Hazrat Khwaja Habeeb al-Ajami rahmatullāhi alaihi

Hazrat Khwaja Habeeb al-Ajami rahmatullāhi alaihi :

Laqab :
‾‾‾‾‾‾‾‾
Mohibbil Asfiya.
***************
Aap ke waalid ka naam Muhammad hai.
Aap Faarsi (Irani) the. Ghair e Arabi hone ki wajah se aap ‘Ajami’ kehlaate hain.
Aap Basra (Iraq) me rehte the.
*******************
Ibtedaai daur me aap bahot ameer the aur Ahle Basra ko sood par qarz diya karte the aur jab maqrooz par Qarz ka taqaaza karne jaate to us waqt tak waapas na hote jab tak qarz wasool na ho jaata. Aur agar kisi majboori se qarz wasool na hota to apne waqt ke zaaya hone ka maqrooz se jurmaana wasool karte aur us raqam se guzaara karte.
Ek din aap kisi ke yaha wasoolyaabi ke liye pahunche to wo ghar me maujood na tha. Us ki biwi ne kaha ke ‘Na to mera shohar ghar par maujood hai aur na mere paas tumhe dene ke liye koi cheez hai. Albatta maine aaj ek bhed zibah ki thi jis ka tamaam gosht to khatm ho chuka lekin sar baaqi reh gaya hai. Agar tum chaaho to wo me tum ko de sakti hu.’
Chunaanche aap usi sar ko lekar ghar pahunche aur biwi se kaha ke ‘Ye sar sood me mila he is ko paka daalo.’ Biwi ne kaha ke ‘Ghar me na to lakdi hai na aata. Bhala me khaana kis tarah tayyaar karu?’ Aap ne kaha ke ‘Main in dono cheezo ka bhi intazaam maqrooz logo se sood lekar karta hu.’ Aur sood hi se ye dono cheeze khareed kar laaye.
Lekin jab khaana tayyaar ho chuka to ek saa’il ne aakar sawaal kiya. Aap ne kaha ke ‘Tujhe dene ke liye hamare paas kuchh nahi hai aur agar tujhe kuchh de bhi du to us se tu daulatmand na ho jaayega lekin hum muflis ho jaayenge.’
Saa’il jab maayoos ho kar waapas chala gaya to biwi ne saalan nikaalna chaaha to dekha ke wo handiya saalan ki bajaay khoon se bhari hui thi.
Biwi ne aap ko aawaaz dekar kaha ke ‘Dekho, Tumhari kanjoosi aur bad-akhlaaqi se kya ho gaya hai?’ Aap ko ye dekhkar ibrat haasil hui aur biwi ko gawaah banakar kaha ke ‘Aaj se me har bure kaam se taa’ib hota hu.’
Ye kehkar maqrooz logo se asl raqam lene aur sood khatm karne nikle. Raaste me kuchh ladke khel rahe the. aap ko dekh kar bacho ne aawaaz dena shuru kar diya ke ‘Door hat jaao, Habeeb sood khor aa raha hai kahi us ke qadmo ki khaak hum par na pad jaaye aur hum us jaise bad-bakht na ban jaayen.’ Ye sun kar aap bahot ranjeeda hue.
Aur aap Hazrat Khwaja Hasan Basri rahmatullāhi alaihi ki baargaah me haazir hue. Unho ne aap ko aisi naseehat farmai ke be-chain hokar dobaara tauba ki aur jab waapsi me ek maqrooz shakhs aap ko dekhkar bhaagne laga to farmaaya ke ‘Tum mujh se mat bhaago ab to mujh ko tum se bhaagna chaahiye taake ek gunaahgaar ka saaya tumhare upar na pad jaaye.’
Phir jab Aap aage badhe to un ladko se kehna shuru kiya ke ‘Raasta de do, Habeeb taa’ib hokar aa raha hai. Kahi aisa na ho ke humare pairo ki gard us par pad jaae aur ALLĀH ta’ala hamara naam gunaahgaaro me darj kar le.’ Aap ne bacho ki ye baat sunkar ALLĀH ta’ala se arz ki ‘Teri qudrat bhi ajeeb hai ke aaj hi maine tauba ki aur aaj hi tune logo ki zabaan se meri naame naami ka elaan kara diya.’
Us ke baad aap ne elaan kar diya ke ‘Jo shakhs mera maqrooz ho wo apni tehreer aur maal waapas le jaaye. Phir aap ne apni tamaam daulat raah e khuda me loota di aur jab kuchh baaqi na raha to aakhir me ek saa’il ko apna kurta tak utaar kar de diya.
****************
Aap ne aur aap ki biwi saahiba ne Nehr e Furaat ke kinare ek ibadatkhaana taameer kiya. Aur ye maamool bana liya tha ke din me tehsil e ilm ke liye Hazrat Khwaja Hasan Basri rahmatullāhi alaihi ki khidmat me pahunch jaate aur raat bhar ibaadat me mashgool rehte.
Ek martaba biwi ne kaha ke ‘Khurdnosh ke liye kuchh na kuchh kaam karna chaahiye.’ To Aap mazdoori karne ke liye ghar se nikle lekin din bhar ibaadat me mashgool rehkar jab ghar pahunche to biwi ne sawaal kiya ke ‘kya laaye ho?’ Aap ne farmaya ‘Jis ki mazdoori ki he wo bahot karam waala hai aur us ke karam hi ki wajah se mujh se ujrat talab karne ki jur’at na ho saki. Lekin us ne khud hi ye keh diya he ke 10 din ke baad jab tum ko zaroorat hogi to puri ujrat de dunga’
Phir jab 10 din ke baad aap sochne lage ke Aaj ghar jaakar kya jawaab dunga. Magar jab ghar par pahunche to khaane ki khushboo aa rahi thi aap ne apni biwi se daryaaft kiya to us ne kaha ke ‘Ek shakhs aaya tha aur ek bori Aata, ek zibah shuda bakri, ghee, shahed aur 300 dirham de gaya hai aur Maalik ka paighaam dene ke liye kaha hai ke Apne kaam ko taraqqi do jis ke sile hum is se bhi zyada mazdoori denge.’
Ye sunkar aap ko khayaal aaya ke Jab 10 din ki be-tawajjoh riyaazat ka ALLĀH ne ye ne’amul badal ata farmaaya hai to agar zyada diljoi ke saath ibaadat karu to mera Rab na jaane kya in’aamaat ata farmega.’
****************
Aap ka makaan Basra ke chauraahe par tha aur ek din aap ne kapde nikaalkar chauraahe par rakh diye aur khud kahi nahaane ke liye tashreef le gaye. Ittefaaq se Khwaja Hasan al-Basri rahmatullāhi alaihi ka us taraf se guzre.
To unho ne aap ka libaas pahechaan liya aur socha ke Shaayad Habeeb Ajami apne kapde yaha chhodkar kahi chale gaye hain aur koi ise uthaakar chala na jaaye is liye kapdo ki hifaazat karne ke liye waha thehre rahe.
Aur jab Habeeb Ajami waapas aaye to Khwaja Hasan Basri se puchha ke ‘Aap yaha kyun khade hain?’ Unho ne puchha ke ‘Tum apna libaas kis ke bharose par chhod kar chal diye agar koi utha kar le jaata to kya hota?”
Aap ne jawaab diya ‘Usi ke bharose par chhod kar gaya tha jis ne hifaazat ke liye aap ko yaha tak pahuncha diya.’
****************
Ek martaba Hazart Khwaja Hasan al-Basri rahmatullāhi alaihi aap ke yaha tashreef laaye. Aap ne 2 rotiya aur namak paish kiya. Hazart Khwaja Hasan al-Basri ne khaana shuru kiya. Itne me ek saa’il aaya. Hazrat Habeeb Ajmi ne rotiya aur namak us saa’il ko de diya. Khwaja Hasan al-Basri ne kaha ‘Tum khush-akhlaaq ho magar tumhe zyada ilm hota to behtar hota. Tum aadha khaana saa’il ko de sakte the aur aadha mehmaan ke liye rakh sakte the. Tum ne to saara khaana saa’il ko de diya.’ Aap khaamosh rahe. Itne me ek khaadim aaya jis ke sar par ek thaali thi jis me bhuna hua gosht, rotiya aur meethaai thi aur 5000 dirham the. Us ne ye sab Khwaja Habeeb Ajmi ke saamne rakh diya. Aap ne wo sab dirham ghurba ko de diye aur khaana Khwaja Hasan al-Basri ko pesh kiya. Hazrat jab khaana kha rahe the tab aap ne un se farmaaya ‘Huzoor! Aap bahot nek insaan hain. Magar aap zyada yaqeen rakhte to behtar hota. Ilm ke saath Tawakkal ka hona zaroori hai.’
****************
Karaamat :
‾‾‾‾‾‾‾‾‾‾‾‾‾‾
(1) Ek baar ek aurat girya o zaari karti hui aap ki baargaah me haazir hui aur arz kiya ke ‘Huzoor! Mera bacha gum ho gaya hai. Jis ki wajah se me bahut ghamzada hu.’ Aap ne puchha ke ‘Tumhare paas aur kya hai?’ Us ne kaha ‘Do Dirham hain.’ Aap ne us se wo do dirham lekar khairaat kar diye aur dua karke farmaaya ke ‘Jaao, tumhara bachcha aa gaya hai.’
Jab wo aurat apne ghar pahunchi to us ne dekha ke waaqai us ka beta ghar par maujood tha. Us ko gale lagakar ke puchha ‘Tu kaha chala gaya tha?’ Ladke ne kaha ‘Maia to Kirmaan me tha aur mere ustaad ne gosht lene ke liye baazaar bheja tha. Raaste me achaanak tez hawa chalne lagi jo mujhe yaha tak udaa kar le aai. Aur maine kisi ko kehte hue suna ke ‘Aye hawa, Ise ghar pahuncha do.’
(2) Ek martaba Basra me qahet pada. Aap ne ek shakhs se khaane peene ka saamaan kharida aur logo me khairaat kar diya. Aap ne apna khaali batwa takiye ke neeche rakh diya. Jab wo shakhs saamaan ki raqam maangne aaya aur us ne jab takiye ke neeche se wo batwa nikaala to wo dirham se bhara hua tha.
(3) Ek martaba Hajjaaj ke sipaahi Khwaja Hasan Basri ko girftaar karne ke liye un ke pichhe lage the. Wo bhaagkar Hazrat Habeeb Ajami ke makaan me chhup gaye. Sipaahiyo ne aakar puchha ke ‘Tum ne Hasan Basri ko dekha hai?’ to aap ne farmaaya ‘Haan.’ Sipaahiyo ne puchha ‘Kaha hain?’ to aap ne makaan ki taraf ishaara kiya. Sipaahi makaan me daakhil hue. Bahut talaash kiya magar na Khwaja Hasan Basri nahi mile. Unho ne baahar aakar aap se sahi bataane ke liye kaha. Aap ne kaha ‘Makaan ke andar hi hain.’ Sipaahi phir se andar daakhil hue aur talaash kiya magar nahi mile. Khwaja Hasan Basri farmaate hain ke ‘Main waha maujood tha aur wo sipaahi mere bilkul qareeb aa jaate the magar main un ko dikhaai nahi deta tha.’ Kai baar aisa hone ke baad wo sipaahi waha se chale gaye.
Jab Khwaja Hasan Basri baahar aaye to aap se kaha ‘Tum ne sipaahiyo ko kyun bata diya? Shukr hai ke ALLĀH ne meri dua sun li aur mujhe bacha liya.’ Aap ne farmaaya ‘Ye sirf dua ka asar nahi hai balke sach bolne ki wajah se ALLĀH ne hume madad farmai hai.
****************
Kisi ne aap se puhha ‘ALLĀH ko raazi kaise kar sakte hain?’ Aap ne farmaaya ‘Apne dil ko Nifaaq se paak rakho kyun ki Nifaaq (Hypocricy) Wifaaq (Concord) ke khilaaf hai aur Nifaaq aur ALLĀH se mohabbat me koi ta’alluq nahi. ALLĀH se mohabbat ke liye Riza zaroori hai. Riza ya’ni ALLĀH ta’ala ki ata aur faisle par raazi rehna ye us ke muqarrab bando ki alaamat hai aur Nifaaq nafarmaano ki alaamat hai.’
****************
Aqwaal :
‾‾‾‾‾‾‾‾‾
(1) ALLĀH us ki hifaazat karta hai jo apna bojh Rab ta’ala ko supurd kar deta hai.
(2) Soofi wo hi jis ka dil Hasad aur Dunya ki mohabbat se paak ho.
****************
Aap Hazrat Khwaja Hasan al-Basri rahmatullāhi alaihi ke mureed aur khalifa hain.
Aap se tareeqat ka ‘Ajamiya’ silsila jaari hai.
Aap ke khalifa Hazrat Khwaja Daawūd al-Taai rahmatullāhi alaihi hain.
****************
Aap ka wisaal 3 Rabi’ us Saani 120 Hijri (March 738 A.D.) ko hua.
Aap ka mazaar Baghdad (Iraq) me hai.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Khwaja Habeeb al-Ajami rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.