Hazrat Shaikh Abdul Haq Muhaddees Dehlwi rahmatullāhi alaihi

Hazrat Shaikh Abdul Haq Muhaddees Dehlwi rahmatullāhi alaihi :

Laqab :
‾‾‾‾‾‾‾‾
Shaikh e Muhaqeeq.
*****************
Aap ki wilaadat 958 Hijri (1551 A.D.) me Delhi me hui.
Aap ke waalid ka naam Shaikh Saif-ud-deen Turk Bukhari bin Shaikh Sa’adullāh rahmatullāhi alaihi hai.
Aap ke par-daada Agha Muhammad Turk Bukhara se Delhi aaye the.
***************
Bachpan se hi aap ko Ilm e deen sikhne ka bada shauq tha.
Aap ko khel-kood ya sair-tafreeh me waqt zaaya karna pasand nahi tha.
Aap ne apne waalid se Qur’an majeed ki taaleem 3 mahine me mukammal ki aur is ke baad Haafize Qur’an hue.
Aap din aur raat me zyada waqt padhne aur likhne me guzaarte.
***************
988 Hijri (1581 A.D.) me Mughal baadshaah Akbar ne sab mazhab ko milaakar Deen-e-Ilāhi banaaya to aap ne use maanne se inkaar kiya aur farmaya ke ‘Sirf deene Islaam hi sahi hai.’
***************
996 Hijri (1587 A.D.) me aap Hajj ke liye gaye.
Aur phir aap ne 3 saal se zyada majeed taaleem ke liye Makka aur Madeena shareef qayaam kiya.
Aap ne Makka mukarrama me Shaikh Abdul Wahaab Muttaqi rahmatullāhi alaihi ke saath Shaikh Ali Muttaqi rahmatullāhi alaihi ke mazaar par jaaya karte the. Ek roz aap tanha Shaikh Ali Muttaqi ke mazaar par gaye aur iltija ki.
Chunaanche ek raat aap ne khwaab me dekha ke Shaikh Ali Muttaqi Masjid e Haraam me Maqaam e Hanafi me (jaha par Hanafi Imaam namaaz padhaate the) ek takht par baithe hue hain aur aap un ke saamne khade hue hain. Aap ne arz kiya ke Main aap ke khalifa Shaikh Abdul Wahaab Muttaqi ki sohbat me rehta hu. Aap bara e karam un se shifaarish kar dijiye ke wo meri jaanib mutawwajeh ho aur mujh par zyada meharbaani farmaayen. Hazrat ne farmaaya ‘Mutmaeen raho. Aap ka matlab pura ho jaayega.’
Aap ne Shaikh Abdul Wahaab Muttaqi rahmatullāhi alaihi se Hadees, Tasawwuf aur dusre uloom ki taalim haasil ki.
Is ke baad aap ne Hindustan waapas aakar taaleem aur tadrees shuru kiya.
Aap ne khaanqaah aur madrasa wa taameer ki jis me talba ko rehne ka intazaam kiya.
1001 Hijri (1592 A.D.) me aap ne Hazrat Moosa Shaheed Multani Qaadri rahmatullāhi alaihi se bai’at ki.
***************
Aap ne taqreeban 60 kitaaben likhi hain.
Aap ki mashhoor kitaaben :
(1) Ash’at-ul-Lam’at (Sharah e Mishkaat Shareef)
(2) Taarikh-ul-Madeena
(3) Madaarij-un-Nabuwwah
(4) Akhbaar-ul-Akhyaar (Auliya e Hindustan ka bayaan)
(5) Taarīh-e-Haqqi
(6) Takmeel-ul-Eimaan
(7) Maraaj-ul-Bahrain
(8) Fahras-at-Tawaaleef (Arabi)
(9) Mo’min ke maah o saal.
Is ke ilaawa aap ne bahot saari Najam likhi hain.
***************
Aap Hazrat Sayyed Moosā Shaheed Multani Qaadri rahmatullāhi alaihi ke mureed aur khalifa hain.
Aap ko Hazrat Shaikh Abdul Wahaab Muttaqi Qaadri rahmatullāhi alaihi se bhi khilaafat mili hai.
Aap ke khulfa :
(1) Shaikh Noor ul Haq,
(2) Allama Haidar bin Firoz Kashmiri.
***************
Aap ke 3 saahabzaade me Shaikh Noor ul Haq mash’hoor hain.
***************
Aap ka wisaal 21 Rabi’ ul Awwal 1052 Hijri (19 June 1642 A.D.) ko hua.
Aap ka mazaar Mehrauli, Delhi me Qutub Minar ke qareeb hai.
***************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Shaikh Abdul Haq Muhaddees Dehlwi rahmatullāhi alaihi aur Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.