Hazrat Sayyed Badi’-ud-deen Ahmad Madaar Shaah rahmatullāhi alaihi

Hazrat Sayyed Badi’-ud-deen Ahmad Madaar Shaah rahmatullāhi alaihi :

Alqaab :
‾‾‾‾‾‾‾‾
Qutb-ul-Madaar, Zinda Shaah.
***********
Aap ki wilaadat 1 Shawwaal 242 Hijri (August 839 A.D.) me Halab (Shaam /Syria) me hui.
Aap ke waalid ka naam Hazrat Sayyed Qidwat-ud-deen Mehzar Ali Halbi ibn Sayyed Baha-ud-deen Manaazar Ali rahmatullāhi alaihi aur waalida ka naam Bibi Hajra binte Sayyed Abdullāh Aazami rahmatullāhi alaihi hai.
Aap ke waalid Husaini saadaat hai aur waalida Hasani saadaat hain.
***********
Aap ki waalida agar be-wuzu hoti to aap doodh nahi pite the.
Agar aap kisi wajah se ro rahe hote aur Azaan ki aawaz sunte to foran khaamosh ho jaate aur puri Azaan sunte.
Isi tarah agar koi Tilaawat e Qur’an kar raha ho to aap khaamoshi ke saath sunte.
***********
4 saal 6 maah ki umr me aap ko Hazrat Sadid-ud-deen Huzaifa Shaami ke paas taaleeme deen ke liye rakha gaya.
Aap arabi ke har harf ke baare me gehra mutaalah karke sikhne lage.
Ek baar Hazrat Huzaifa Shaami ko Huzoor sallallāhu alaihi wa sallam ne khwaab me farmaaya ke ‘Ye ladka ALLĀH ta’ala ka wali hai aur meri nasl se hai. Tum is ka khas khayaal rakhna.’
14 saal ki umr me aap Haafiz e Qur’an hue.
Aap Hadees, Tafseer, Fiqh aur dusre uloom ke bhi maahir hue.
*************
Is ke baad aap apne waalidain se ijaazat lekar Hajj ke liye rawaana hue. Aap ne apne saath kuchh bhi saamaan nahi liya.
Raaste me jab aap Baitul Muqaddas par pahunche to Hazrat Baayazeed Bustami rahmatullāhi alaihi apne mureedo ke saath waha tashreef farma the.
Hazrat ne aap ki paishani chumkar farmaaya ‘Huzoor sallallāhu alaihi wa sallam ne mujhe khwaab me bashaarat di hai ke bahot jald tumhari mulaaqat Badi-ud-deen Ahmad naam ka ek shakhs se hogi. Jab tum use milo to tum ne jo ilm haasil kiya hai wo use ata kar dena ke ye us ka haq hai. Is liye main is ke liye tayyar hu.’
Is tarah aap Hazrat Baayazeed Bustami ke mureed hue aur Tayfuria silsila me daakhil hue.
Phir peer ki ijaazat lekar Hajj ke liye rawaana hue.
Ek baar aap Baitullāh ka tawaaf kar rahe the ke ghaib se aawaaz sunai di ke ‘Aye Badi-ud-deen ab tumhe Madeena ke liye nikalna chaahiye.’ Ye sunkar aap foran Madeena ke liye rawaana ho gaye.
Jab aap Roza Mubarak par pahunche aur Huzoor sallallāhu alaihi wa sallam ko salaam paish kiya to Roza mubarak ke andar se aap ko jawaab mila.
Kuchh din Madeena me guzarne ke baad aap waapis aaye aur Hazrat Ali Halbi ke paas charo aasmaani kitaabo ka ilm haasil kiya aur ilaawa in ke dusri kitaabo ka ilm bhi haasil kiya.
***********
Phir aap Huzoor sallallāhu alaihi wa sallam ke hukm se Hindustan ke liye rawaana hue.
Safar me aap roz Roza rakhte the. ALLĀH ta’ala ki taraf se roz aap ko 2 roti ata ki jaati, jis me se ek aap khairaat me de dete.
Is tarah aap jahaaz se Yemen hote hue Hindustan aaye.
Aap Surat (Gujarat) shaher me pahunche. Yaha aap ne Muslim aur Ghair-muslim sab ko Islaam ki sahi ta’aleem dena shuru kiya.
Phir kuchh arse baad aap Khambhat gaye. Yaha aap ki koshish se Raja Jaswant Singh ne Islaam apnaya, Aap ne us ka naam Jaffar Khan rakha. Us ne kai Masjiden banai.
Phir aap Bhedoch jaakar rooke.
Phir Khambhat se jahaaz me Hajj ke liye gaye. Waha se Iraq aur Bukhara hokar Shaam gaye.
Phir Hindustan aakar Ahmedabad gaye. Yaha Raja Balwaan Singh ne Islaam apnaaya aur aap ne us ka naam Zoraawar Khan rakha.
Phir Khambhat aakar jahaaz me Hajj ke liye gaye. Waha se Iraq gaye aur Hazrate Ghauṡ e aazam radiy-Allāhu ta’ala anhu se mile. Us waqt Ghaus e aazam ke jalaal ka ye aalam tha ke koi insaan aap ke saamne nahi thehar sakta tha aur koi parinda aap ke upar se guzar nahi sakta tha. Agar koi parinda aasmaan me aap ke upar se guzarta to jalkar mar jaata. Aap ne Ghauṡ e aazam se farmaaya ‘Humare naana jaan to rahmatallil aalameen kehlaate hain.’ Yeh sunkar Ghauṡ e paak ne khud ko badal diya aur sukoon waale ban gaye.
Phir aap Badkhashan hokar Misr pahunche.
Yaha pure ilaaqe me koi beemaari phail gai thi aur Hakeem Ahmad Misri ke ilaaj se bhi logo ko shifa nahi mil rahi thi. Aap ne Hakeem Ahmad Misri se farmaaya ‘Ye beemaari ALLĀH ki na-farmaani aur gunahao ki wajah se hai. Yaha ke log yateem bacho ka maal chhin lete hain.’ Ye sunkar us ne foran tauba kar li aur aap ka mureed ban gaya. Aap ki naseehat se dusre ilaaqe ke logo ne bhi yateemo ka maal lautana shuru kar diya. Phir Aap ki dua se ALLĀH ta’ala un ko is beemaari se najaat ata farmai.
Phir aap Neem Roz gaye aur Yaha Hazrat Shaah Lutfullāh Aap ke mureed hue. Aap ne unhe taaleem e deen ke liye Najaf bheja.
Phir aap Hindustan aakar pure ilaake ka aur Sri Lanka me bhi gasht karte rahe.
Aap jab Ajmer pahunche to logo ne aap ko waha se chale jaane ke liye kaha aur kaha ke ‘Yaha jang me bahut saare musalman mar gaye hain aur Taraghadh par un ki laashen padi hai aur raat ko waha se Allāhu akbar (takbeer) ki aawaaz aati hai.’
Aap ne logo se farmaaya ‘Agar main is pareshani ko door kar du to tum meri baat maanoge?’ Logo ne kaha ‘Zaroor.’
Aap ne apne shaagirdo ko bhejkar un shohada ko janaaza padhakar dafn karne ke liye kaha. Is ke baad wo aawaaze aana band ho gaya. Logo ka khauf door hua aur un ko itminan hua aur sab ne musalman hokar Hazrat se bai’at ki.
Jab aap Lucknow pahunche to ek shakhs ne aakar arz kiya ke ‘Meri biwi 4 mahine se beemaar hai aur aap us ki sehat ke liye dua karen.’ Aap ne use Makhdoom Shaah Meena ke se milne ke liye kaha aur saath me apne shaagird Shaikh Shahaab-ud-deen ko jaa-namaaz aur ek thaili di aur farmaaya ‘Hazrat Qawaam-ud-deen ki dargaah par jaakar Shaah Meena ko ye do cheezen dena aur un ko dua karne ke liye kehna.’
Jab wo log us aurat ko lekar waha pahunche to dekha ke Shaah Meena abhi bache hain. Unho ne dono cheeze un ko dekar saari baat bataai. Shaah Meena wuzu karke jaanamaz par khade hue to aap ke pair kaampne lage. Unho ne Shaikh Shahaab-ud-deen ko dua karne ke liye kaha. Unho inkaar kiya magar israar aap karne par Shaah Meena ne Dua ki aur Shaikh Shahaab-ud-deen ne ‘Aameen’ kaha.
Un ki dua se foran us aurat ki beemaari door hui aue wo hosh me aakar khaana maangne lagi. Unho ne us thaili me se chaawal aur sirka nikaalkar use khilaaya. Use khaane ke baad use zyada achha mehsoos hone laga.
Is ke baad Makhdoom Shaah Meena mash’hoor ho gaye aur log aap ke paas apni takleefo aur beemaariyo ke liye dua karaane ke liye aane lage.
Is tarah Hazrat Badi-ud-deen Madaar Shaah ne Shaah Meena ko Qutub ka darja ata farmaaya.
Ek baar ek budhi aurat aap ke paas aakar kehne lagi ‘Aaj ek ladka paida hua hai, Magar wo doodh nahi pee raha hai.’
Aap ne farmaaya ‘Ye bacha ALLĀH ka wali hai aur Maah e Ramazaan shuru ho gaya hai. Is liye wo din ke waqt me doodh nahi pee raha hai.’
Aap jab Kannauj pahunche to waha qareeb me sukhe taalaab me rehne lage. Ek baar kuchh logo ne aakar kaha ‘Kannauj me Cholera ki beemaari paaili hai aur zyada ta’adaad me log mar rahe hain. Aap hamare liye dua karen.’
Aap ne farmaya ke ‘Main ALLĀH se dua karunga. Magar yaha ke logo ko Islaam apnaana hoga.’
Logo ne kaha ‘Agar 40 din tak kisi ki maut nahi hoti hai to hum Islaam apnayenge.’
Aap ne Qaazi Shahaab-ud-deen Kidwai ko bhejkar dua karne ke liye kaha. Unho ne jaise hi Kannauj ki had par khade hokar dua ki, shaher me se aik aag ka gola nikalkar upar uthne laga. Qaazi Shahaab-ud-deen Kidwai apni roohaani taaqat se us aag ko nigal gaye aur Makanpur waapas aaye.
Is ke baad 39 din guzar gaye aur Kannauj me kisi ki maut nahi hui. Logo ne jama hokar mashwara kiya ke agar kal 40we din bhi agar koi nahi marega to sab ko Islaam apnana hoga. Aisa karte hain ki kisi budhe shakhs ko maar daalte hain.
Jab logo ne Bhikha aur Gopal naam ke do daane shakhs ko saari baaten batai to unho ne logo se kaha ‘Jo us aag ko nigal sakta ho wo waapas baahar bhi nikal sakta hai.’
Aur dono ne tay kiya ke hume Islaam apnaana hai. Un ki baat sunkar sab logo ne bhi Islaam apnaaya.
*************
Aap ke chehre par ALLĀH ta’ala ne aisa noor ata farmaaya tha ke agar koi aap ko bagair hijaab ke dekh leta to be-ikhtiyaar aap ke qadmo me gir padta aur kalma e shahaadat padh leta.
Aap paani par is tarah chal sakte the jis tarah zameen par ya ret par chalte ho.
Aap ALLĀH ke fazl se apne takht par baithkar jaha jaana chahte waha pahunch jaate the.
*************
Karaamat :
‾‾‾‾‾‾‾‾‾‾‾‾‾
(1) Hazrat Ghauṡ e aazam Abdul Qaadir Jeelaani radiy-Allāhu ta’ala anhu ki bahen Sayyeda Bibi Naseeba ko koi aulaad nahi thi. Unho ne apne bhai se kaha ‘Kaa’inat ki har cheez aap ka faiz o barkat haasil karti hai. Magar main aulaad se mehroom hu. Aap mere liye dua kijiye ke ALLĀH ta’ala mujhe aulaad ata farmae.’ Ghaus e aazam ne farmaaya ‘Tumhare naseeb me aulaad hai, magar wo Hazrat Madaar shah ki dua se hai. Wo bahot jald Baghdad tashreef laayenge. Jab wo aaye to tum un se ilteja karna. Agar wo tumhare liye dua karen to in sha Allāh ALLĀH tumhe ata farmaega.’
Kuchh dino ke baad Hazrat Madaar Shaah Baghdad tashreef laaye. Sayyeda Naseeba ne jab ye khabar suni to foran aap ki baargah me haazir hui aur dua ke liye kaha. Aap ne farmaya ‘ALLĀH ta’ala tumhe 2 bete ata farmaega agar tum un me se ek ko Islaam ki isha’at ke liye dene ke liye raazi ho to.’ Sayyeda Naseeba is ke liye raazi ho gai.
Is ke baad aap ki dua se Sayyeda ko 2 bete hue. Jin ke naam Sayyed Muhammad aur Sayyed Ahmad rakhe gaye.
Kuchh arse baad jab Madaar shah teesri baar Baghdad tashreef laaye aur kuchh din ke liye waha qayaam kiya.
Ek din Sayyed Muhammad ghar ki chhat par khel rahe the ki achanak waha se niche gire aur foran un ka inteqaal ho gaya. Ye dekhkar Sayyeda ki aankho me aansoo aa gaye. Itne me unhe yaad aaya ki maine apne wade ke mutabik is bete ko Madaar shah ko dene ka tay kiya tha.
Chunanche wo Madaar Shaah ki baargah me apne bete ki laash ko lekar pahunchi aur kaha ‘Aap ki dua se ALLĀH ta’ala ne mujhe 2 bete ata farmae the. Jin me se aik mujhe rakhna hai aur dusra jise aap ko dena tha us ka inteqaal ho gaya hai.’ Aap ne farmaaya ‘Theek hai, wo beta mujhe de do.’ Sayyeda ne kaha ‘Magar jo mar chuka hai use kisi ko nahi de sakti.’
Ye sunkar aap ne laash ke qareeb khade hokar farmaaya ‘Aye Jamaal-ud-deen Jaameman Jannati, ALLĀH ta’ala ke hukm se khade ho jaao.’ Ye kehte hi wo ladka zinda hokar khada ho gaya.
Baad me wo isi naam se mash’hoor hua. Aur us ka laqab ‘Jameel Shah Daatar’ bhi hai. Aur us ka mazaar Helsa Jatinagar (Bihar) me hai.
(2) Kannauj me rehne wale ek shakhs ko aulaad nahi thi. Ek martaba wo apni biwi ke saath Madaar Shaah ke paas aaya. Aap ne us ke liye dua ki. Us ke baad us ki biwi ko hamal raha magar us ko jo bacha paida hua wo sirf gosht ke tukde jaisa tha us ka sar, haath ya pair nahi the. Wo shakhs use lekar Madaar Shaah ke paas aaya. Aap use dekhne lage aur phir aap ne kuchh gungunana shuru kiya. Us ke saath hi us bache ne shuru kiya aur phir ALLĀH ta’ala ne use zindagi ata farmai aur insaani shakl o soorat ata farmai. Aur us ka naam ‘Alrai’ rakha gaya.
(3) Ek baar aap apne mureed Hazrat Khwaja Sayyed Abu Turaab Fansoor ke saath ek baagh me sair kar rahe the. Aap ne ek insaan ki khopdi dekhi. Aap ne us se puchha ‘Tum kaun ho aur kya ho?’ ALLĀH ke hukm se wo khopdi bolne lagi aur us ne kaha ‘Main is baagh ki nigraani ka kaam karta tha aur apne bacho ki parwarish karta tha. Magar ek din achaanak mujhe maut aa gai. Aur 12 saal se main yahi par dafn tha. Aur mere gunaaho ki wajah se mujh par azaab ho raha tha. Kisi ko meri koi parwah nahi hai. Aur main kahi ka nahi raha.’
Ye sunkar aap ne ALLĀH se dua ki. Aap ki dua se ALLĀH ne apni rahmat se use zinda kiya aur jism ata farmaaya. Aap ne use ‘Zamzama’ naam diya aur us ke baad wo 12 saal tak dunya me raha.
(4) Ek baar ek aurat Madaar Shaah ki baargaah me aai aur kaha ‘Mujhe bahot duao ke baad ALLĀH ne ek beta diya tha. Magar bad-naseebi se bachpan me hi us ka inteqaal ho gaya. Ab main tanha aur be-sahara hu. Aap ki dua se bahut se logo ne faiz paaya hai to main kyun mehroom rahu?’
Aap ko raham aa gaya aur aap us bache ki qabr par gaye aur farmaya ‘Kum bi iznillāh.’ Aur foran wo bacha zinda hokar kalma padhne laga.
Magar us bache ne Hazrat se iltija ki ke ye dunya gunaho aur khwahishaat se bhari hai aur us me koi sukoon nahi. Haqeeqi sukoon to Jannat me hai. Is liye main is dunya me waapas aana nahi chahta.’
(5) Ek baar Madaar Shash ek nadi ke kinaare baithe the. Itne me ek machhyaare (maahigeer) bhaagkar aaya aur bataaya ke ‘Ek saudagar kashti me apna maal lekar safar par nikla tha. Kuchh der baad wo kashti dariya me doob gai.’ Aap ne waha se geeli mitti li aur use dekar farmaya ‘ Jis jagah par wo kashti doob gai hai waha jaakar is mitti ko daal do.’ Us ne waha jaakar jab wo mitti dariya me daali to use ye dekhkar ta’ajjub hua ke wo kashti paani ke upar salaamat laut aai aur tairne lagi. Ye dekhkar wo apne saathiyo ke saath Hazrat ke paas aaya aur aap ki daawat par wo sab musalman ho gaye.
(6) Ek martaba aap Surat pahunche to aap ne ek maqaam par logo ki bheed dekhi. Aap waha pahunche to dekha ke ek na-bina shakhs raaste me baitha tha. Jab us shakhs ko Hazrat ki haazri ka pata chala to us ne aap se fariyaad ki. Aap ne foran wuzu kiya aur phir usi paani ko us shakhs ki aankho par lagaya. Foran us shakhs aankho ki roshni durust ho gai. Yeh karaamat dekhkar aas-paas se ilaake ke log aap ki bahut izzat karne lage aur apne naam ke sath Shah lagane lage.
(7) Hazrat Ahmad ghud-sawaari me bahot maahir the. Ek baar wo apne ghode par sawari karte hue soch rahe the ki main dunya me sab se zyada khush aadami hu aur mujhe kisi tarah ki koi pareshaani nahi hai. Bad-qismati se un ka ghoda gir gaya aur un ko bhi neeche girne ki wajah se gehri chot aai aur dard aur khoon nikal jaane ki wajah se be-hosh ho gaye. Jab Madaar shah aap ke paas aaye to aap ne farmaaya ‘Kab tak tum yun be-hosh pade rahoge. Utho aur ALLĀH ta’ala se tauba karo.’ Ye sunkar Hazrat Ahmad jaage aur tauba ki. Unho ne Hazrat ke qadmo ko chhune ke koshish ki. Magar dard ki wajah se na kar paaye. Madaar shah ke pukarne par unka ghoda waha aa gaya aur aap Hazrat Ahmad ko qareeb ke gaanv me ek jarrah (doctor) ke paas le gaye aur ilaaj ke liye kaha. Us ne jaanch karke kaha ‘Is shakhs ka ilaaj karna mere bas ki baat nahi. Shaayad gehre jakhm ki wajah se yeh mar bhi sakta hai.’
Ye sunkar aap ne waha zameen par padi anaar ki chhal ko uthaaya aur use piskar un ke jakhmo par lagaaya to khoon nikalna band ho gaya. Chand dino baad Hazrat Ahmad bilkul tandurast ho gaye. Aur aap ke mureed hue aur Madaar Shaah ke saath Makka ke safar me aap ke saath rahe.
(8) Ek martaba Madaar Shaah Bengal ke ilaaqe me the. Waha qahet pada tha. Logo ne Aap ki baargaah me haazir hokar arz ki ‘Kitne mahine se baarish nahi ho rahi hai aur is wajah se sab bahot pareshaan hain. Paani ki pareshaani hai aur hamari kheti bhi sukh kar barbaad ho rahi hai.’ Aap ne baargaah e ilāhi me dua ke liye apne haath uthaaye aur farmaaya ‘Aye ALLĀHQ Tu Qaadir e mutlak hai. Main ek insaan hu aur aasi hu. Teri baargaah me dua karta hu ki teri makhlooq par raham farma de aur tere Habeeb Muhammad Mustafa sallallāhu alaihi wa sallam ke sadqe me in par rahmat naazil farma.’
Is ke saath hi tez baarish shuru ho gai aur charo taraf paani paani ho gaya. Yaha tak ke jo log Madaar Shaah ki baargaah me aaye the un ko bhi paani ki wajah se apne gharo tak waapas jaana mushkil ho gaya.
(9) Ek baar Madaar Shaah naher ke kinaare baithe the. Itne me ek Jogi ek botal lekar aaya aur kaha ‘Ye Aksir hai’ Aap ne is ke baare me puchha to us ne kaha ‘Ise taambe ki cheez par lagao to use sona bana deta hai.’ Aap ne us botal ko naher me phenk diya. Ye dekhkar wo Jogi gusse me aa gaya aur aap se kehne laga ‘Tum ne meri zindagi bhar ki mehnat barbaad kar di.’ Aap ne farmaaya ‘Insaan khud aksir hai. Lihaaza kisi aur cheez ko taanbe me se sona banaane ke liye istemaal kyun karna chaahiye?’
Phir aap ne kaha ‘Ye aksir dikhta kaisa hai?’ Us ne kaha ‘Mitti jaisa.’ Aap ne waha se mitti uthaakar farmaaya ‘Ye mitti bhi aksir jaisa kaam kar sakti hai. Ise le jaao aur jitna chaho sona bana lo.’ Use yaqeen na hua aur us ne jaanch karne ke liye taanbe ke bartan par lagaaya to wo sone ka ho gaya.
Ye dekhkar wo aap ke qadmo me gir gaya aur Islaam me daakhil ho gaya. Aur kuchh dino ke liye aap ki khidmat me bhi raha.
(10) Kabul me qayaam ke dauran ek martaba Hazrat Shaah e Madaar ne apne khaadimo ko paani laane ke liye bheja. Wo log qareeb me ek kuen par gaye aur jab wo us me se paani nikal rahe the to waha rehne wale kuchh logo ne unhe roka. Khaadimo ne aakar Hazrat ko ye baat bataai. Aap ne unhe farmaaya ‘Kuen par waapas jaao aur us se kaho ke Shaheed e Karbala ke pote ne tumhe bulaya hai.’ Khaadimo ne waisa hi kiya. Aap ka farmaan sunkar kuen ka paani tez raftar se upar aane laga. Aur jab khaadim ne bartan me paani bhar liya to paani waapas apni jagah par chala gaya. Ye sab dekhakar wo sab log sharminda ho gaye aur Hazrat ki baargah me aakar qadmo me gir gaye aur muafi maangi.
(11) Ek baar Madaar Shaah Mevat ke pahaadi ilaaqe se guzar rahe the. 52 Dakaito ke ek giroh ne aap ko ameer suadagar samajhkar aap ko lootne ke liye hamla kiya. Aap ne apne chehre par se naqaab hata diya. Aur us noor ki wajah se wo sab log andhe ho gaye aur chillaane lage. Aur Hazrat ke qadmo me girkar muafi maangne lage. Aap ne farmaaya ‘Main tumhe ek hi shart par muaf kar sakta hu ke tumhe ye loot karna aur raahgiro ko pareshan karna chhodna hoga.’ Un logo ne kaha ‘Hum waada karte hain ki abhi se ye burai ka kaam chhod denge aur mehnat karke rozi kamaenge.’ Is ke saath hi sab ko aaankho ki roshni phir se mil gai.
Wo sab log musalman ho gaye aur aap ke mureed hue.
(12) Ek baar aap wa’az farma rahe the. Ek shakhs waha se guzra to logo ki bheed dekhkar us ne Shaikh Mohammad Baqaullāh se is ki wajah puchhi. Unho ne bataaya ‘Hamare Peer Qutb-ul-Madaar Shaah wa’az farma rahe hain.’ Magar wo shakhs aap ke martabe ko maanne se aitraaz karne laga.
Madaar Shaah us ke dil ki baat jaankar use qareeb bulaya aur farmaaya ‘Tumhare ghar ke saamne jo paid hai wo kis ka hai?’ Us ne kaha ‘Wo bahot puraana darakht hai aur bijli girne ki wajah se sukh gaya hai aur us par koi patte ya phal na hone ki wajah se ye bataana mushkil hai ki wo kis cheez ka paid hai. Aap ne use us paid ke saamne dekhne ke liye kaha aur farmaaya ‘Ab batao ye kaun sa paid hai?’ Jab us ne paid ko dekha to wo hairat me ye dekhkar pad gaya ke wo paid patto aur naariyal se bhara hua hai.
Wo Hazrat ke qadmo me gir gaya aur muafi maangi. Aap ne use us paid ka khayaal rakhne ke liye kaha aur farmaaya ‘Jo is paid ke naariyal ka paani piyega use aankho ki beemaari nahi hogi.’
(13) Qaazi Maulana Shahaab-ud-deen Malek-ul-Ulma Madaar Shaah ki izzat nahi karte the. Ek baar unho ne aap se kai sawaal kiye aur aap ne har sawaal ka jawaab diya. Phir bhi wo nahi maane.
Ek baar unho ne ek zinda shakhs ko kafan pehnakar janaaze me rakhkar Hazrat ki baargaah me bheja aur Madaar shah se namaaz e janaaza padhaane ke liye kaha. Aap ne namaaz e janaaza padhai aur apne khaime me chale gaye.
Madaar shaah ko koi ilm nahi hai ye sochkar wo log janaaza kholkar kafan ko hatane lage. Jaise hi kafan khola un logo nbe dekha ki wo shakhs mar chuka hai.
Qaazi Maulana Shahaab-ud-deen ko jab ye pata chala to Madaar shah ki baargaah me aaye to apni gustakhi ke liye muafi maangi.
*************
Aap Hazrat Khwaja Baayazeed Bustami rahmatullāhi alaihi ke mureed aur khalifa hain.
Aap se tareeqat ka ‘Madaariya’ silsila jaari hai.
Aap ke khulfa :
(1) Khwaja Abu Muhammad Arghoon
(2) Sayyed Maulana Hisaam-ud-deen Salaamati Jaunpuri
(3) Sayyed Muhammad Jamaal-ud-deen Jaaneman Jannati Bukhari
(4) Sayyed Ajmal Bahraichi
(5) Khwaja Abul Hasan Tayfoor
(6) Khwaja Abu Turaab Fansoor
(7) Qaazi Shahaab-ud-deen Kidwai Daulatabadi
(8) Qaazi Mahmood Kintoori
(9) Qaazi Mazhar Kallesar
(10) Qaazi Mutesher Kalhiyari
(11) Sadan Shaah Sarmast.
***********
Aap ke wisaal se pehle aap ne mureedo se farmaaya ke ‘Mere wisaal ka waqt qareeb hai. Is liye paani ka intazaam karke rakhna. Mujhe farishten ghusl denge.’
Ye sunkar mureedo ne aap ko unhe chhodkar na jaane ke liye kaha. Aap ne farmaya ‘Har jaandar ko maut ka maza chakhna hai. Aur main tumhe chhodkar nahi jaa raha hu. Jab bhi tum mujhe yaad karke dua karoge ALLĀH ta’ala tumhari muraad puri farmaega.’
Is ke baad aap puri raat apne kamre me tilaawat e Qur’an karte rahe.
***********
Aap ka wisaal 17 Jamaadi ul awwal 838 Hijri (1434 A.D.) me 596 baras ki umr me hua.
Aap ki namaaz e janaaza Sayyed Maulana Hisaam-ud-deen Salaamati ne padhaai.
Aap ka mazaar Makanpur (Uttar Pradesh) hai.
*********
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sayyed Badi-ud-deen Ahmad Madaar Shaah rahmatullāhi alaihi ke aur Ahle bait Aur Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.