Hazrat Khaalid bin Waleed radiy-Allāhu ta’ala anhu

Hazrat Khaalid bin Waleed radiy-Allāhu ta’ala anhu :

Laqab :
‾‾‾‾‾‾‾‾
Saifullāh al-Maslool (The Drawn Sword of Allāh).

****************
Aap ki wilaadat 592 A.D. me Makka me hui.

Aap ke waalid ka naam Waleed ibn Mughira aur waalida ka naam Lubaabah as-Saghirah hai.
Aap Quraish ke Banu Makhzum qabeele se ta’alluq rakhte hain.

****************
Aap jawaani se hi pehalwaan aur ghaazi the aur har qism ka hathiyaar chalaane me maahir the.

Jange Badr ke mauqe par aap ke bhai Waleed ibn Waleed ko musalmano ne qaid kar liya. Aap apne bhai Hasham ibn Waleed ke saath use riha karane ke liye Madeena gaye. Jab Waleed ko riha karake Makka ki taraf ja rahe the ke tab safar ke dauraan Walid wapas Madeena chale gaye aur musalman ho gaye.

Is ke baad 3 Hijri (625 A.D.) me Jange Uhud me aap Musalmano ke muqaabale me Makka ke kaafiro ke saath saamil hue.
Aur Ghazwa e khandaq me bhi aap kaafiro ke saath saamil hue.

****************
3 Hijri (628 A.D.) me Sulaih Hudaybiyyah ke baad Huzoor sallallāhu alaihi wa sallam ne aap ke bhai Waleed se farmaaya ‘Khaalid jaisa aqlmand aur samajhdaar shakhs zyada waqt tak Islaam se door nahi reh sakta.’

Waleed ne aap ko khat ke zariye Khaalid ko Islaam apnane ke liye kaha.
Islaam apnaane se pehle aap ne apne dost Ikrimah ibn Abu Jahl ko ye baat batai to us ne aap ko roka. Jab Abu Sufyaan ibn Harb ne aap ko daraate hue bure anjaam ke liye kaha to Ikrimah ibn Abu Jahl ne use kaha ‘Tumhe ise is tarah dhamkaana nahi chaahiye, Khaalid ko ikhtiyaar hai ke wo apni marzi se apna mazhab chune.’
Aakhir me aap 8 Hijri (629 A.D.) me Madeena jaane ke liye rawana hue. Raaste me Amr ibn Aas and Usmaan ibn Talha se mulaaqat hui. Wo dono bhi islam apnane ke liye Madina ja rahe the. Teeno Madeena pahunche aur Huzoor sallallāhu alaihi wasallam ki baargaah me pahunchkar musalman hue.

****************
3 mahine baad Huzoor sallallāhu alaihi wa sallam ne ek shakhs ko safeer banaakar Shaam ke Ghassani haakim ki jaanib Islaam ki daawat ka paighaam dene ke liye ek khat dekar bheja. Jab wo Mu’tah se guzar raha tha tab waha ke Shurahbil ibn Amr naami Ghassani sardaar ne use pakadkar qatl kar diya.
Ye khabar sunkar Huzoor sallallāhu alaihi wa sallam ne Hazrat Zaid ibn Haariṡah radiy-Allāhu ta’ala anhu ki sardaari me 3000 musalmano ka lashkar bheja.
Jamaadi ul awwal 8 Hijri me Mu’tah ke qareeb Byzanti saltanat aur Ghassani Arab ke 200000 ke lashkar ke saath musalmano ki jung hui.
Jang me Hazrat Zaid ibn Haariṡah radiy-Allāhu ta’ala anhu ki shahaadat ke baad Huzoor sallallāhu alaihi wa sallam ke mutaabiq Hazrat Ja’afar ibn Abi Taalib radiy-Allāhu ta’ala anhu ko aur un ki shahaadat ke baad Hazrat Abdullāh ibn Rawahah radiy-Allāhu ta’ala anhu ko lashkar ka sardaar banaaya gaya.
In 3 ashaaba ki shahaadat ke baad musalmano ne Hazrat Khaalid ibn Waleed radiy-Allāhu ta’ala anhu ko lashkar ka sardaar banaaya.
Kuffaar ki ta’adad bahot zyada jung me musalmano ka zyada nuqsaan hone ka andesha tha. Magar aap ne tarkeeb ki aur islaami lashkar ko peechhe hatne ka hukm diya.
Phir raat ko us lashkar me se kuchh logo ko thoda door jaakar thehrne ke liye kaha aur farmaaya ke ‘Subah ko jung shuru hone se pehle wo log aakar lashkar me saamil ho, jis se dushmano ko ye lage ke musalmano ki madad ke liye dusre sipaahiyo ka giroh aaya hai.’
Is tarah dushmano ka hosla todkar aap ne jang jaari rakhi. Aap bahot bahaaduri se lade aur jang ke dauraan aap ki 9 talwaare toot gai.
Phir raat me lashkar ko Madeena ki taraf waapas lautne ke liye kaha. Dushmano ke lashkar ne darkar pichha nahi kiya. Is tarah musalmano ko halaak hone se bacha liya.
Is jang ke baad Huzoor sallallāhu alaihi wa sallam ne aap ko ‘Saifullāh al-Maslool’ ka laqab ata farmaaya.

******************
Is ke baad aap ne Fateh Makka, Ghazwa e Hunain, Ghazwa e Ta’if aur Ghazwa e Tabook me hissa liya.
8 Hijri me Maah e Ramazan me Huzoor sallallāhu alaihi wa sallam ne ‘Uzza’ daivi ka but todne ke liye Nakhla bheja.
Aur Banu Jazimah aur 9 Hijri me Dumatul Jandal ki jung me aap ko lashkar ka sardaar banaakar bheja.
10 Hijri me aap ko ‘Wadd’ ka but todne ke liye Dumatul Jandal bheja.

****************
10 Hijri me Hajjatul wida ke mauqe par aap ne Huzoor sallallāhu alaihi wa sallam ke Gesu mubarak ko tabarruk ke taur par jama kiya. Aur is ki barkat se aap hamesha fatehyaab hote the.

****************
11 Hijri (632 A.D.) me Hazrate Abu Bakr Siddeeq radiy-Allāhu ta’ala anhu ke zamane me aap ne Baaghiyo aur Kazzab (Nabuwwat ka jhuta daawa karne waale) ke khilaaf Junge Ridda me islami lashkar ke sardaar bankar Junge Buzakha me Tulaiha bin Khuwailid ko haraaya aur Najd me Baaghi Malik ibn Nuwairah ko qaid karke qatl kiya aur Junge Yamama me Musaylimah bin Habeeb ko qatl kiya.

Is ke baad aap ne bahot saari jung me fateh haasil karke Faars (Iran), Iraq aur Shaam tak islaami saltanat failai.

13 Hijri (634 A.D.) me Hazrate Abu Bakr Siddeeq radiy-Allāhu ta’ala anhu ke wisal ke baad Hazarte Umar Faarooq radiy-Allāhu ta’ala anhu ne aap ko hatakar Hazrat Abu Ubaidah ibn Jarrah radiy-Allāhu ta’ala anhu ko islaami lashkar ke sardaar banaaya.
Hazarte Umar Faarooq radiy-Allāhu ta’ala anhu ne kaha ke ‘Main musalmano ki galat fehmi door karke ye bataana chaahta hu ke koi ek shakhs ki wajah se fateh nahi milti balke muslamano ko fateh sirf ALLĀH ta’ala ata farmaata hai,’

Is ke baad aap ne Junge Fahl, Junge Emesa, Junge Damascus, Junge Yarmouk aur dusri jung me hissa liya.

****************
Aap 100 se zyada jung me saamil hue aur aap ke jism ka koi bhi hissa jakhm ke nishaan se baaqi nahi tha.

****************
Ek baar aap ne islaami lashkar ke saath nasraaniyo (Christians) ke shaher par hamla kiya. Nasraaniyo ne shehar ka qila band kar diya aur andar se muqaabala karte rahe. Aap ne us par ghera daale rakha.
Kuchh mahino baad jab qile ke andar khane peene ka saamaan khatm hone laga tab nasraaniyo ne mashwara karke ek paadri ko islaami lashkar ke sardaar se milne ke liye bheja. Wo paadri darwaaza kholkar safed kapda hilaata hua baahar aaya.
Jab wo islaami lashkar ke sardaar Hazrat Khaalid bin Waleed radiy-Allāhu ta’ala anhu ke paas pahuncha aur khade hokar saari baat batai. Aap ne kaha ‘Theek hai, agar tum sab log islaam apnate ho to hum tumhe kuchh nuqsaan nahi karenge.’
Itne me aap ne dekha ke us paadri ne apna haath pichhe rakha hai aur us me koi cheez chhupa raha hai. Aap ne us se puchha ‘Tum apne haath me kya cheez chhupa rahe ho?’ Us ne kaha ‘Mere haath me ek dibbe me zeher hai. Agar aap hamari baat nahi maante aur hum par sakhti karte to main qile me jaakar sab ko ye baat bataane se pehle ye zeher kha leta.’ Aap ne kaha ‘Tumhe yaqeen hai ke ye zeher khaane se tum mar jaaoge.’ Us ne kaha ‘Haan, Ye bahot hi qaatil zeher hai.’
Aap ne kaha ‘Agar main ye zeher khaa lu to tum sab islaam me daakhil ho jaaoge?’ Ye kehkar aap ne us ke haath me se zeher lekar khaa liya. Paadri samet tamaam dekhne walo ko ye ta’ajjub hua ki qaatil zeher khaane ke baad bhi aap par us ka asar nahi dikh raha tha.
Us paadri ne puchha ‘Ye kaise hua?’
Aap ne farmaaya ‘Mere aaqa Huzoor sallallāhu alaihi wa sallam ne mujhe khaane se pehle padhne ki jo dua sikhaai hai. Use padh lene ke se us ki barkat se koi bhi cheez nuqsaan nahi kar sakti.’
Ye sunkar wo paadri aap ki ijaazat lekar qile me gaya aur sab ko ye pura waaqya sunaaya. Jise sunne ke baad sab nasraaniyo ne foran islaam qubool kar liya.

[Khaane se pehle (hifaazat wa barkat) ke liye padhne ki masnoon dua :

Bismillāhi wa ala barkatillāh.
Bismillāhillazee laa yadurru ma’a-asmihī shay’un feel-ardi wa laa fees-samaăi wa huwas-samee’ul aleem.

ALLĀH ke naam se aur ALLĀH ki barkat ke saath (khaata hu).
ALLĀH ke naam se jis ke naam se zameen aur aasmaan me koi cheez nuqsaan nahi pahunchaati aur wo sab sunne waala aur jaanne waala hai.]

****************
Aap ke 3 bete aur 1 beti hain.

Saahabzaade :
Sulaimān, Abdur Rahmān aur Muhaajir.

Saahabzaadi :
Mutaahira (Jis ka nikaah Hazrat Malik Abdur Rasheed se hua).

****************
Aap ne apne wisaal ke pehle ummate Mustafa ko ek paighaam (naseehat) diya :

‘Maut likhi na ho to maut khud zindagi ki hifaazat karti hai,
Jab Maut muqaddar ho to zindagi daudti hui maut se lipat jaati hai.
Zindagi se zyada koi jee nahi sakta aur maut se pehle mar nahi sakta.
Dunya ke buzdil ko mera paighaam pahuncha do ki
Agar maidaane Jihaad me maut hoti to is Khaalid bin Waleed ko bistar par maut na aati.’

****************
Aap ka wisaal 29 Jamaadi ul awwal 21 Hijri (642 A.D.) me hua.

Aap ka mazaaar Homs (Syria) me hai.

**********
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khaalid bin Waleed radiy-Allāhu ta’ala anhu aur Ashaaba ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.