Hazrat Sayyed Siraaj-ud-deen Muhammad rahmatullāhi alaihi

Hazrat Sayyed Siraaj-ud-deen Muhammad rahmatullāhi alaihi :

Alqaab :
‾‾‾‾‾‾‾‾‾‾
Shaah e aalam, Mehboob e Baari, Shehanshaah e Gujarat.

Kunniyat :
‾‾‾‾‾‾‾‾‾‾‾‾‾
Abul Barkaat.

***************
Aap ki wilaadat 17 Zil Qa’ada 817 Hijri (1414 A.D.) ko Peer ke roz Patan, Gujarat me hui.

Aap ke waalid ka naam Hazrat Qut-e-aalam Sayyed Burhaan-ud-deen Abdullāh bin Sayyed Naseer-ud-deen rahmatullāhi alaihi aur waalida ka naam Bibi Aamina urfe Sultaana Khaatoon hai.

Aap apne waalidain ki 12 aulaad me se 11we hain.

Aap Husaini saadaat hain.

Aap ke waalid Sayyed Jalaal-ud-deen Husain Bukhari Makhdoom Jahaaniya Jahaan-Gasht ke pote hain aur Sultaan Muzaffar Shaah ke daur me aap Uch (Punjab) se Patan tashreef laaye. Aur jab un ke bete Sultaan Ahmad Shaah ne Ahmedabad aabaad kiya to un ki guzarish par aap Patan se Ahmedabad tashreef laaye aur Vatva ilaake me sukoonat ikhtiyaar ki.

***************
Aap ki waalida roz khaana khaane se pehle Dua e Shifa padha karti thi. Ek martaba padhna bhul gai to Hazrat Shaah e aalam ne apni waalida ke pait me se buland aawaaz se Dua e Shifa padhna yaad dilaaya. Aap ke yaad dilaane par aap ki waalida ne Dua e Shifa padh liya.

Jab aap Hazrat Shaah e aalam apni waalid ke shikam me the, 7wa mahina chal raha tha. Ek martaba Ramazaan ul Mubarak aap ki waalida namaaz e Tarawih ada kar rahi thi. Ek rak’at me galti ho gai. Aap ne pait me se buland aawaaz se apni waalida ko toka aur sahi alfaaz padhne ki hidaayat farmai.

***************
Aap ki wilaadat ki shab aap ke waalid ko khwaab me Huzoor Sarwar e kaainat alaihi wa sallam ki ziyarat naseeb hui aur Sarkar ne bete ka naam ‘Muhammad’ rakhne ke liye farmaaya.

***************
Aap bachpan se Huzoor Nabi e kareem sallallāhu alaihi wa sallam ki mutaabiat karte.
Aap ki daaya Bibi Haleema bayaan karti hain ke ‘Mera ek ladka Hazrat Shaah e aalam ka hum umr tha. Aap hamesha mere ek hi pistaan se doodh nosh farmaate the aur dusre pistaan ko chhute tak na the use apne doodh sharik bhai ke liye chhod dete the.

Ek martaba mere us pistaan ka doodh khushk ho gaya jis se mera apna bacha doodh pita tha. Us ke baad aap ne ye dastoor bana liya ke apne wale pistaan se aadha doodh nosh farmaate the aur aadha doodh apne doodh sharik bhai ke liye chhod dete the. Yaha tak ke ALLĀH ta’ala ki lutf o ataa se mere dusre pistaan me bhi doodh utar aaya.

***************
Aap paida’ishi Haafiz e Qur’an the.

Aap ne Maulana Qaari Ali Jenki se taalim haasil ki.

Aap bachpan hi se bahot hi zaheen the.
Aap ke haafza ka aalam ye tha ki aap ne apne ustaad se Fiqh e Hanafi ki mash’hoor kitaab ‘Hidaayah shareef’ ko sirf 4 din me yaad kar li. Is kitaab me 2000 safaat (pages) hain.

16 saal ki umr me aap ne tamaam uloom ki taalim haasil kar li.

***************
Ek martaba aap ke waalid e mohtaram Hazrat Qutb e aalam apne hujre me tashreef farma the. Hazrat Shaah e aalam waalid saahab ke hujre me gae to dekha ke waalid mohtaram par Wajd ki haalat taari hai.
Jab waalid saahab ne farmaaya ‘Kyun aaye ho? Kya talab karna chaahte ho?’
Aap nee arz kiya ke ‘Ye meri khush qismati hai ke aise mubarak waqt me main aap ke saamne haazir hu. Main ye chaahta hu ke Ishq e Ilāhi ke samandar ka ek qatra mujhe inaayat farmae aur mujhe sarfaraz farmaen.’
Aap ke waalid e mohtaram aap ke is jawaab se bahot khush hue aur apni aankho se behte hue aansoo ke chand qatre aap ke munh me daal diye. In chand qatro ke faiz se aap ka seena aur qalb munawwar ho gaya.

***************
Aap ki umr jab 11 saal ki thi tab aap ko khwaahish hui ki main apne jadd e amjad (pardaada) Makhdoom Jahaaniya Jahaan gasht ko aalam e waaqiya me deedaar karu aur wo mujhe ‘Ya waladi (Aye mere bete)’ kehkar pukaare.
Makhdoom Jahaaniya Jahaan-gasht ne aap ki is tamanna ko puri farmaaya aur ‘Aye putar’ kehkar aap se khitaab farmaaya.

***************
Aap ne Ahmedabad shaher se door Rasoolabaad me apni khaanqaah banaai. Ye ilaaqa ab Shaah e aalam ke naam se mashhoor hai.

***************
Aap ko ALLĀH ta’ala ne maqaam e Mehboobiyat ata farmaaya hai. Wilaayat ka ye aala darja bahot kam Auliya ko haasil hua hai.
Jin me aap ke ilaawa Gauṡ e aazam Shaikh Sayyed Abdul Qaadir Jeelaani (Mehboob e Sub’hāni), Khwaja Ghareeb nawaaz Moeen-ud-deen Hasan Chishti, Khwaja Sayyed Nizaam-ud-deen Auliya (Mehboob e Ilāhi), Makhdoom Sayyed Ashraf Jahaangeer Simnani rahmatullahi alaihi (Mehboob e Yazdaani) aur Hazrat Soofi Akhlaaq Ahmad saahib Naqshbandi rahmatullahi alaihi (Mehboob e Samad) saamil hain.

***************
Aap ko ALLĀH ne ye in’aam ata kiya tha ki aap jab chaahte Huzoor sallallāhu alaihi wa sallam ka deedaar jaagti aankho se kar lete.

***************
Aap hamesha Sunnat e Rasool par amal karte the aur Huzoor sallallahu alaihi wa sallam ka ishq me aise doobe rehte the ki Sarkar sallallāhu alaihi wa sallam ki shaan me adna si bhi be-adabi ya tauheen bardasht nahi karte the aur khilaafe shariat amal karne walo se sakht muakheza farmate.

Ek martaba kisi ne azaan me Huzoor Rasool-Allah sallallāhu alaihi wa sallam ka naam mubarak sunkar angoothe chumne ka saboot e sharai daryaaft kiya to aap ne farmaya ‘Hairat hai logo ke haalata par ki kisi baadshah ka naam sunkar Khaladallahu mulkhu kehte hue seene par haath rakhkar sar kham karke apni mohabbat o aqeedat ka izhaar karte hain tab is fail ka saboot e sharai kyun nahi puchhte.’

Aap roz raat ko ibaadat aur riyaazat me masroof rehte.

***************
Aap farmaate hain ki
‘Dunya ko uqaba par 3 baato me fazeelat haasil hai aur ye 3 cheezen sirf dunya me hain, uqaba me nahi – (1) Raah e khuda me kharch karna, (2) Kuffar se Jihaad karna, aur (3) Namaaz ke liye takbeer e tehreema jo mo’min ki me’araaj hai aur Huzoor pyare Aaqa sallallahu alaihi wa sallam ki aankho ki thandak hai.
Uqaba Daar-ul-in’aam ya Daar-ul-jazaa’ hai.

***************
Aap ne tamaam zindagi logo ko taaleem e deen aur dars dene me guzaari.
Aap har Jum’aa ko apni mehfil me aane waalo ke sawaalo ke jawaab dete aur wa’az aur naseehat farmaate.

Aap logo ko fuzul kaamo aur fuzul baato me waqt zaaya karne se door rehne ke liye aur apne dilo me dusro ke liye bughz aur hasad door karne ke liye farmaate.
Aur logo ko ALLĀH ta’ala par bharosa (tawakkal) rakhne ki aur us ki ibaadat karne aur us ki Hamd o Sana karne ki naseehat dete.

***************
Aap ki mash’hoor kitaaben :

(1) Lamia-at-Taariq-al- Burhaaniya
(2) Risaala-e-Saadiqiya
(3) Munaajaat-ul-Aashiqeen.

♦ Aap ke Jum’aa ki taqreer o wa’az ka majmua ‘Khutba-e-Shaahiya’ ke naam se mash’hoor hai.

*****************
Karaamat :
‾‾‾‾‾‾‾‾‾‾‾‾‾‾
(1) Ek Martaba aap apne ustaad Maulana Qaari Ali Jenki rahmatullāhi alaihi se Milne gae. Wo Tilaawat e Qur’an me masroof the. Itne me Ustaad e mohtaram ne farmaaya ‘Dil chaahta hai ke is waqt garm roti aur halwa hota to khaata.’
Ye sunkar aap ne foran apni takhti ke neeche haath daal kar halwa aur roti Ustaad ki khidmat me pesh ki. Ustaad ko is par badi hairat hui.
Phir batore imtihaan Ustaad ne kaha ke ‘Aap ne nihaayat nafis wa sheerin garma garm halwa khilaaya lekin mere ghar waalo ke liye to kuchh tabarruk inaayat farmae.’ Aap ne dobaara apne haath ko takhti ke neeche daala to phir se haatho me garma garm roti aur halwa maujood tha. Aap ne Ustaad ki khidmat me pesh kar diya. Aap ke Ustaad e mohataram samajh gae ke ye halwa aur roti Aap ne apni karaamat se ghaib se ata farmaaya hai.

(2) Ek martaba Aap apne Ustaad Maulana Qaari Ali Jenki se ‘Mizaan us sarf’ ki taalim haasil kar rahe the. Aap ke Ustaad ne farmaish ki ke ‘Mujhe chaandi ke sikke aur gaaye ka doodh inaayat farmaen.’
Aap ne foran apni aastine Ustaad ke aage badhaai. Ek aastin me se taaza doodh se gilaas bhar kar Ustaad ki khidmat me pesh kiya. Phir dusri aastin se khankhanate hue chaandi ke sikke Ustaad e mohtaram ke aage rakhe. Ustaad ko ye karamat badi hairat hui.

(3) Ek martaba aap ke waaild Hazrat Sayyed Qutb e aalam apne saahabzaado ko saath lekar Hazrat Maulana Ali Sher Patani ke madrase par jaane ki tayyaari kar rahe the.
Hazrat Shaah e aalam apne waalid ke saath un ke ghode par sawaar hona tha. Chhoti umr ki wajah se aap ke liye alag se ghod nahi tha. Dusre bhai apne ghode par sawaar the.
Kisi bhai ne aap ko chhedne ke liye ye keh diya ke ‘Tumhare liyes ghoda nahi hai. Tum to paidal hi waalid saahab ke ghode ke saath saath daudoge.’
Aap ne qareeb ki deewaar par sawaar hokar us ko ed di. Deewaar foran ghoda ban kar daudne lagi. Hazrat Qutb e aalam jab ye maajra dekha to foran aap ko neeche utaar liya aur deewaar se mukhaatib hokar farmaaya ‘Thaher jaa.’
Us ke baad Hazrat Sayyed Qutb e aalam ne farmaaya ‘Alhmadulillāh. Aaj is farzand ko mere waalid e girami Hazrat Sayyed Naasir-ud-deen Mahmood Nausha Bhukhari rahmatullāhi alaihi ‘Maqaam e Mahmoodi’ ata hua.’

(4) Ek martaba Sultaan Mahmood Begda Aap ki baargaah me haazir hue aur arz kiya ‘Aaj besh qimati jawaahiraat bataure tabarruk ata kijiye.’
Ye sunkar aap muskurae aur ek khaadim se farmaaya ‘Chand khwaan (thaal) me dariya e Saabarmati se ret bharkar le aa.’ Khaadim hukm ke mutaabiq khwaan me ret bharkar le aaya. Aap ne ret se bhare hue un khwaan par ek nazar daali. ALLĀH ke fazl se un tamaam khwaano ki ret besh qimati jawaahiraat t me tabdil ho gai.

Hazrat ki is azeem karaamat ko dekhkar be-saakhta Sultaan Mahmood Begda ki zabaan se ye Sher nikal gaya :
‘Shaahe ke khaak raaba e nazar kima kunad,
Aaya buwad ke gosha e chashm e bima kunad.’

Ye sunkar Hazrat Shaah e aalam muskurae aur jawaahiraat se bhare hue khwaan Sultaan Mahmood Begda ko inaayat farmakar rukhsat kiya.

(5) Ek martaba Qaazi Najm-ud-deen Hazrat Shaah e aalam ki kKhidmat me haazir hue. Us waqt makaan ke sehen me ek lakdi padi hui thi. Aap ne Qaazi Najm-ud-deen ko wo lakdi lane ke liye farmaaya aur apne daste mubarak me lekar us par kuchh dam kiya. Dekhte hi dekhte wo lakdi sone ki ho gai. Aap ne wo lakdi Qaazi Najm-ud-deen ko ata farmaakar irshaad farmaaya ‘Qaazi saahab! Ise apne ghar le jaaiye, ghar waalo ke kaam aaega.’
Qaazi Najm-ud-deen ne arz kiya ‘Huzur! Aap ka ye tohfa dil o jaan se qubool hai. Lekin meri dili muraad kuchh aur hai. Maine Aap ki baargah me haazri kisi duniyawi nafe ki khaatir ikhtiyaar nahi ki hai. Mujhe to mera dili mudda’a ata karke surkh roo farma dijiye.’ Aap ne farmaaya ‘Ye bhi lo aur wo bhi lo.’
Phir aap ne Nigaah e wilayat ki ek tavajjoh se unhe tamaam Maqaamaat e Sulooq tay kara diye.’

(6) Ek martaba chand taajiro ka jahaaz kisi bandargaah ke qareeb toofaan me phans gaya tha. Jahaaz me sawaar logo ne khaufzadaa hokar chillaana shuru kar diya.
Us jahaaz me chand faqeer bhi sawaar the. Un faqeero ne kaha ke ‘Ghabraao nahi, In sha Allāh Humara jahaaz doob nahi sakta, Is liye ke az raah e nawaazish humare yaad karne se Sarkar Shaah e aalam tashreef le aaye hain aur humare jahaaz ki hifaazat farma rahe hain.’
Jab logo ne dekha to waaqai ek nihaayat haseen o jameel nooraani surat waale buzurgh toofaan se jahaaz ko khinchkar nikaal rahe hain. Jahaaz ko toofaan se nikaalne ke baad wo buzurg ghaa’ib ho gae.
Wo taajir un faqeero se pata maaloom karke Hazrat Shaah e aalam ki baargaah me aaye. Hazrat ke nooraani chehre ke deedaar karke unhe pata chala ke ye wo hi buzurg hai jo toofaan me madad karne ke liye tashreef laaye the.

(7) Hazrat Ghaazi Mohammad rahmatullāhi alaihi ko koi aulaad nahi thi. Ek martaba wo apne Peer Harzat Qutb e aalam rahmatullāhi alaihi ki baargaah me haazir hokar dua kew liye iltija karne lage. Harzat Qutb e aalam ne unhe apne saahabzaade Shaah e aalam rahmatullāhi alaihi ke paas bheja. Aap ne farmaaya ‘Agle Jum’aa ko tumhe Huzoor Rasool-Allāh sallallāhu alaihi wa sallam ke deedaar ki sa’adat naseeb hogi. Unhi ki baargaah me fariyaad rakh dena.’ Ye sunkar Hazrat Ghaazi Mohammad be-qaraar hokar Jum’aa ka intazaar karne lage. Jum’aa ko ishq o adab ke saath Durood shareef padhte hue so gaye. Khwaab me Huzoor Sarware kaa’inat sallallāhu alaihi wa sallam ki ziyarat musharraf hue aur unho ne Sarkar ko salaam paish kiya ‘Assalatu wa salaamu alaika Ya Rasool-Allāh’. Sarkar ne un ki hatheli par 3 martaba harfe ﺡ tehreer farma diya. Subah bedaar hokar aap khushi khushi Shaah e aalam ne sab se pehle to unhe seene se lagaaya aur phir un ki aankho ko bosa diya aur farmaaya ‘Mubarak ho, tumhe 3 farzand ata honge aur un ke naam Hameed, Haamid aur Hammaad honge aur teeno saahib e karaamat honge. Aur isi tarah ALLĀH ke apne karam se Hazrat Ghaazi Mohammad ko 3 bete ata farmae.

(8) Ek martaba Hazrat Meer Sadr-ud-deen Bhikhari Hazrat Shaah e aalam ke deedaar ke iraade se Aap ki khaanqaah me haazir hue lekin Hazrat ki mulaaqaat na ho saki. Un ke saathi waapas jaane lage lekin unho ne dil me iraada kiya ke jab tak meri aarzoo puri na hogi me waapas na jaaunga.
Abhi dil me ye socha hi tha ke foran Hazrat ne unhe talab farmaaya. Jab wo haazir hue to Aap ne farmaaya ‘Aao Sadr-ud-deen! Hum Hazrat Ādam alaihis salaam ke Naqsh e qadam ki ziyarat kar aayen.’ Unho ne dast basta arz kiya ‘Jaisa Irshaad e aali ho.’
Aap foran uthe aur Chandola taalaab ki taraf tezi se chale aur Hazrat Sadr-ud-deen bhi Aap ke pichhe pichhe gaye. Unho ne dekha ke Taalaab ke kinaare 2 ghode saaz o saamaan ke saath aarasta khade hain. Ek Ghode par Hazrat Shaah e aalam khud sawaar hue aur Hazrat Sadr-ud-deen dusre ghode par sawaar hone ka farmaaya.
Sawaar hote hi un ghodo ne par khole aur fizaa me udne lage aur palak jhapkne ki der me dono Sarandip pahunch gaye aur Naqsh e Paa e Hazrat Ādam alaihis salaam ki ziyarat se musharraf hue. Aur phir unhi ghodo par udkar waaapas Chandola Taalaab ke kinare aaye. Phir wo ghode gaa’ib ho gaye.

***************
Ek martaba Hazrat Shaah e aalam Huzoor Sarware kaa’inat sallallāhu alaihi wa sallam ki ziyarat se musharraf hue to aap ne baargaah e Nabawi me iltija ki ‘Apne qadmo se meri khaanqaah ko zinnat bakhshen.’ Huzoor sallallāhu alaihi wa sallam ne waada farmaaya.
Is ke chand din baad aap bahot beemaar hue aur 10 din tak masnad e irshaad par tashreef na la sake. 10 din baad jab sehatyaab hue aur khaanqaah tashreef le gaye aur apne takht par jalwa afroz hokar talba se farmaaya ke apne sabak nikaalo to wo Bukhari shareef kholkar sabak dikhaane lage to aap ne farmaaya ‘Tumhara sabak to kahi safaat pehle ka hai. Ye aage ka sabak kyun nikaal rahe ho?’ To sab ne kaha ‘Huzoor kal hi to aap ne hume pichhle baab ka daur karaaya hai aur hum ye hadees nahi samajh sake to aap ne is ka ye mafhoom bataaya tha aur yaha hume ye shak hua to aap ne ye baat kehkar humara shak door farmaaya tha.’ Aap ko hairat hui. Sabhi talba ke chehre par sadaaqat ko paaya. Aap foran gardan jhukakar muraaqaba me kho gaye. Talba ko aap ke chehre par paseene ke aasaar nazar aaye. Phir achaanak aap takht se neeche utre aur use bosa dene lage aur aap ki aankho se aansoo jaari ho gaye. Kuchh der tak adab se haath baandhkar khade rahe. Phir farmaaya ‘Ya Jadadi Ya Sayyedi aap ne waada wafa farmaaya.’
Phir aap ne ek ke baad ek tamaam talba ko seene se lagaaya aur farmaaya ‘Tum sab bahot hi khushqismat ho ke Huzoor Sarwar e kaa’inat Pyare Aaqa sallallāhu alaihi wa sallam ne 10 din tak dars diya.’

Is ke baad aap ‘Hum Sabi e Mustufa (sallallāhu alaihi wa sallam)’ ke naam se mash’hoor ho gaye.

Is ke baad aap us takht par kabhi nahi baithe aur use ba-adab ek goshe me rakh diya aur apne liye ek naya takht banaaya.

Aap ke wisaal ke baad aashiqo ne dono mubarak takht ko Shaah e aalam ki masjid me laga diya.
Shaah e aalam baaba ki dua se in takhto ke neeche 2-2 rak’at nafl namaaz padhkar dua karne wale ko ALLĀH ta’ala dunya aur aakhirat me bhalai ata farmaata hai aur har jaa’iz dua qubool farmaata hai.

***************
Pariwaar :
‾‾‾‾‾‾‾‾‾‾‾‾
Aap ki 3 biwiya, 5 bete aur 4 betiya hain.

3 Biwiya :
(1) Bibi Rabia
(2) Bibi Marqi
(3) Bibi Mulgi.

Saahabzaade :
(1) Sayyed Naasir-ud-deen Raju Muhammad (Sattar e aalam)
(2) Sayyed Naseer-ud-deen Muhammad (Shaikh Muhammad)
(3) Sayyed Burhaan-ud-deen Muhammad (Shaah Budhan)
(4) Sayyed Muhammad Beg (Shaah Bhikan)
(5) Sayyed Sultaan Misri.

Saahabzaadiya :
(1) Bibi Faatima
(2) Bibi Zainab
(3) Bibi Khadeeja
(4) Bibi Sughra.

***************
Aap Hazrat Qutb e aalam Sayyed Burhaan-ud-deen Abdullāh rahmatullāhi alaihi ke mureed aur khalifa hain.
Aap se Tareeqat ka ‘(Suharwardi Jalaali) Shaahiya’ silsila jaari hai.

Aap ko Hazrat Shaikh Baba Baarakullāh Chishti rahmatullāhi alaihi se ‘Chishti Nizaami’ silsile ki bhi khilaafat mili hai.
Unho ne hi aap ko ‘Shaah e aalam’ ka khitaab diya.

Aap ke khulfa :
(1) Maulana Shaikh Ahmad Miyan Makhdoom,
(2) Qaazi Sayyed Kamaal-ud-deen Ismā’eel Isfahani,
(3) Sayyed Mohammad Zaahid,
(4) Sultaan Shaah Ghajni,
(5) Malik Qutb-ud-deen,
(6) Malik Shaah Abdul Lateef Daawr ul mulk (Amaran, Jamnagar),
(7) Khawaja Ahmad bin Dosan,
(8) Qaazi Shaah Hammaad,
(9) Maulana Shaikh Muhammad Suharwardi.

***************
Aap ka wisaal 16 Jamaadi uṡ ṡaani 880 Hijri (1475 A.D.) ko hua.

Aap ki namaaz e janaaza Hazrat Qaazi Sayyed Ismā’eel Isfahani rahmatullāhi alaihi ne padhaai.

Aap ka mazaar Ahmedabad (Gujarat) me hai.

***************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaah e aalam Sayyed Siraaj-ud-deen Muhammad rahmatullāhi alaihi ke aur Auliya Allāh aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.