Hazrat Haafiz Abdul Azeez rahmatullāhi alaihi

Hazrat Haafiz Abdul Azeez rahmatullāhi alaihi :

Alqaab :
‾‾‾‾‾‾‾‾
Haafiz e Millat, Ustaad-ul-Ulema, Jalaalatul-Ilm.

****************
Aap ki wilaadat (1894 A.D.) me Peer ke roz Bhojpur (Muradabad, Uttar Pradesh) me hui.

Aap ke waalid ka naam Haafiz Ghulaam Noor hai.

****************
Aap ne apne waalid se taaleem haasil ki aur Haafiz e Qur’an hue.
Bhojpur me Urdu aur Faarsi ki taaleem haasil karne ke baad aap Muradabad Madrasa Naeemiya me gaye aur waha 3 saal taaleem haasil ki.
Is ke baad 1342 Hijri (1924 A.D.) me aap Ajmer Madrasa Moeeniya me gaye aur Dars-e-Nizaami mukammal kiya.

Phir aap ne Ajmer me Hazrat Sadr-ush-Shariah Maulana Amjad Ali Aazmi rahmatullāhi alaihi se Hadees ki taaleem haasil ki. Magar aap ko 1351 Hijri (1932 A.D.) me Bareilly me sanad ata ki gai.

Sha’abaan 1352 Hijri (December 1933 A.D.) me Hazrat Sadr-ush-Shariah ne aap ko Bareilly aane ke liye paighaam bheja aur un ke farmaan par aap ne Madrasa Ashrafiya Misbaah-ul-Uloom me dars wa taaleem dena shuru kiya.
29 Shawwaal 1352 Hijri (14 February 1934 A.D.) me aap ko Madrasa Ashrafiya Misbaah-ul-Uloom ka Sadr-ul-Mudarris banaaya gaya.
Aap ke mehnat se Madrasa ki shohrat badhne lagi aur talba ki ta’adaad badhne lagi. Phir aap ne madrasa nayi imaarat me ‘Daar-ul-Uloom Ashrafiya Misbaah-ul-Uloom’ naam se shuru kiya jis ki bunyaad Maulana Sayyed Ali Husain Ashrafi Miyan aur Sadr-ush-Shariah Maulana Amjad Ali Aazmi ke dast e mubarak se rakhi gai.
Jab talba ki ta’adaad aur badhne lagi aur Madrasa ko ek badi jagah me tabdeel karne ki zaroorat padi tab Rabi’ ul awwal 1392 Hijri (May 1972 A.D.) me Huzoor Mufti-e-aazam e Hind Mustafa Raza Khan aur Allama Arshad ul Qaadri ke dast e mubarak se ‘Al Jaamiatul Ashrafia’ ki bunyaad rakhi gai.

Aap ki khwaahish thi ke Madrasa me talba ko tamaam uloom ke saath Arabi aur Angrezi dono zabaan ki pukhta taaleem di jaaye taake faarigh hone ke baad dunya ke kisi bhi mulk me wo taaleem e deen ka kaam kar sake.

******************
Aap ke bahot saare shaagirdo ne khidmat e deen ka kaam jaari rakha hai.

Aap ke mash’hoor shaagird :

(1) Qaari Muhammad Muslih-ud-deen Siddeeqi
(2) Faqeeh e aazam e Hind Mufti Shareef-ul-Haq Amjadi
(3) Allama Badr-ud-deen Ahmad Razawi
(4) Raees-ul-Qalam Allama Arshad-ul-Qaadri (Baani e Jaamia Faiz-ul-Uloom, Jamshedpur wa Jaamia Hazrat Nizaam-ud-deen Auliya, Delhi)
(5) Bahr-ul-Uloom Mufti Abdul Mannaan Aazami
(6) Imaam-ul-Ma’aqoolat Maulana Haafiz Abdul Ra’oof Balyawi
(7) Muhaddeeṡ-e-Kabeer Allama Mufti Zia-ul-Mustafa Aazami (Jaamia Amjadiya Razawiya, Ghosi).
(8) Shaikh-ul-Islaam Allama Sayyed Muhammad Madani Ashrafi (Baani e Muhaddeeṡ-e-Aazam Mission)
(9) Mufakkir-e-Islaam Allama Qamar-uz-Zamaan Aazami (Baani e Jami’at-ul-Islaamiya, Ronahi)
(10) Allama Muhammad Ahmad Misbahi (Sadr e Jami’at-ul-Ashrafia, Mubarakpur)
(11) Allama Yāsin Akhtar Misbaahi (Baani e Daar-ul-Qalam, Delhi)
(12) Allama Badr al-Qadri (Islamic Academy, The Hague)
(13) Dr. Jalaal-ud-deen Ahmad Noori (Karachi University)

****************
Aap har amal Sunnat e Rasool ke mutaabiq karte the.
Ek baar aap ke daanye paanv me zakhm ho gaya. Ek saahab ne dawa laakar kaha ‘Hazrat! Dawa haazir hai.’ Sardi ka mausam tha, Hazrat moza pehne hue the.
Aap ne baanye (ulte) pair ka moza utaara to wo saahab bol pade ‘Hazrat! Zakhm to daahine paanv me hai.’ Aap ne farmaaya ‘Baanye paanv ka pehle utaarna Sunnat hai.’

****************
1386 Hijri (1967 A.D.) me aap ne Hajj ada kiya.
Aap ne photo na nikalwakar paaband e shariat hone ka saboot diya.

****************
Aap ki likhi hui mash’hoor kitaaben :
(1) Ma’arif-e-Hadees
(2) Fataawa Azeeziya
(3) Irshaad-ul-Qur’an
(4) Anba’-ul-Ghaib
(5) Al-Misbaah-ul-Jadeed
(6) Firqa-e-Na’ajiya
(7) Haashiya Sharh Mishkaat.

****************
Aqwaal :
‾‾‾‾‾‾‾‾‾‾‾
(1) Dunya me amal karoge to qabr me raahat paaoge.
(2) Har aitraaz ka jawaab sahi amal se hi dena chaahiye.
(3) Amal karne waale bano kyun ki sahi amal se hi izzat badhti hai.
(4) Maal o daulat ALLĀH ta’ala ki ne’amat hai magar use nek kaam me kharch karne ki aadat bahot badi ne’amat hai.
(5) Wo shakhs Qaabile ehtaraam hai jis ke libaas me saadgi ho aur dil me sahi ilm ho.
(6) Hamesha dusro ki achhai dekho aur apne aib par nazar rakho.

****************
Aap ko Hazrat Maulana Sayyed Ali Husain Ashrafi Miyan rahmatullāhi alaihi aur Hazrat Sadr-ush-Shariah Maulana Amjad Ali Aazami rahmatullāhi alaihi se khilaafat mili hai.

Aap ke khalifa Hazrat Mumtaaz-ul-Fuqaha Muhaddeeṡ-e-Kabeer Allama Mufti Zia-ul-Mustafa Aazami rahmatullāhi alaihi hain.

****************
1 Jamaadi ul aakhir 1396 Hijri ko aap ne Sahih al-Bukhari me se Kitaab-ul-Janaa’iz ka dars diya aur sabak ke dauraan aap ne farmaaya ‘Aaj Peer ka din hai aur aaj hi ke din Huzoor Rasool-Allāh sallallāhu alaihi wa sallam ki be’asat hui thi aur aaj hi ke din aap ka wisaal hua tha.’
Aur usi raat 11: 55 p.m. baje aap ka inteqaal hua.

****************
Aap ka wisaal 1 Jamaadi us Saani 1396 Hijri (31 May 1976 A.D.) ko Peer ke roz hua.

Aap ka mazaar Mubarakpur (Uttar Pradesh) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Haafiz e Millat Haafiz Abdul Azeez rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.