ko nuqsaan na pahuncha sake.

Phir raaste me Huzoor sallallāhu alaihi wa sallam ne Ghaar e Ṡaur me theharne ka iraada kiya. Hazrate Abu Bakr Siddeeq ne kaha ‘Ya Rasool-Allāh sallallāhu alaihi wa sallam! Is pahaad par chadhte waqt kankar –patthar se aap ko takleef ho sakti hai. Aap ijaazat den to aap mere kandho par baith jaayen. Main aap ko lekar upar chadhunga.’
Is tarah aap Huzoor sallallāhu alaihi wa sallam ko apne kandho par bithakar upar chadhne lage. Raaste me aap kabhi Huzoor sallallāhu alaihi wa sallam ke daahine paanv ko chumte, kabhi baayen paav ko chumte.
Huzoor sallallāhu alaihi wa sallam ne puchha ‘Abu Bakr! Kya kar rahe ho?’
Aap ne farmaaya ‘Ya Rasool-Allāh sallallāhu alaihi wa sallam! Main me’araaj kar raha hu. Aap ki me’araaj ye hai ke aap Rab ta’ala ke paas la-makaan tak pahunche aur Abu Bakr ki me’araaj ye hai ke wo aap ke qadmo tak pahuncha.’

Phir Ghaar e Ṡaur me pahunche to ALLĀH ta’ala ke hukm se ek makdi ne gaar ke darwaaze par jaal bana diya aur ek kabootari ne gaar ke baahar ande diye. Kuffaar aap ka pichha karte hue waha pahunche to ye sab dekhkar ye socha ke agar koi andar gaya hota ye ande aur jaal yaha na hote aur waapas chale gaye.

Hazrate Siddeeq e akbar ne ghaar ko saaf kiya aur dekha ke ghaar ki deewaro me bahut saare suraakh hain. Aap ne apna jhubba phadkar un suraakho ko band kar diye ke koi jaanwar aakar mere aaqa ko nuqsaan na pahunchaye. Magar ek suraakh baaqi reh gaya. Aap ne Huzoor sallallāhu alaihi wa sallam se kaha ‘Aap aaraam farma len.’ Aur jab Huzoor sallallāhu alaihi wa sallam letkar aap ki god me aaraam karne lage to aap ne us suraakh par apna paav (edi) rakh diya.
Thodi der me ek azdaha ne aakar aap ke paanv par kaata. Aap ne dard aur takleef bardaasht kar liya ke mere aaqa ko khalel na ho. Magar baar baar kaatne par aakhir me aap ki aankh se be-ikhiyaar aansoo nikal gaye. Huzoor sallallāhu alaihi wa sallam ke chehra e anwar par jab aansoo gire to aap ne farmaaya ‘Abu Bakr! Kya baat hai?’
Aap ne saari baat batai to Huzoor sallallāhu alaihi wa sallam ne aap ko pair hataane ke liye farmaaya.
Pair hataate hi surakh se azdaha baahar aaya aur salaam pesh kiya aur kehne laga ‘Ya Rasool-Allāh sallallāhu alaihi wa sallam! Main ek zamaane se aap ke deedaar ke liye gaar me rehta tha aur maine hi bahar aane ke liye ye sab suraakh banaaye the. Magar aap ke saathi ne ye sab suraakh band kar diye aur ek suraakh par apna paanv rakh diya to majbooran mujhe aap ke dost ko kaatna pada.’
Huzoor sallallāhu alaihi wa sallam ne Siddeeq e akbar ke jakhm par apna luaabe dahen lagaya aur aap ko foran aaraam ho gaya.
Hazrat Abu Bakr Siddeeq ke saahabzaade Abdullāh rozaana raat ko Ghaar ke munh par sote aur subah hote hi Makka chale jaate aur pata lagaate ki Quraish kya tadbeere kar rahe hain. Jo kuchh khabar milti shaam ko aakar Huzoor sallallāhu alaihi wa sallam se arz kar dete.
Hazrate Abu Bakr Siddeeq ke ghulaam Hazrate Aamir bin Fuhera der raat ko chaaragaah se bakariya lekar ghaar ke paas aa jaate aur un bakariyo ka doodh Huzoor sallallāhu alaihi wa sallam aur un ke Rafeeq e khaas pee lete the.

Is tarah 3 raat tak ghaar me qayaam farmaane ke baad Huzoor sallallāhu alaihi wa sallam ne waapas Madeena ke safar shuru kiya aur dono Yaṡrib (Madeena munawwara) pahunche.

Is tarah Aap ‘Saani e iṡnain fil ghaar’ kehlaate hain. (Is ka zikr Qur’an majeed me Surah al-Tauba Aayat no. 9 me hai.)

Is tarah 13 Nabawi (622 A.D.) me Aap ne Huzoor sallallāhu alaihi wa sallam ke saath Makka se Madeena hijrat ki.

*************
Hijrat ke baad aap dusre ashaaba ke saath Masjid e Nabawi ki taameer ka kaam karte rahe.

****************
Madeena munawwara me Aap ke 2 Ghar the. Ek Masjid e Nabawi shareef se muttasil tha, jis ki khidki Masjid e Nabawi ke andar khulti thi aur usi khidki ke muta’alliq Huzoor sallallāhu alaihi wa sallam ne apne aakhri daur me irshaad farmaaya ke ‘Abu Bakr ki khidki ke siwa tamaam khidkiya band kar do.’

Dusra ghar Maqaam e Sunh me tha. Aap yaha ibaadat kiya karte the. Huzoor sallallāhu alaihi wa sallam ke wisaal e zaahiri ke waqt Aap usi ghar se kaashana e Nabuwwat me haazir hue the.

*************
2 Hijri me Huzoor sallallāhu alaihi wa sallam ke saath Aap ki beti Hazrate Aa’isha ka nikaah hua.

*************
Aap ke baare me Huzoor pyare Aaqa sallallāhu alaihi wa sallam farmaaya hai ki
(1) Siwa e Ambiya ke kisi dusre aise aadami par aaftaab tulu aur ghuroob nahi hua jo Abu Bakr se Afzal ho.

(2) Agar Abu Bakr ka Eimaan meri tamaam ummat ke Eimaan ke saath wazan me kiya jaaye to Abu bakr ka Eimaan ghaalib aaye.

(3) Abu Bakr ka ye martaba sirf us ki ibaadat ki wajah se nahi hai, balke ALLĀH ta’ala ne uske dil me jo khaas rakha hai us ki wajah se hai.

(4) Sab se zyada mujh par Abu Bakr ke ehsaan hain, maal ka bhi aur hum-nasheeni (sohbat) ka bhi. Us ne Islaam ke liye apni jaan aur maal bhi qurbaan kiye hain aur apni beti mere nikaah me di hai aur Abu Bakr ne Bilaal al-Habashi ko aazaad karaaya hai.’

(5) Kisi shakhs ke maal ne mujhe itna faa’ida nahi diya jitna faa’ida mujhe Abu Bakr ke maal ne diya hai.

(Islaam qubool karne ke baad se lekar Hijrat tak aap ne Islaam ki madad ke liye 35000 dirham kharch kar diye aur 5000 dirham hijrat ke waqt saath liye.)

(6) Abu Bakr ki mohabbat aur un ka shukr meri tamaam ummat par waajib hai.
(Ibne Asaakir)

(7) Meri ummat me sab se zyada raham dil Abu Bakr Siddeeq hai.

*************
Aap Ashra e mubashara me se hain.

(1) Ek baar Huzoor sallallāhu alaihi wa sallam ne aap se farmaaya ‘Abu Bakr! Jannat me daakhil hone waalo me tum sab se pehle rahoge.’

(2) Huzoor sallallāhu alaihi wa sallam ne aap se farmaaya ‘Abu Bakr! Tum ghaar me bhi mere rafeeq (saathi) the aur jannat me bhi mere bahot qareeb rahoge.’

(3) Huzoor sallallāhu alaihi wa sallam ne aap se farmaaya ‘Anta Ateequm minan naar.’ (Ya’ani ‘Tum Jahannam se aazaad ho.’)

Aur Ek martaba ashaaba se farmaaya ‘Jise dozakh se aazaad shakhs ko dekhna ho wo Abu Bakr ko dekh le.’

*************
Ek baar Huzoor Rasool-Allāh sallallāhu alaihi wa sallam ne farmaaya ‘Jab ALLĀH ta’ala kisi mo’min ke liye bhalaai ka iraada karta hai to us me koi khaslat paida farmata hai jis ke sabab wo jannati ban jaata hai aur aisi 360 khaslaten hain.’
Hazrate Abu Bakr ne puchha ‘Ya Rasool-Allāh sallallāhu alaihi wa sallam! Kya mujh me aisi koi khaslat hai?’
Huzoor sallallāhu alaihi wa sallam ne farmaaya ‘Abu Bakr! Tumhe mubarak ho ke tum me wo tamaam khaslat maujood hai.’

******************
Ek martaba Huzoor Rasool-Allāh sallallāhu alaihi wa sallam ne farmaaya ‘(Qayaamat ke din) Namaaziyo ko Baab-us-Salaat se pukaara jaayega, Mujaahideen ko Baab-ul-Jihaad se, Sadaqaat karne waalo ko Baab-us-Sadqa se, Rozadaaro ko Baab-ss-Siyaam se pukaara jaayega.’
Hazrat Abu Bakr Siddeeq ne arz kiya ‘Ya Rasool-Allah sallallāhu alaihi wa sallam! Kya koi shakhs sab darwaazon se pukaara jaayega?’

Huzoor Rasool-Allāh sallallāhu alaihi wa sallam ne farmaaya ‘Haan! Main ummeed rakhta hu Aye Abu Bakr ke tum un me se ho’.

*************
Ek baar Huzoor Rasool-Allāh sallallāhu alaihi wa sallam ne Siddeeqe akbar ko apni angoothi mubarak di aur farmaya ki ‘Is par LAA ILĀHA ILLALLĀH naqsh karwa ke laao.’
Jab Aap ne wapas aakar angoothi Huzur ki khidmat me pesh ki to us par likha tha ‘LAA ILĀHA ILLALLĀH MOHAMMADUR RASOOL-ALLĀH’ aur us ke saath hi Siddiqe akbar ka naam bhi likha tha.
Huzoor sallallahu alaihi wa sallam ne puchha ‘Abu Bakr! Hum ne to LAA ILĀHA ILLALLAĀH likhwaane ko kaha tha magar tum hamara naam aur apna naam bhi likha laaye.’
Abu Bakr Siddeeq ne arz kiya ‘Ya Rasool-Allāh sallallāhu alaihi wa sallam! Mera dil ko ganwara nahi tha ki Khuda ke naam ke saath aap ka naam na ho. Is liye saath me aap ka naam to maine hi likhwaaya magar mera naam maine hargeez nahi likhwaaya aur mujhe khud ko pata nahi ye kaise aur kis ne saath me likha.’
Itne me Hazrate Jibr’eel Ameen alaihis salaam haazir hue aur arz kiya ‘Ya Rasool-Allah sallallāhu alaihi wa sallam! ALLĀH ta’ala ne farmaya hai ki Siddeeq ko ganwara na tha ke aap ka naam hamare naam se juda kare. Lihaaza Siddeeq ne aap ka naam hamare naam ke saath likhwaaya aur hum ne Siddeeq ka naam aap ke naam ke saath likhwa diya.’

*************
Ek baar Huzoor Rasool-Allāh sallallāhu alaihi wa sallam ne irshaad farmaaya ‘Mujhe 3 cheezen bahot mehboob hain – khushboo, nek biwi aur meri aankho ki thandak namaaz me hai.’
Hazrat Abu Bakr Siddeeq foran bole ‘Aye ALLĀH ke Habeeb sallallāhu alaihi wa sallam! Mujhe bhi 3 cheezen bahot pasand hain –ek aap ke chehra e anwar ko dekhte rehna, dusra Aap par apna maal kharch karna, Teesra ye ki meri beti Aap ke nikaah me hai.’

*************
Jab bhi azaan me aap Huzoor Rasool-Allāh sallallāhu alaihi wa sallam ka naam mubarak sunte to foran mohabbat ke saath durood shareef padhkar dono angoothe ko chumkar apni aankho se lagaate.

*************
Junge Tabuk ke mauqe par Huzoor Rasool-Allāh sallallāhu alaihi wa sallam ne ashaba se farmaaya Islaam ke liye maal jama karne ki zaroorat hai. Aap logo se jitna ho sake utna maal raahe khuda me den.’
Sab ashaaba kuchh maal lekar Huzoor sallallāhu alaihi wa sallam ki baargaah aaye.
Hazrate Umar Farooq apne tamaam maal me se aadha hissa lekar aaye.
Huzoor sallallāhu alaihi wa sallam ne puchha ‘Umar! Gharwalo ke liye kya chhoda hai?’
Unho ne kaha ‘Ya Rasool-Allah sallallāhu alaihi wa sallam, Aadha maal aap ki baargaah me laaya hu aur aadha maal ghar walo ke liye chhodkar aaya hu.’
Itne me Hazrate Abu Bakr aaye aur apna maal rakha.
Huzoor sallallāhu alaihi wa sallam ne puchha ‘Abu Bakr! Ghar walo ke liye chhoda hai?’
Aap ne farmaaya ‘Ghar walo ke liye ALLĀH aur us ke Rasool ko chhodkar aaya hu.’
Ye sunkar Hazrate Umar Faarooq sochne lage ‘Main soch raha tha ke is baar Abu Bakr se aage nikal jaaun, magar is baar bhi Siddeeq e akbar hi aage nikal gaye.’

Itne me Hazrate Jibr’eel alaihis salaam aaye. Huzoor sallallāhu alaihi wa sallam ne un ko dekhkar puchha ‘Aye Jibr’eel! Tum ne ye kaisa libaas pehna hai aur tumhare kurte me ye babool ka kaanta kyun lagaya hai?’
Hazrate Jibr’eel alaihis salaam ne farmaaya ‘Ya Rasool-Allāh sallallāhu alaihi wa sallam! Aap ke Siddeeq e akbar ne apne kurte me babool ka kaanta lagaaya hai. Is liye ALLĀH ta’ala ne sab farishton, Gilman, Hooron ko aisa libaas pehanne ka hukm kiya hai.’

*************
Ek baar Huzoor Rasool-Allāh sallallāhu alaihi wa sallam ne apne ashaaba ko farmaaya ‘Kya main tumhe wo amal na batau jo tumhe Jannat me le jaaye?’
Ashaba ne kaha ke ‘Ya Rasool-Allāh sallallāhu alaihi wa sallam! Aap is amal ke baare me hame zaroor bataiye.’
Aap ne farmaaya ‘Jo shakhs bina ujrat ke masjid me Azaan deta wo jannat me jaayega.’

Ye sunkar Hazrate Abu Bakr Siddeeq radiy-Allāhu ta’ala anhu aage aaye aur farmaya ke ‘Aye ALLĀH ke Habeeb sallallāhu alaihi wa sallam! Ye kaam sab ke liye mumkin nahi kyun ki Hazrate Bilaal radiy-Allāhu ta’ala anhu hi roz har namaaz ke liye Azaan pukarte hain. Aap kuchh aur bhi bataayen.’

Ye sunkar Huzoor sallallāhu alaihi wa sallam ne farmaaya ‘Jo shakhs Imaam ke bilkul pichhe khade hokar namaaz padhta ho wo bhi jannat me jaayega.’
Ye sunkar aap ne kaha ke ‘Aye mere Aaqa! Ye bhi mumkin nahi kyun ke Hazrate Bilaal azaan dene ke baad Iqaamat padhte hain aur wo hi Imaam ke bilkul pichhe namaaz padhte hain. Aap kucha aur bhi bataiye.’

Huzoor sallallāhu alaihi wa sallam ne farmaaya ‘Jo shakhs bina ujrat ke masjid me jhadu lagaye aur safaai kare wo jannat me jaayega.’
Aap ne kaha ‘Aye mere Aaqa! ye amal mumkin hai.’

Is ke baad Hazrate Abu Bakr ne Masjide Nabawi me roz safai karna shuru kar diya. Aap din me 2-3 baar jhadu lagane lage.
Ek baar Hazrate Umar Farooq radiy-Allāhu anhu ne aap ko safai karte dekha to socha ke Kal main fajr ke waqt thoda jaldi aakar masjid me safai kar lunga.

Dusre din Hazrate Umar andhere hi me masjid me daakhil hue aur safai shuru karne ke liye jhadu talaash karne lage. Lekin andhere ki wajah se bahut talaash karne ke baad bhi jhadu na mila.
Itne me aap ke qadmo ki aawaaz se Hazrate Abu Bakr jo waha so rahe the, unki aankh khul gai aur aap ne apne sar ke niche se jhadu nikala aur masjid me safai karna shuru kar diya.
Jhadu lagaane ki aawaaz sunkar Hazrate Umar ne puchha ‘Kaun hai jo masjid me jhadu laga raha hai?
To Hazrate Abu Bakr ne jawaab diya ‘Main Abu Bakr hu.’

Hazrate Umar ne puchha ‘Aap masjid me kab aaye?’
To Hazrate Abu Bakr ne kaha ‘Ye sawaal aap us se puchhe jo raat ko ghar gaya ho. Main to raat bhar masjide nabawi hi me tha.’

Ye sunkar Hazrate Umar jaan gaye ke Hazrate Abu Bakr ko pata chal gaya tha ke mere dil me aaj masjid me safaai karne ka khayaal aaya tha aur isi liye aap puri raat masjid hi me rooke the.

*************
Ek baar Huzoor sallallāhu alaihi wa sallam ne farmaaya ki ‘Tum me se aaj kaun rozadaar hai?’ Hazrate Abu Bakr Siddeeq ne kaha ‘Main.’ Aap sallallāhu alaihi wa sallam ne phir farmaya ki ‘Tum me se aaj kis shakhs ne miskeen ko khaana khilaya?’ Hazrate Abu Bakr Siddeeq ne kaha ‘Maine.’ Aap sallallāhu alaihi wa sallam ne phir farmaaya ki ‘Tum me se kis saakhs ne aaj mareez (beemaar) ki ayaadat ki?’ Hazrate Abu Bakr Siddeeq ne kaha ‘Maine.’ Aap sallallāhu alaihi wa sallam ne farmaya ‘Kisi shakhs me ye awsaaf jama ho woh Jannati hai’.

*************
Ek din Hazrat Ali Radiy-Allāhu ta’ala anhu ne logo se khade hokar farmaaya ‘Tum jaante ho tamaam logon me zyada bahaadur (Shuja) kaun hain?’
Haazireen ne jawaab diya ‘Hazrat Aap.’
Aap ne farmaaya ‘Nahi! Balki sab se zyada Diler wa Bahaadur Abu Bakr Siddeeq radiy-Allāhu ta’ala anhu hain.’
Phir farmaaya ‘Is ka imtihaan yun hua ki jab Jung e Badr pesh aai to ashaaba ne Huzoor sallallāhu alaihi wa sallam ke liye ek chhappar tayyaar kiya. Phir Huzoor sallallāhu alaihi wa sallam ko waha baitha kar guftagu hui ki ‘Huzoor sallallāhu alaihi wa sallm ki Paasbaani aur Hifaazat ke liye kaun shakhs khade rehkar pehra dega taaki mushrikeen me se koi shakhs aap ke paas pahuch na sake.’
Main qasam khakar kehta hu ki us waqt sirf Abu Bakr Siddeeq hi aage badhe aur Huzoor sallallāhu alaihi wa sallam ke sar mubarak par khuli talwaar lekar khade rahe.’

*************
Ek baar Aap ke bete Abdur Rahmān ne aap se kaha ‘Abba jaan! Jung e Badr me main kaafiro ke saath tha aur jang ke dauraan aap meri talwaar ke neeche aa gaye the aur maine aap ko is liye chhod diya ke aap mere waalid hain.’
Aap ne farmaaya ‘Aye mere bete! Agar us waqt tum meri talwaar ke neeche aa gaye hote to main tumhe qatl kar deta kyun ke us waqt tum mere Aaqa sallallāhu alaihi wa sallam ke dushmano ke saath the.’

*************
Ek baar Hazrate Abu Bakr Siddeeq radiy-Allāhu ta’ala anhu muskura rahe the. Hazrate Ali ne wajah puchhi to aap ne farmaaya ‘Aye Ali! Mubarak ho, Mujhse Huzoor sallallāhu alaihi wa sallam ne ye farmaaya hai ki Jab tak Ali Pul siraat se guzarne ka parwaana ata nahi karenge tab tak koi shakhs Pul siraat se guzar nahi sakega.’
Hazrate Ali radiy-Allāhu ta’ala anhu ne farmaaya ‘Aap ko bhi mubarak ho kyun ki Aaqa sallallāhu alaihi wa sallam ne mujh se ye bhi farmaaya hai ki usi shakhs ko Pul siraat se guzarne ka parwaana ata karna jo Siddeeq e akbar se mohabbat karta ho.’

(Nuzhatul Majaalis, Jild -2, Safa -306)

Hazrate Ali radiy-Allāhu ta’ala anhu ne irshaad farmaaya hai ki ‘Meri Mohabbat Aur Abu Bakr o Umar radiy-Allāhu ta’ala anhuma se bughz (dushmani) kisi mo’min ke dil me jama nahi ho sakti.’

*************
Aap ne Jange Badr, Jange Uhad, Jange Banu Nadir, Jange Banu Quraiza, Jange Khaibar, Ghazwa e Khandaq, Fateh Makka, Jange Hunain, Jange Ta’if aur Jange Tabuk me apna maal bhi diya aur saamil bhi hue.

Jange Badr me aap har waqt Huzoor sallallāhu alaihi wa sallam ke bahot qareeb rahe aur bahaaduri ke saath kaafiro se aap ki hifaazat karte rahe.

Huzoor sallallāhu alaihi wa sallam ne 7 Hijri (July 628 A.D.) me aap ki sardaari me islaami lashkar ko kaafiro ke muqaabale ke liye bheja. Najd ke qareeb jung me musalmano ko fateh haasil hui. Kai kaafir mare gaye aur kai qaid kar liye gaye.

Aap Suleh Hudaibiyah ke mauqe par Bai’at al-Ridwaan me bhi saamil hue.

*************
Huzoor Rasool-Allāh sallallāhu alaihi wa sallam ne farmaaya hai ke
‘Mere baad mere jo 2 khalifa hain ya’ni Abu Bakr aur Umar un ki iqteda karo.’

Ek martaba ek aurat Huzoor sallallāhu alaihi wa sallam ki baargaah me kisi mas’ale ka hal daryaft karne ke liye haazir hui. Rukhsat hone se pehle aap ne farmaaya ‘Dobaara jab bhi zaroorat pade to aana.’ To us ne arz ki ‘Ya Rasool-Allāh sallallāhu alaihi wa sallam, Aap agar yaha maujood na ho to kis se daryaaft karu?’ Aap ne farmaaya ‘Agar tu aaye aur main maujood na rahu to Abu Bakr Siddeeq se puchh lena jo mere baad khalifa honge.’

*************
Ek martaba Huzoor ALLĀH ke Habeeb sallallāhu alaihi wa sallam ne irshaad farmaaya ke ‘Maine khwaab me dekha ke mujhe doodh se bhara ek piyaala pesh kiya gaya. Maine us se itna piya ke pet bhar gaya aur mere jism ki tamaam rago me doodh gardish karne laga. Jo bach gaya wo maine Abu Bakr ko de diya.’ Sahaaba e kiraam foran khwaab ki taabir arz karte hue kaha ‘Ya Rasool-Allāh sallallāhu alaihi wa sallam! Doodh se muraad Ilm hoga jo ALLĀH ne Aap ko ataa farmaaya aur Aap ne wo apna bacha hua ilm Siddeeq e akbar ko ataa farma diya.’ Aap sallallāhu alaihi wa sallam ne irshaad farmaaya ‘Tum ne durust kaha.’

*************
9 Hijri me jab Hajj farz hua to Huzoor sallallāhu alaihi wa sallam ne Aap ko Ameer ul Hujjaaj banaakar ashaaba ko aap ke saath hajj ke liye bheja.

*************
10 Hijri me Hajjatul wida ke mauqe par bhi Aap Huzoor sallallāhu alaihi wa sallam ke saath rahe.
Jab yeh aayat naazil hui ‘Aaj ke din hum ne tumhare liye tumhara deen mukammal kar diya aur tumhare liye deen e Islaam pasand kiya.’ To ashaaba khush hue ke ALLĀH ta’ala ne deen e islaam ko mukammal kar diya.
Magar aap ghamzada ho gaye. Jab puchha gaya to farmaaya ke ‘Ye sahi hai ke deen e Islaam ko ALLĀH ta’ala ne mukammal kar diya hai. Magar deen mukammal hone ke baad mumkin hai ke Huzoor sallallāhu alaihi wa sallam anqareeb hum se parda farmayenge. Main ye sochkar ghamzada hu.’

*************
Huzoor sallallāhu alaihi wa sallam jab kahi baahar jaate to Hazrate Abu Bakr ko imaamat ka hukm karte aur sab ashaaba aap ke pichhe namaaz padhte.
Aap ne Huzoor sallallāhu alaihi wa sallam ki hayaat e zaahiri me 17 martaba namaaz me Imaamat farmaai.

Jab Huzoor shadeed beemaar hue aur apne hujre se baahar nikalna mushkil hua to aap ne Siddeeq e akbar ko imaamat ka hukm diya. Aap jaise hi musalle par pahunche to aansoo bahaate hue gir pade aur farmaaya ‘Mujh me itni himmat nahi ke Huzoor sallallāhu alaihi wa sallam ki maujoodgi me imaamat kar sakun.’
Ye sab sunkar Huzoor sallallāhu alaihi wa sallam ashaaba ka sahaara lekar hujre se bahar aaye aur takleef bardaasht karke namaaz padhaai.
Dusre din phir jab aap ko imaamat ka hukm mila aur phir aap tayyaar na ho sake to Huzoor sallallāhu alaihi wa sallam ne hujre se paigaam bheja ke ‘Aye Abu Baqr, Aaj tumhe in ashaaba ki jama’at ki imaamat karni hi hai.’
Phir aap ne dil ko sakht karke namaaz ke liye imaamat ki.
Huzoor sallallāhu alaihi wa sallam ne apne hujre ke darwaaze se Siddeeq e akbar ke saath namaaziyo ki safo ko dekha to aap bahot khush hue.

*************
Huzoor sallallāhu alaihi wa sallam ke wisaal ke baad sab ashaaba ghamzada the aur Hazrate Umar Faarooq radiy-Allāhu ta’ala anhu ne to farma diya tha ke ‘Agar kisi ne mere saamne ye kaha ke Huzoor sallallāhu alaihi wa sallam ka inteqaal ho gaya hai aur Aaqa sallallāhu alaihi wasallam hamare darmiyaan me nahi hain to main talwaar se us ki gardan kaat daalunga.’

Aise maahol me sab khaamosh the tab Hazrate Abu Bakr uthkar aage aaye aur Khutba padhne ke baad ashaaba se farmaaya ‘Agar koi Muhmmad sallallāhu alaihi wa sallam ki ibaadat karta ho to wo maan sakta hai ke Huzoor sallallāhu alaihi wa sallam inteqaal karke chale gaye hain aur jo Rabbe Muhammad ki ibadat karta ho to wo jaan le ke Huzoor sallallāhu alaihi wa sallam ne sirf zaahiri taur par parda kiya hai.’

Huzoor sallallāhu alaihi wa sallam ke parda farmaane ke baad aap Sarkaar ke firaaq me hamesha be-qaraar rehte the.

*************
Huzoor sallallāhu alaihi wa sallam ke wisaal e zaahiri ke baad Hazrate Umar Faarooq ke mashware par aap ko khalifa banaaya gaya.
Aap 13 Rabi’ ul awwal 11 Hijri (8 June 632 A.D.) ko sab se pehle Khalifa hue.
Aap ka daur e khilaafat 2 saal 4 maah ka raha.

*************
Aap ki khilaafat ke ibtadai daur me 2 fitne hue.
(1) Musailimah bin Habeeb aur Tulaiha bin Khuwailid ne nabuwwat ka jhuta dawa kiya.
(2) Kuchh qabeelo ne Zakaat dene se aur islaami qaanoon ko maanne se inkaar kiya.

Hazrate Khaalid bin Waleed ki sardaari me islaami lashkar ne Jang e Buzakha me Tulaiha bin Khuwailid ko haraaya aur Najd me Baaghi Maalik ibn Nuwairah ko qaid karke qatl kiya aur Jang e Yamama me Musaylimah bin Habeeb ko qatl kiya.

Is ke baad Khaalid bin Waleed ki sardaari me islaami lashkar ne Sassani saltanat aur Byzantine (Rom) saltanat par hamla karke fateh haasil karke Faars (Iran), Iraq aur Shaam tak islaami saltanat phailaai.

*************
11 Hijri (632 A.D.) me Jang e Yamaama me taqreeban 1200 musalman shaheed hue un me 70 ashaaba Haafiz e Qur’an the. Hazrate Umar Faarooq radiy-Allāhu anhu ne aap se farmaya ‘Is tarah Haafiz e Qur’an kam hote rahe to Qur’an ki hifaazat karna mushkil hoga. Behtar hai ke ham Qur’an ko jama karke Kitaab bana len.’
Is tarah Hazrate Umar Faarooq ke mashware se Qur’an majeed ko jama karke kitaab banaane ka kaam shuru kiya gaya, jo Hazrate Usmaan Ghani radiy-Allāhu anhu ke zamaane me mukammal hua.

*************
Aap ne Bait-ul-Maal ki shuruat ki.

*************
Aap Huzoor Rasool-Allāh sallallāhu alaihi wa sallam ke tareeqat ke 2 khalifa me se hain.
Aap se ‘Siddeeqi’ silsila jaari hai.
Jis se Tayfuriya, Madaariya, Maghribi, Khwajagaaniya aur Naqshbandi silsile ta’aaluq rakhte hain.

*************
Kaseer ud dua (kasrat se dua karne waale) aur nihaayat hi aajizi karne waale the. Aap se kai makhsoos Duae bhi manqool hain. Aur isi wajah se aap ka laqab ‘Awwaah’ bhi hai.

*************
Aap se 142 ahaadees marwi hain.

*************
Aqwaal :
¯¯¯¯¯¯
(1) Musalman kabhi kamzor nahi hota hai,
Kamzori us waqt aati hai jab us ke dil me Azmat e Rasool (sallallāhu alaihi wa salaam) me kami aa jati hai.

(2) Zaahir aur baatin me ALLĀH se darte raho. Kyu ki jo ALLĀH se darta hai ALLĀH us ke liye har mushkil, pareshaani aur sakhti se niklne ka raasta zaroor bana deta hai, us ko waha se rozi deta hai jaha se us ko rozi milne ka ghumaan bhi na ho, ALLĀH us ki buraiya door kar deta hai aur use bada ajr deta hai.

(3) Jis par naseehat asar na kare wo jaan le ke us ka dil Eimaan se khaali hai.

(4) Gunaah ki tauba karna waajib hai magar gunaah se bachna zyada zaroori hai.

(5) Jin logon ke khyaalat achhe hote hain wo kabhi bhi tanha nahi hote.

(6) Tum apne aap ko theek kar lo tumhare saath chalne waale saare muamle sahi chalenge.

(7) Jo log khud-gharz hote hain wo kabhi achhe dost nahi hote.

(8) Sabr aur Shukr apnaane se hamesha sukoon milta hai.

(9) Wo shaksh kis tarah Takabur kar sakta hai, jo mitti se bana ho, mitti me milne waala ho aur mitti me keede makode ki gizah banne waala ho.

*************
Aap ki 4 biwiya, 3 bete aur 3 betiya hain.

(1) Qutailah bint Abdul Uzza se
1 beta – Abdullāh
Aur 1 beti – Asma;
(2) Umme Rummaan bint Aamir bin Umair se
1 bata – Abdur Rahmān
Aur 1 beti – Aa’isha;

(3) Asma bint Umais se
1 beta – Muhammad;

(4) Habeebah bint Kharijah bin Zaid al-Ansaari se
1 beti – Umme Kulsum.

♦ Sirf aap hi aise sahaabi hain jin ke waalidain aur aulaad bhi ashaaba hain.
Aap ki waalida elaan e nabuwwat ke kuchh arse baad eimaan laai aur aap ke waalid Fateh Makka ke roz eimaan laaye.

*************
Ek raat Hazrat Abu Bakr Siddeeq radiy-Allāhu ta’ala anhu ne khwaab dekha ki Huzoor sallallāhu alaihi wa sallam tashreef laaye. Aap ke jism mubarak par 2 safed kapde the. Thodi der me wo dono safed kapde sabz rang ke ho gaye aur is qadar chamakne lage ki nigaah un par na thehrti thi. Phir Huzoor sallallāhu alaihi wa sallam ne saamne tashreef laakar aap ko salaam farmaaya aur musaafa kiya. Huzoor sallallāhu alaihi wa sallam ne apna nooraani haath aap ke seene par rakha jis ke sabab qalb aur seene ki tamaam takleef door hui.
Phir farmaaya ki ‘Aye Abu Bakr, Kya abhi hum se milne ka waqt nahi aaya?’ Huzoor sallallaāhu alaihi wa sallam se yeh baat sunkar aap neend me hi is qadar roye ki saare ghar walon ko khabar ho gai. Phir arz kiya, ‘Ya Rasool-Allāh sallallāhu alaihi wa sallam, Mujhe bataayen ki aap se mulaaqaat ka sharf kab haasil hoga?’ Hazrat Abu Bakr ko firaaq me rote hue dekhkar Huzoor sallallāhu alaihi wa sallam ne farmaaya, ‘Ghabhrao nahi. Ab hum se mulaaqaat ka waqt qareeb hai.’ Ye sunkar Hazrat Abu Bakr be-had khush hue.

*************
Aap ne 7 Jamaadi ul aakhir ko ghusl kiya aur sardi ki wajah se aap ko bukhar aa gaya. Jab tabeeyat kuchh zyada kharaab hui to ashaaba ne aap ko kisi hakeem ko bulakar dikhaane ke liye kaha.
Aap ne kaha ‘Behtareen hakeem ne mujh se kaha hai ke main jo karta hu wo hi hota hai.’

Phir Aap ne apni beti Hazrate Aa’isha radiy-Allāhu ta’ala anha se wasiyat farmai ke meri maaliki ke jo khajoor ke darakht hain wo tum apne 2 bhai aur 2 baheno ko de dena.
Hazrate Aa’isha radiy-Allāhu ta’ala anha ne tasleem kiya aur puchha ‘Mere ilaawa aap ki 1 hi beti Asma hai to aap dusre kis ke baare me bata rahe hain?’
Aap ne farmaaya ‘Habeeba bint Zaid Kharijah haamila hain aur in sha Allāh un ko beti hogi. Is tarah tumhare ilaawa tumhari 2 bahen hongi.’

Aap ne wisaal ke din Hazrate Usmaan Ghani radiy-Allāhu ta’ala anhu se Hazrate Umar Farooq radiy-Allāhu ta’ala anhu ko khalifa banaane ki wasiyat ki.

*************
Aap ‘Yaar e gaar e nabi’ hain ya’ni Huzoor Nabi e paak sallallāhu alaihi wa sallam ke sab se qareebi dost.

Aap ko Huzoor sallallāhu alaihi wa sallam ne har khaas mauqe par aur mehfil me saath aur qareeb rakha.
Hijrat me bhi Pyare Aaqa sallallāhu alaihi wa sallam ne sirf aap ko saath liya.
Aur wisaal ke baad mazaar me bhi aap ko qareeb rakha.

*******************
Aap ka wisaal 22 Jamaadi ul aakhir 13 Hijri (23 August 634 A.D.) ko Peer ke din 63 baras ki umr me Madeena munawwara me hua.

Aap ki wasiyat ke mutaabiq aap ko 3 kapdo me kafan diya gaya. Jin me 2 kapde wo the jo aap ne pehne hue the jin ko dhokar istemaal kiya gaya aur ek aur chaadar milaai gai.
Aap ki namaaz e janaaza Hazrat Umar Farooq radiy-Allāhu ta’ala anhu ne padhaai.

*************
Aap ne wisaal se qabl ye wasiyat farmai ke ‘Mera janaaza ko Hazoor sallallāhu alaihi wa sallam ke Roza mubarak ke saamne rakh dena aur ijaazat talab karna. Agar darwaaza khul jaaye aur ijaazat mil jaaye to mujhe Roza mubarak ke andar dafn karna. Warna aam qabrastan me dafn kar dena.’

Ashaaba e kiraam ne aisa hi kiya. Jab aap ka janaaza Roza e Aqdas ke saamne rakha gaya to darwaaza khul gaya aur Roza mubarak se aawaaz aai ‘Dost ko dost ke paas le aao.’

Aap ka mazaar Roza e Rasool me Huzoor sallallāhu alaihi wa sallam ke bagal me hai.

*************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrate Abu Bakr Siddeeq radiy-Allāhu ta’ala anhu aur Ashaaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.