Hazrat Sultaan Abu Is’hāq Ibrāheem bin Ad’ham rahmatullāhi alaihi

Hazrat Sultaan Abu Is’hāq Ibrāheem bin Ad’ham rahmatullāhi alaihi :

Aap ki wilaadat 100 Hijri (718 A.D.) me Balkh (Afganistan) me hui.

Aap ke waalid ka naam Ad’ham bin Mansoor al-Tameemi hai.

Aap ke daada aur waalid Khurasan ke Sultaan the. Aap bhi apne waalid ke baad Khurasan ke sultaan bane.

****************
Ek raat ko aap apne mahel me shaahi bistar par so rahe the. Achaanak chat par kisi ke chalne ki aawaaz suni. Aap ne puchha ‘Kaun hai?’ Us shakhs ne kaha ‘Ek dost.’ Aap ne puchha ‘Kya kar rahe ho?’ Us ne kaha ‘Mera oont kho gaya hai. Use chat par talaash kar raha hu.’ Aap ne kaha ‘Kaisi bewakoof jaisi baat kar rahe ho.’ Us ne kaha ‘Tab tum kaise mulaayam kapde pehankar sone ke bistar par sokar ALLĀH ko talaash kar rahe ho?’
Ye sunkar aap be-chain ho gaye aur puri raat so na sake.

Subah ko aap apne darbaar me baithe the tab ek shakhs maile kapde pehne hue waha aaya aur aap ke takht ke paas aaya. Aap ne us se puchha ‘Kya chaahte ho?’ Us shakhs ne kaha ‘Main is sarai ko dekhne ke liye aaya hu.’ Aap ne kaha ‘Kaisi be-wakoofi ki baat kar rahe ho. Ye mera mahel hai koi sara nahi hai.’ Us ne kaha ‘Aap se pehle is mahel ka maalik kaun tha?’ Aap ne kaha ‘Mere waalid.’ Us ne kaha ‘Un se pehle?’ Aap ne kaha ‘Mere daada.’ Us ne kaha ‘Un se pehle?’ Aap ne kaha ‘Mere pardaada.’ Us ne kaha ‘Wo sab kaha gaye?’ Aap ne kaha ‘Wo sab is dunya se inteqaal kar gaye hain.’ Us ne kaha ‘Is tarah ye ek sara hua jis me ek insaan aata hai aur dusra jaata hai.’

Ye sunkar aap ke dil ka aalam badal gaya aur aap ne foran baargaah e ilāhi me tauba ki aur apni tamaam milkiyat aur saltanat ko chhodkar jangal me chale gaye aur ibaadat e ilāhi me lag gaye.

Aap ne Nishapur ke qareeb ek ghaar me 9 saal guzaare. Aap sirf jumeraat ko baahar aate aur lakdiya jama karte aur jum’aa ke din use bechkar us me se jo raqam milti us me se aadha faqeero ko de dete aur aadhe me se pure hafte tak guzaara karte.

Us ke baad aap Makka tashreef le gaye aur kuchh arse tak waha qayaam kiya. Yaha aap ne Hazrat Sufyan al-Sauri aur Hazrat Fuzail bin Ayaaz rahmatullāhi alaihi se mulaaqat karke faiz haasil kiya.
Aur phir safar karte hue Shaam (Syria) aaye aur wahi par baaqi zindagi guzaari.
Aap tanhai me ibaadat karna zyada pasand farmate the.

****************
Ek baar aap Imaam e aazam Abu Haneefa rahmatullāhi alaihi se mulaaqat ke liye gaye to unho ne aap ka istaqbaal karte hue ‘Sayyedina Ibrāheem’ kehkar bulaaya. Waha maujood kuchh logo ne aitraaz kiya to Imaam e aazam ne farmaaya ‘Hazrate Ibrāheem hamesha yaad e ilāhi me mashgool rehte hain aur hum dunya ke khayaalo me masroof rehte hain.’

****************
Ek baar aap naher ke kinaare khaima ke baahar kapde see rahe the tab kuchh log aap ki baargaah me aaye aur aap se mulaaqat karne ke baad unho ne Hazrat ko chand sone ki ashrafiya batore hadiya paish ki. Aap ne unhe lene se inkaar kar diya aur farmaaya ‘Mujhe is ki zaroorat nahi padti.’
Ye sunkar un me se ek shakhs ne farmaaya ‘Ye kaise ho sakta hai jab ke aap ne apni tamaam milkiyat ko chhod diya hai?’
Ye sunkar aap ne apni sooi ko naher me daal di. Phir aap ne naher ki taraf ishaara kiya to ek machhli apne munh me sone ki sooi lekar baahar aai aur Hazrat ko de di. Magar aap ne farmaaya ‘Mujhe meri sooi hi chaahiye. Phir ek chhoti machhli munh me aap ki sooi lekar aai.

Phir aap ne farmaaya ‘Jab main Sultaan tha tab sirf insaano par hukoomat karta tha. Magar ab ALLĀH ne apne fazl se us ki makhlooq par bhi hukoomat ata farma di hai.’

****************
Ek baar ek shakhs ke paas se guzre wo bahot ghamgeen lag raha tha. Aap ne us se kaha ‘Main tumhe 3 sawaal puchhta hu tum us ke jawaab dena.’ Us ne kaha ‘Theek hai.’
Aap ne puchha ‘Kya kaainaat me koi baat ALLĀH ki marzi kekhilaaf ho sakti hai?’ Us shakhs ne kaha ‘Nahi.’ Phir aap ne puchha ‘ALLĀH ta’ala ne tumhara rizq muqarrar kiya hai wo koi kam kar sakta hai?’ Us ne kaha ‘Nahi.’ Phir aap ne puchha ‘ALLĀH ta’ala ne tumhari zindagi muqarrar ki hai us se ek lamhe bhi kam ho sakti hai?’ Us ne kaha ‘Nahi.’ Aap ne farmaaya ‘Tab tumhe is tarah ghamgeen kyun baithna chaahiye?’

****************
Ek baar logo ne puchha ‘Hamari duaen qubool kyun nahi hoti hai?’
Aap ne farmaaya ‘ Tumhare dil 10 cheezo ki wajah se murda ho gaye hain :
Tum ALLĀH ko jaante ho magar us ki sahi ibaadat ke zariye us ke huqooq ada nahi karte, tum ALLĀH ke Rasool sallallāhu alaihi wa sallam ke ummati hone ka aur un se mohabbat ka daawa karte ho magar un ki Sunnat par amal nahi karte, tum ALLĀH ki kitaab (Qur’an majeed) ko maanne ka daawa karte ho magar us ke ahkaam par amal nahi karte, tum ALLĀH ta’ala ki ata ki hui ne’amaten khaate ho magar us ka shukr ada nahi karte, tum jaante ho ke shaitaan hamara dushman hai magar us ke makr o fareb se bachne ki koshish nahi karte, tum jaante ho ke maut barhaq hain magar marne ke baad qabr ke liye koi tayyaari nahi karte, tum Jannat ko paane ki khwaahish rakhte ho magar us ke liye nek amal karke nahi karte, tum Jahannam se darte ho magar us se bachne ke liye koi tayyari nahi karte, tum apne rishtedaaro aur dosto ko marne ke baad qabr me dafn karte ho magar is se koi naseehat nahi lete, tum jaante ho ke tum me bhi aib hai magar hamesha dusro ke aib talaash karte ho, ab socho tumhari dua kaise qubool hogi.’

****************
Ek shakhs ne kuchh naseehat ke liye kaha to aap ne farmaaya ‘Jab tum gunaah karne ka iraada karo to 6 baaten yaad rakhna : ALLĀH ta’ala ka ata kiya hua rizq khaana chhod dena, us ke mulk se baahar nikal jaana, ya aisi jagah chale jaana jaha Rab ta’ala tumhe na dekh raha ho, maut ke waqt malik-ul-maut ko tauba ke liye kucha lamho ki mohlat dene ke liye kehna, munkar nakir ko apni qabr me aane se mana farma dena, jab jahannam me dale jaao to us me jaane se inkaar kar dena.
Wo shakhs ta’ajjub ke saath bola ‘Aisa to koi bhi nahi kar sakta.’ Aap ne farmaaya ‘Agar ye sab tumhare liye mumkin nahi to gunaah karna chhod dena hi behtar hai.’ Ye sunkar us shakhs ne foran tuaba kar li. Aur wahi par us ka inteqaal ho gaya.

****************
Aap farmaaya karte the ke :
‘Mere paas 4 sawaariya hain :
(1) Jab koi Ne’amat milti hi to ‘Shukr’ ki sawaari par sawaar hokar khuda ke saamne jaata hu.
(2) Jab Ibaadat ka waqt aaye to ‘Khulus’ ki sawaari par sawaar ho jaata hu.
(3) Jab koi Museebat ya Balaa aaye to ‘Sabr’ ki sawaari par sawaar ho jaata hu.
(4) Jab koi Gunaah ho jaata he to ‘Touba wa Istigfaar’ ki sawaari par sawaar hokar us ke huzur pesh ho jaata hu.

****************
Ek martaba aap raaste se guzar rahe the. Aap ne ek sharaabi ko dekha jo sharaab ke nashe me raah me pada hua tha aur be-hoshi ke aalam me bahot bakwaas kar raha tha. Aap us ke paas thehar gaye aur farmaaya ‘Yeh zabaan to zikr e haq ke liye thi. Ise kaun si aafat pahunchi ki yeh aise bakwaas kar raha hai?’ Phir Aap ne paani mangwaaya aur us ka munh aur zabaan dhone lage. Aur phir aage tashreef le gaye.
Sharaabi hosh me aaya to logo ne use saara qissa sunaaya. Sharaabi ko jab pata chala ke Hazrat Ibrāheem bin Ad’ham mera munh aur zabaan dho gaye hain wo rote hue kehne laga ‘Ilāhi! Tere maqbool bande ki sharm khaakar main sache dil se tauba karta hu. Tu apne maqbool bande ke tufail mujhe baksh de.’
Raat ko Hazrat Ibrāheem bin Ad’ham ne khwaab me dekha ki koi kehne waala keh raha hai ‘Aye Ibrāheem! Tune hamari khaatir us sharaabi ka munh dhoya. Hum ne tumahri khaatir us ka dil dhoya.’

****************
Aqwaal :
‾‾‾‾‾‾‾‾‾‾
Aap farmaate hai
(1) Agar koi ALLĀH ke dost (wali) banna chaahta ho to use apne dil me se dunya aur aakhirat dono ki khwaahishaat nikal deni chaahiye aur sirf us ki taraf tawajjoh rakhna chaahiye taake ALLĀH us ki taraf tawajjoh kare aur apne fazl se use wali bana de.

(2) Apna batwah kholo (ya’ni apna maal nek kaam me kharch karo) aur apni zabaan band rakho (ya’ni fahash kalaami aur bad-zabaani se door raho).

****************
Aap Hazrat Khwaja Fuzail bin Ayaaz rahmatullāhi alaihi ke mureed aur khalifa hain.
Hazrat Imaam Sayyed Mohammad al-Baaqir rahmatullāhi alaihi ne bhi Aap ko khilaafat ata farmai hai.

Aap ka silsila ‘Ad’hamiya’ kehlaata hai.

Aap ke khulfa :
(1) Hazrat Sadeed-ud-deen Huzaifa Mir’ashi rahmatullāhi alaihi,
(2) Hazrat Shafeeq al-Balkhi rahmatullāhi alaihi hain.

****************
Aap ka wisaal 26 Jamaadi ul awwal 165 Hijri (782 A.D.) ko hua.

Aap ka mazaar Jableh (Syria) me hai.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Hazrat Sultaan Ibrāheem bin Ad’ham rahmatullāhi alaihi aur tamaam Auliya Allāh ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.