Hazrat Haaji Imdaadullāh Muhaajir Makki rahmatullāhi alaihi

Hazrat Haaji Imdaadullāh Muhaajir Makki rahmatullāhi alaihi :

Aap ki wilaadat 21 Safar 1233 Hijri (31 December 1817 A.D.) ko Nanauta (Saharanpur, Uttar Pradesh) me hui.

Aap ke waalid Haafiz Muhammad Ameen aur waalida ka naam Bibi Haseeni hai.

Aap Hazrat Umar Farooq radiy-Allāhu ta’ala anhu ki nasl se (Farooqi) hain.

Aap ke waalid ne aap ka naam Imdaad Husain rakha. Jab Hazrat Shaah Muhammad Is’hāq Muhaddees ne aap ka naam badalkar ‘Imdaadullāh’ rakha.
Aap khud ko Khuda Bakhsh aur Abdul Kareem kehlaana bhi pasand karte the.

Aap jab 3 saal ke the tab aap ko Hazrat Sayyed Ahmad Shaahid rahmatullāhi alaihi ke paas bheja gaya. Unho ne aap ko Tabarruk ata farmae.

Aap ki umr 7 saal ki hui tab aap ki waalida ka inteqaal hua.
Aap ne 16 saal ki umr tak Maulana Mamlook Ali rahmatullāhi alaihi (Delhi) se Ilm e Sarf, Nahw aur Faarsi sikha aur Muhammad Qalandar Muhaddees se Mishkaatul Masaabih ke ki aur Maulana Abdur Raheem Nanautvi se Hisn-ul-Hasin aur Fiqh al-akbar ki taaleem haasil ki. Shah Abdur Razzaaq se Maulana Rumi ki Masnawi-e-Ma’nawi sikha.

Is ke baad ALLĀH ki ata se baaqi ka ilm aap ne khud sikha.

23 saal ki umr me aap Haafiz e Qur’an hue.

18 saal ki umr me aap Hazrat Maulana Naseer-ud-deen Naqshbandi ke mureed aur khalifa bane.
Un ke inteqaal ke baad ek baar khwaab me Huzoor sallallāhu alaihi wa sallam ki ziyarat hui aur aap ke farmaan par aap Hazrat Maulana Miyanji Noor Muhammad ke mureed aur khalifa hue.

Un ke wisaal ke baad aap ne khud ko logo se alag kar diya aur Punjab ke jangal me tanha rehne lage. Aap 8 din me ek baar khaana khate the.
6 mahine baad 1260 Hijri me Huzoor sallallāhu alaihi wa sallam ne khwaab me aap ko Madeena aane ke liye kaha.

1261 Hijri (1845 A.D.) me aap Bandares pahunche. Waha se aap Makka ke liye rawaana hue.
Jab aap Makka shareef pahunche to aap ke paas koi khaane ki cheez na hone ki wajah se aap ne sirf Zamzam peekar 9 din guzare. 10we din aap ne madad maangi. Sirf ek shakhs ne aap ko 100 riyal diya.
Us ke baad aap ko har mahine 100 riyal ki madad milti rahi.

Hajj mukammal karne ke baad aap Shaah Is’hāq Muhajir Makki ki sohbat me rahe aur faiz haasil kiya. Unho ne aap ko Madeena ki ziyarat ke baad Hindustan waapas jaane ke liye kaha. Sayyed Qudratullāh Banarasi Makki ne aap ke saath apne kuchh mureed bheje.
Madeena munawwara me qayaam ke dauran aap ne wahi rook jaane ka faisla kiya. Magar Shaah Ghulaam Murtaza Jhanjhaanwi Madani ne aap ko kuchh waqt ke liye sabr karne ke liye kaha.
Phir aap Makka aaye aur waha se Hindustan waapas aaye.

Is ke baad logo ne aap se Bai’at ke liye kaha. Magar Aap ne farmaaya ‘Jab ALLĀH ta’ala ka hukm hoga tab main bai’at lena shuru karunga.’ Phir kuchh waqt baad aap ne bai’at lena shuru kiya. Lekin aap ke dil me hamesha Haram me waapas jaane ki khwaahish rahi.

1857 A.D. ke gadar ke baad aap ne Hindustan chhodne ka faisla kiya.
Aap Punjab se hote hue Hyderabad pahunche aur Auliya Allāh ke mazaar par faiz haasil kiya. Phir Karachi jaakar waha se Makka pahunche.
Makka me aap Kohe Safa par Seth Ismā’eel ke ribat me thehre.

Aap tanhai me ibaadat, riyaazat aur muraaqaba me hi waqt guzaarte. Sirf Hajj ke dauraan apne mureedo aur Hindustan se aane waale logo se milte.

500 se zyada ulama aap ke mureed hue.

************
Sunnat e Rasool ada karne ke liye 20 Ramazaan 1282 Hijri (6 February 1866 A.D.) ko 49 baras ki umr me aap ne Bibi Khadeeja se nikaah kiya.
1294 Hijri me aap ke mureedo ne aap ko samjhakar Haarratul Baab me ek makaan kharidkar aap ko diya.
Bibi Khadeeja ke inteqaal ke baad aap ne dusra nikaah kiya. Wo aurat na-bina thi.
Is ke baad aap ne teesra nikaah kiya.

************
Aap ki likhi hui Kitaaben :

(1) Ikleel-ul-Qur’an (Tafseer e Qur’an [Arabi])
(2) Haashiya Masnavi-e-Ma’nawi Maulana Rumi
(3) Ghiza-e-Rooh
(4) Jihaad-e-akbar
(5) Masnavi Tuhfat ul Ushshaaq
(6) Irshaad-e-Murshid
(7) Zia-ul-Quloob
(8) Risala Dar naama Ghazanaak
(9) Faisla Haft Masla.

************
Aap Hazrat Noor Muhammad Jhinjhanawi rahmatullāhi alaihi ke mureed aur khalifa hain.

Aap se Tareeqat ka ‘(Chishti Saabri) Imdaadi’ silsila jaari hai.

Aap ke khulfa :
(1) Hazrat Maulana Aaqil Muhammad Quraishi rahmatullāhi alaihi
(2) Hazrat Maulana Ahmad Hasan Kanpuri rahmatullāhi alaihi
(3) Hazrat Abdul Ma’abood rahmatullāhi alaihi
(4) Shaikh Qaazi Abdur Razzaaq rahmatullāhi alaihi.

************
Apni zindagi ke aakhri kuchh saal me aap bahot kamzor ho gaye the aur bistar me rehte the.

Aap ka wisaal 12 Jamaadi uṡ ṡaani 1317 Hijri (18 October 1899 A.D.) ko Budh ke roz Fajr ki azaan ke waqt 84 baras ki umr me hua.

Aap ke saamaan me sirf ek laathi, 2 jod garmi ke kapde aur 2 jod sardi ke kapde the.

Aap ka mazaar Jannatul Ma’ala, Makka mukarrama me hai.

************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Haaji Imdaadullāh Muhaajir Makki rahmatullāhi alaihi aur Auliya Allāh ke waseele se
Sab ko mukammal ishq e rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.