Hazrat Mufti Jalaal-ud-deen Ahmad Amjadi rahmatullāhi alaihi

Hazrat Mufti Jalaal-ud-deen Ahmad Amjadi rahmatullāhi alaihi :

Laqab :
‾‾‾‾‾‾‾‾
Faqeeh-e-Millat.
****************
Aap ki wilaadat 1352 Hijri (1933 A.D.) me Ojha-ganj (Basti) me hui.
Aap ke waalid ka naam Hazrat Jaan Mohammad bin Abdur Raheem hai.
Aap ke pardaada Rajput the aur musalman hue the. Aur apna naam ‘Muraad Singh’ se ‘Muraad Ali’ rakha tha.
Aap ke waalid Masjid me Imaam the aur bagair kisi tankhwaah ke khidmat karte the.
*******************
Aap ne 7 saal ki Maulana Haafiz Zakariya se Qur’an ki taaleem mukammal ki.
Aap 10 saal ki umr me Haafiz e Qur’an hue.
Phir Peerzaada Maulana Abdul baari saahab aur Maulana Abdur Ra’oof saahab se Faarsi ki 12 kitaaben padhi aur Arabi ki taaleem bhi haasil ki.
1367 Hijri (1948 A.D.) me Majeed taaleem ke liye Aap Nagpur gaye aur Madrasa Islaamiya me Hazrat Allama Arshad ul Qaadri se Hadees aur Fiqh ki taaleem haasil ki.
Ilme deen sikhne ka itna shauq tha ke din ko kaam karte the taake apne waalid ko madad kar saken aur maghrib baad der raat tak taaleem haasil karte.
24 Sha’abaan 1371 Hijri (19 May 1952 A.D.) ko aap ko Sanad e Faraaghat ata ki gai.
Is ke baad aap Basti aakar Madrasa Qaadria Razawia me Mudarris bane.
Phir Shuaib ul Auliya Hazrat Muhammad Yaar Ali ki daawat par 1 Zil Hijja 1375 Hijri (10 July 1956 A.D.) ko Baraoon me Daar-ul-Uloom Faiz-ur-Rasool me tashreef laaye.
24 saal ki umr me aap ne apna pehla Fatwa diya.
Kuch arse me aap ka ilm aur fataawa mash’hoor ho gaye.
Phir aap ne Ojha-ganj me ‘Daar-ul-Uloom Amjadia Arshad-ul-Uloom’ ki shuruat ki.
In 2 idaaro me bahot saare talba ne aap se taaleem haasil ki aur Aalim aur Mufti bankar khidmat e deen ka kaam karte rahe.
29 Jamaadi ul awwal 1378 Hijri (December 1958 A.D.) ko Aap Hazrat Sadr-ush-Shariah Mufti Amjad Ali Aazmi rahmatullāhi alaihi ke mureed hue.
Hazrat Ahsan-ul-Ulama Sayyed Shaah Mustafa Haidar Hasan Barkaati Marehrawi rahmatullāhi alaihi ne aap ko khilaafat ata farmaai hai.
Aap ne taaleem e deen ke zariye islaam aur Ahle sunnat wal jama’at ki azeem khidmat ki.
*********************
Tasannif :
‾‾‾‾‾‾‾‾‾‾‾
Aap ki likhi hui mash’hoor kitaaben :
(1) Fataawa Faiz-ur-Rasool (2 Jild)
(2) Fataawa Faqeeh-e-Millat (2 Jild)
(3) Anwaar-ul-Hadees
(4) Anwaar-e-Shariat
(5) Aja’ib-ul-Fiqh
(6) Fiqhi pehilya
(7) Khutbaat-e-Muharram
(8) Buzurgon ke Aqeede
(9) Nooraani ta’aleem
(10) Islaami ta’aleem
(11) Hajj wa Ziyarat.
(12) Guldasta e Maṡnawi.
****************
Aap ke 3 saahabzaade hain :
(1) Maulana Anwaar Ahmad
(2) Maulana Abraar Ahmad
(3) Maulana Izhaar Ahmad.
****************
Aap ka wisaal 4 Jamaadi uṡ Ṡaani 1422 Hijri (23 August 2001 A.D.) ko Shab e Jum’aa 12 : 55 ko hua.
Aap ka mazaar Ojha-ganj (Basti, Uttar Pradesh) me hai.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Faqeeh-e-Millat Mufti Jalaal-ud-deen Ahmad Amjadi rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.