Hijrate Nabi ka bayaan

Hijrate Nabi ka bayaan :

610 A.D. me Maahe Ramazaan me Huzoor Mohammad Mustafa sallallāhu alaihi wa sallam Makka ki Ghaare Hira me ibaadat e ilāhi me aur ghaur o fikr me mashgool the. Ek martaba jab aap wuzu ke liye ghaar se baahar tashreef laaye tab ALLĀH ta’ala ne Hazrat Jibr’eel alaihis salaam ke saath Wahi bheji aur dunya me kufr, Shirk (but-parasti) aur jahaalat ka andhera door karke Islaam ka noor zaahir karne ka farmaan hua.
Shuruat me Huzoor Rasool-Allāh sallallāhu alaihi wa sallam ne khufiya taur par Islaam ki daawat di. Shuru me chand log eimaan laaye.
3 saal baad 613 A.D. me aap ne hukme Rab se Islaam ki daawat ko aam kiya aur Safa ki pahaadi par chadhkar Tauhid wa Risaalat ka elaan kiya. Quraish ise apne baap-daada ke mazhab ke mukhaalifat maankar Huzoor sallallāhu alaihi wa sallam ko aur musalmano ko shadeed takleef dena shuru kiya.
Dusre mulko se log tijaarat ke liye aur Hajj ke liye Makka aate the. Huzoor Rasool-Allāh sallallāhu alaihi wa sallam ne unhe bhi Islaam ki daawat di.
Aap ki Sadaaqat, Amaanatdaari aur Husne Akhlaaq aur Taaleem aur Moazizaat dekhkar aahista aahista log musalman hone lage.
**************************
3 Nabwi (613 A.D.) me Huzoor sallallāhu alaihi wa sallam ke farmaan par musalmano ke ek giroh ne Habasha (Abyssinia) ki taraf hijrat ki. Muhaajireen ke is qaafile me 11 musalman mard aur 4 aurte thi.
Kuchh arse ke baad Musalman Makka waapas aaye to Quraish ne phir se un ko takleef dena shuru kiya.
5 Nabawi (615 A.D.) me musalmano ke giroh ne dusri martaba Habasha (Abyssinia) ki taraf hijrat ki. Muhaajireen ke is qaafile me 87 mard aur 17 aurten thi.
Kuchh arse ke baad un me se chand musalman Makka waapas aaye to Quraish ne phir se un ko takleef dena shuru kiya.
*********************
Yaṡrib (Madeena) me 2 bade qabeele the : Banu Aws wa Banu Khazraaj. Wo log Makka aate the tab Huzoor Rasool-Allāh sallallāhu alaihi wa sallam se Islaam ki taaleem haasil karte rehte the aur Huzoor sallallāhu alaihi wa sallam se be-intiha mohabbat karte the.
11 Nabawi (621 A.D.) me Yaṡrib (Madeena) ke 12 aadamiyo ke giroh ne maqaam e Aqaba par Huzoor Rasool-Allāh sallallāhu alaihi wa sallam se bai’at ki.
Is ke baad Huzoor sallallāhu alaihi wa sallam ne Hazrat Mus’ab bin Umair radiy-Allāhu anhu ko Yaṡrib (Madeena) bheja. Wo Hazrat As’ad bin Zuraara radiy-Allāhu anhu ke ghar par thehre aur waha ke logo ko taaleem di.
*********************
Rajab 12 Nabawi (621 A.D.) me Huzoor Rasool-Allāh sallallāhu alaihi wa sallam ko ALLĀH ta’ala ne Me’araaj ata farmaai. Is ke baad badi ta’adaad me log Islaam me daakhil hone lage. Kuffaar ne aap ko bahot zyada takleef dena shuru kiya.
*********************
Zil Hijja 12 Nabawi (622 A.D.) me Yaṡrib (Madeena) ke 73 mard aur 2 aurto ke giroh ne maqaam e Aqaba par Huzoor Rasool-Allāh sallallāhu alaihi wa sallam se phir se bai’at ki. Aur har haal me aap ki ita’at karne ka aur aap ko madad karne ka waada kiya.
*******************
Phir hukm e ilāhi se Huzoor sallallāhu alaihi wa sallam ne musalmano ko Yaṡrib (Madeena) hijrat karne ke liye farmaaya jo Makka se taqreeban 339 kilometer (211 mile) ki doori par tha. Aap ke farmaan par musalman chhote chhote giroh me hijrat karke Makka se Yaṡrib (Madeena) jaane lage.
Hazrat Mus’ab bin Umair ke baad Yaṡrib (Madeena) jaane waale sahaabi Hazrat Ibn Umme Maktoom radiy-Allāhu anhu hain. In ke baad Hazrat Bilaal ibn Rawaaha Habashi, Hazrat Sa’ad ibn Abi Waqqaas aur Hazrat Ammaar bin Yaasir radiy-Allāhu anhuma ne Hijrat ki. Phir Hazrat Umar Faarooq radiy-Allāhu anhu ne 20 ashaaba ke saath Hijrat ki.
*********************
13 Nabawi (622 A.D.) me Abu Jahl ne apne saathiyo ko jama karke mashwara karke ek tarkeeb sochi ke har qabeele ka ek ek aadmi jama ho aur sab milkar Mohammad (sallallāhu alaihi wa sallam) ka ghar gher len aur jab wo ghar se niklen to sab ek saath hamla kar den taake kisi ek ke upar iljaam na aaye aur Banu Haashim Quraish ke tamaam logo ka muqaabala nahi kar paayenge. Is tarah Huzoor sallallāhu alaihi wa sallam qatl kar dene ki saazish banaai aur un logo ne Huzoor sallallāhu alaihi wa sallam ke ghar par muhaasira kiya.
Magar jab ALLĀH ta’ala ne hijrat ka hukm farmaaya to Huzoor sallallāhu alaihi wa sallam Hazrat Ali Murtaza radiy-Allāhu ta’ala anhu ko apne bistar par sulaaye aur aap ke paas rakhi hui amaanaten logon ko pahunchane ki wasiyat farmaai. Aur aap ghar se baahar nikle aur mutthi me kankariya lekar Surah Ikhlaas padhkar un logo par phenki to ALLĀH ta’ala ne un log parda daal diya aur wo Huzoor sallallāhu alaihi wa sallam ko dekh na paaye.
Phir aap Hazrate Abu Bakr Siddeeq radiy-Allāhu anhu ke ghar pahunche aur darwaaze par halki si dastak di ke Siddeeq e akbar ne foran darwaaza khol diya.
Aap ne farmaaya ‘Abu Bakr, Hume hijrat ka hukm mila hai. Kya tum hijrat ke liye tayyaar ho?’
Siddeeq e akbar ne farmaaya ‘Ya Rasool-Allāh sallallāhu alaihi wa sallam, Maine to tab se tayyaari kar li hai jab aap ne hijrat ke liye farmaaya tha. Aur roz raat ko main jaagta rehta tha ke agar hijrat ke liye nikalna ho to mere aaqa ko der na ho.’
Hazrate Abu Bakr Siddeeq ne ye sochkar ke shaayad zaroorat pesh aaye apna maal bhi saath me liya jis ki miqdaar 5000 dirham thi.
Makkah se nikalte waqt Huzoor sallallāhu alaihi wa sallam ne Ka’abatullāh par hasrat bhari nigaah daalkar farmaaya ‘Aye Makkah! Khuda ki qasam, Tu mujhe duniya ke tamaam sehro me sab se zyada pyaara hai. Agar meri qaum ki wajah se mujhe yaha se nikalna na padta to main hargiz tujhe na chhodta.’
********************
Jab kuffaar Huzoor sallallāhu alaihi wa sallam ke ghar me daakhil hue to dekha ke bistar par Hazrat Ali soye hain. Bahot talaash karne par bhi Huzoor sallallāhu alaihi wa sallam na mile to Abu Jahl ne Saraaqa bin Ja’asham Kina’aani ko khat likha ke ‘Mohammad ibn Abdullāh yaha se bhaagkar Yasrib ki jaanib jaata hai so tum ko jaha par bhi mile us ko pakadkar mere paas lekar aao.’
Saraaqa bin Ja’asham ne jab Huzoor sallallāhu alaihi wa sallam ko raaste me dekha to jab aap ki taraf aage badhna chaaha to hukme khuda se zameen us ko pet tak nigal gai. Saraaqa ne aap se is museebat se chhudaane ke liye iltija ki aur kaha ke ‘Jo log aap ka pichha kar rahe hain un ko main rok dunga.’ Aap ki dua se ALLĀH ke hukm se zameen ne Saraaqa ko chhod diya. Saraaqa ne apne waade ke mutaabiq kuffaaro ko dusri taraf pher diya.
********************
Phir jab aage badhe to Hazrat Abu Bakr Siddeeq radiy-Allāhu ta’ala anhu Huzoor sallallāhu alaihi wa sallam ke saath chalne lage. Kabhi Huzoor sallallāhu alaihi wa sallam ki daahini taraf ho jaate, kabhi baanyi taraf, kabhi aage, kabhi pichhe chalte ke kisi bhi taraf se koi dushman Huzoor sallallāhu alaihi wa sallam ko nuqsaan na pahuncha sake.
Phir raaste me Huzoor sallallāhu alaihi wa sallam ne Ghaar e Ṡaur me theharne ka iraada kiya. Hazrate Abu Bakr Siddeeq ne kaha ‘Ya Rasool-Allāh sallallāhu alaihi wa sallam! Is pahaad par chadhte waqt kankar –patthar se aap ko takleef ho sakti hai. Aap ijaazat den to aap mere kandho par baith jaayen. Main aap ko lekar upar chadhunga.’
Is tarah Hazrate Abu Baqr Siddeeq Huzoor sallallāhu alaihi wa sallam ko apne kandho par bithakar upar chadhne lage. Raaste me aap kabhi Huzoor sallallāhu alaihi wa sallam ke daahine paanv ko chumte, kabhi baanye paav ko chumte.
Huzoor sallallāhu alaihi wa sallam ne puchha ‘Abu Bakr, Kya kar rahe ho?’
Aap ne farmaaya ‘Ya Rasool-Allāh sallallāhu alaihi wa sallam! Main me’araaj kar raha hu. Aap ki me’araaj ye hai ke aap Rab ta’ala ke paas la-makaan tak pahunche aur Abu Bakr ki me’araaj ye hai ke wo aap ke qadmo tak pahuncha.’
Phir Ghaar e Ṡaur me pahunche to ALLĀH ta’ala ke hukm se ek makdi ne gaar ke darwaaze par jaal bana diya aur ek kabootari ne gaar ke baahar ande diye. Kuffaar aap ka pichha karte hue waha pahunche to ye sab dekhkar ye socha ke agar koi andar gaya hota ye ande aur jaal yaha na hote aur waapas chale gaye.
Hazrate Abu Bakr Siddeeq ne ghaar ko saaf kiya aur dekha ke ghaar ki deewaaro me bahot saare suraakh hain. Unho ne apna jhubba phaadkar un suraakho ko band kar diye ke koi jaanwar aakar mere aaqa ko nuqsaan na pahunchaye. Magar ek suraakh baaqi reh gaya. Hazrat Abu Bakr Siddeeq ne Huzoor sallallāhu alaihi wa sallam se kaha ‘Aap aaraam farma len.’ Aur jab Huzoor sallallāhu alaihi wa sallam letkar Hazrat Abu Bakr Siddeeq ki god me aaraam karne lage to unho ne us suraakh par apna paav (edi) rakh diya.
Thodi der me ek azdaha ne aakar un ke paanv par kaata. Hazrat Abu Bakr Siddeeq ne dard aur takleef bardaasht kar liya ke mere aaqa ko khalel na ho. Magar baar baar kaatne par aakhir me un ki aankh se be-ikhiyaar aansoo nikal gaye. Huzoor sallallāhu alaihi wa sallam ke chehra e anwar par jab aansoo gire to aap ne farmaaya ‘Abu Bakr! Kya baat hai?’
Hazrat Abu Bakr Siddeeq ne saari baat batai to Huzoor sallallāhu alaihi wa sallam ne aap ko pair hataane ke liye farmaaya.
Pair hataate hi surakh se azdaha baahar aaya aur salaam pesh kiya aur kehne laga ‘Ya Rasool-Allāh sallallāhu alaihi wa sallam! Main ek zamaane se aap ke deedaar ke liye gaar me rehta tha aur maine hi bahar aane ke liye ye sab surakh banaye the. Magar aap ke saathi ne ye sab suraakh band kar diye aur ek suraakh par apna paanv rakh diya to majbooran mujhe aap ke dost ko kaatna pada.’
Huzoor sallallāhu alaihi wa sallam ne Siddeeq e akbar ke jakhm par apna luaabe dahen lagaaya aur un ko foran aaraam ho gaya.
Hazrat Abu Bakr Siddeeq ke saahabzaade Abdullāh rozaana raat ko Ghaar ke munh par sote aur subah hote hi Makka chale jaate aur pata lagaate ki Quraish kya tadbeere kar rahe hain. Jo kuchh khabar milti shaam ko aakar Huzoor sallallāhu alaihi wa sallam se arz kar dete.
Hazrate Abu Bakr Siddeeq ke ghulaam Hazrate Aamir bin Fuhera der raat ko chaaragaah se bakariya lekar ghaar ke paas aa jaate aur un bakariyo ka doodh Huzoor sallallāhu alaihi wa sallam aur un ke Rafeeq e khaas pee lete the.
Is tarah 3 raat tak ghaar me qayaam farmaane ke baad Huzoor sallallāhu alaihi wa sallam ne waapas Madeena ke safar shuru kiya.
********************
Madeena ke is safar me husn ittefaaq se ek maqaam par Hazrate Zubair bin Awwaam radiy-Allāhu ta’ala anhu se mulaaqaat hui. Jo Huzoor sallallāhu alaihi wa sallam ki phuphi Hazrat Safiya radiy-Allāhu ta’ala Anha ke bete hain aur mulk e Shaam se tijaarat ka saamaan lekar aa rahe the. Unho ne Huzoor sallallāhu alaihi wa sallam aur Hazrate Abu Bakr Siddeeq radiy-Allāhu ta’ala anhu ki khidmat me chand Nafees kapde bataur nazraana pesh kiye. Un kapdo ko Huzoor sallallāhu alaihi wa sallam aur Hazrate Abu Bakr Siddeeq radiy-Allāhu ta’ala anhu ne qubool farmaaye.
********************
Jab Huzoor sallallāhu alaihi wa sallam Madeena ke qareeb pahunche to Buridaa Aslami Qabeela e Bani Saham ke 70 sawaaro ke saath lekar is laalach me aap sallallāhu alaihi wa sallam ke giraftaari ke liye aaye ki Quraish se 100 oont in’aam me mil jaayega.
Jab wo Huzoor sallallāhu alaihi wa sallam ke saamne aaye aur puchha ki ‘Aap kaun hain?’ to Aap ne farmaaya ki ‘Main Mohammad bin Abdullāh hu, Khuda ka Rasool hu.’
Jamaal wa jalaale Nabuwwat ka in ke qalb par aisa asar hua ki foran Kalma e Shahaadat padhkar musharraf e Islaam ho gaye aur darkhwaast pesh ki ke ‘Ya Rasool-Allāh sallallāhu alaihi wa sallam! Meri tammana hai ki Madeena me Huzoor sallallāhu alaihi wa sallam ka ja daakhila ek jhande ke saath hona chaahiye.’
Yeh kehkar apna Imaama sar se utaarkar apne neje par baandh liya aur Huzoor sallallāhu alaihi wa sallam ke Alambardaar bankar aage aage Madeena ki jaanib chalte rahe.
********************
Jab Huzoor sallallāhu alaihi wa sallam maqaam e Ghanam par pahunche to waha ka sardaar 700 aadamiyo ke saath aap ki khidmat me aaye aur tamaam musalman hue.
********************
Phir waha se rawaana hue aur 16 Rabi ul awwal ko Madeena ke qareeb maqaam e Quba par pahunche aur Qabeela e Amr bin Awf ke Hazrate Kulsum bin Heedas radiy-Allāhu ta’ala anhu ke makaan me tashreef farma hue. Aksar saahaba e kiraam jo Huzoor sallallāhu alaihi wa sallam se pehle Hijrat karke Madeena munawwara me aaye the wo bhi usi makaan me thehre hue the.
Hazrat Ali Radiy-Allāhu ta’ala anhu bhi farmaan e Nabawi ke mutaabiq Quraish ki amaanate waapas lautakar teesre din Makka se nikal gaye aur Madeena aa gaye.
Quba me qayaam ke dauraan Huzoor sallallāhu alaihi wa sallam ki taaleem se bahot saare log musalman hue.
Huzoor sallallāhu alaihi wa sallam ne ashaaba ke saath Qabeela e Amr bin Awf ki khajoore sukhaane ki jagah par ek masjid ki taameer ki. Ye masjid ‘Masjide Quba’ ke naam se mash’hoor hai. Jo Islaam ki sab se pehli masjid hai.
Masjid ki taameer ke kaam ashaaba ko josh dilaane ke liye Aap Hazrate Abdullāh bin Rawaaha radiy-Allāhu ta’ala anhu ka sher padhte jaate :
‘Woh kaamyaab hai jo Masjid taameer karta hai,
Aur uthte baithte Qur’an padhta hai aur sote hue raat nahi guzaarta.’
Phir Aap Quba se Madeena ki taraf rawaana hue.
Raaste me Bani Saalim ki aabaadi me 100 ashaaba ne pehli namaaz e Jum’ah Huzoor sallallāhu alaihi wa sallam ki imaamat me ada ki.
Is maqaam par ek masjid taameer ki gai hai, jo ‘Masjide Jumaa’ ke naam se mash’hoor hai.
******************
Ahle Madeena ko jab se pata chala ke Huzoor sallallāhu alaihi wa sallam Madeena tashreef laane waale hain to sab khushi ke saath aap ki raah dekh rahe the.
20 Rabi ul awwal ko Aap Madeena munawwara me tashreef laaye.
Jab Ahle Madeena ko Aap ki aamad ki khabar mili to tamaam sardaar aap ke isteqbaal ke liye aaye.
Jab Huzoor sallallāhu alaihi wa sallam Madeena me tashreef laaye to Aap ka qaafila Juloos ki shakl me jhande ke saath Madeena me daakhil hua. Jab Aap aaye to logo ne raaste ke dono kinaaro par khade hokar ‘Ya Sayyidi Ya Rasool-Allāh Ya Mohammad Mustafa, Marhaba Marhaba’ ke naaro ke saath Aap ka istiqbaal kiya. Parda-nashin khawateen deedaar ke liye gharo ki chhat par chadh gai. Aap ke aane ki khushi me bachchiya taraane gaati thi ‘Tala al badru alaina’.
(Chaand tulu ho gaya hum par wadaa ki ghaatiyon se,
Hum par khudaa ka shukr waajib hai,
Jab tak ALLĀH se dua maangne waale maangte rahe,
Hum khaandaane Banu Najjaar ki bachchiya hain,
Waah, Kya khub hua ki Hazrat Muhammad sallallāhu alaihi wa sallam hamare padosi hue.)
Har ek ki ye khwaahish thi ke Huzoor sallallāhu alaihi wa sallam mere ghar me qayaam karen. Aakhirkaar ye tay hua ke Huzoor sallallāhu alaihi wa sallam ki oontni jaha thehre un ke yaha Huzoor sallallāhu alaihi wa sallam qayaam farmaenge. Marzi e khuda se Hazrat Abu Ayyub Ansaari radiy-Allāhu ta’ala anhu ko ye sa’adat mili aur un ke ghar ke saamne aap ki ootni thehri aur Aap sallallāhu alaihi wa sallam ne wahi par qayaam farmaaya.
Hazrate Abu Ayyub Ansaari radiy-Allāhu ta’ala anhu ne upar ki manzil pesh ki magar mulaqaatiyo ki aasaani ke liye Aap sallallāhu alaihi wa sallam ne neeche ki manzil ko pasand farmaaya.
7 mahine tak Hazrate Abu Ayyub Ansaari aur un ki biwi ishq aur adab ke saath Huzoor sallallāhu alaihi wa sallam ki khidmat karte rahe.
Hazrate Abu Ayyub Ansaari ke makaan ke saamne Hazrat Sahal wa Suhel bin Amr al-Najjaari naami 2 yateemo ki zameen thi. Unho ne Huzoor sallallāhu alaihi wa sallam ko waqaf karna chaaha. Magar Huzoor sallallāhu alaihi wa sallam ne Hazrate Abu Bakr Siddeeq ko us ki raqam dekar khareed karne ko farmaaya. Phir us zameen par Masjide Nabawi taameer ki gai. Aur Masjid ke muttasil Huzoor sallallāhu alaihi wa sallam ka hujra (qayaamgaah) banaaya gaya.
Masjid ki taaameer ke dauraan ashaaba e kiraam ko josh dilaane ke liye Aap ye sher padhte :
Aye ALLĀH! Bhalaai to sirf aakhirat hi ki bhalaai hai, Lihaaza Aye ALLĀH! Tu Ansaar wa Muhaajireen ko bakhsh de.’
Masjid ke kinaare par ek chabutra tha jis par khajoor ki pattiyo se chhat banai gai thi, jise ‘Suffa’ kehte hain. Jin Sahaaba ke ghar nahi the wo is chabutre par sote- baithte the. Un ashaaba ko ‘Ashaab e Suffa’ kehte hain.
Masjide Nabawi ki taaameer ke baad shuruat me Hazrat Bilaal radiy-Allāhu ta’ala anhu ‘Assalaatu Jaamia’atun’ pukaarkar paancho namaazo ke waqt elaan karte the.
Is darmiyaan me ek sahaabi Hazrate Abdullāh bin Zaid Ansaari radiy-Allāhu ta’ala anhu ne khwaab me dekha ki Azaan e Sharai ke alfaaz koi suna raha hai. Is ke baad Huzoor sallallāhu alaihi wa sallam ko aur Hazrate Umar radiy-Allāhu ta’ala anhu aur dusre Sahaaba ko bhi isi qism ke khwaab nazar aaye.
Huzur sallallāhu alaihi wa sallam ne is ko ‘Min Jaanibillāh (ALLAH ka hukm) samajhkar Hazrate Abdullāh bin Zaid radiy-Allāhu ta’ala anhu ko hukm diya ki ‘Tum Bilaal ko Azaan ke kalimaat sikhaa do. Kyun ki us ki aawaaz tum se zyada buland hai.’ Is tarah namaaz ke liye Azaan ki shuruat hui.
*****************
Hijrat ke baad kuchh arse tak Hazrat Ali radiy-Allāhu ta’ala anhu roz raat ko Huzoor sallallāhu alaihi wa sallam ke hujre par pehra dete rahe. Phir Huzoor sallallāhu alaihi wa sallam ne Hazrat Ali se farmaaya ‘Ab tumhe pehra dene ki zaroorat nahi. ALLĀH ta’ala ne meri hifaazat ke liye intazaam kar diya hai.’
*******************
★ Jis saal Huzoor sallallāhu alaihi wa sallam Madeena munawwara hijrat karke aaye us saal se ‘Hijri san’ ki ginti ki jaati hai.
★ Makkah se jo musalman Madeenah pahunche wo ‘Muhaajir’ kehlaaye. Muhaajir apna sab kuchh Makka me chhodkar aaye the aur be sar o saamaan the. Madeena ke musalmano ne har tarah se un ki madad ki. Is liye wo ‘Ansaar’ kehlaaye.
★ ‘Yaṡrib’ ab ‘Madeenatun Nabi’ ke naam se mash’hoor hua. Is ke dusre naam Madeena munawwara, Madeena tayyaba, Taybaah, Taaba aur Daar ul Abraar hain.
**************
Hijrat ke baad ibtidaai saalo me pesh aane waale chand khaas waaqyaat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
(1) Huzoor sallallāhu alaihi wa sallam ne Muhaajireen aur Ansaar Mawaakhaat qaa’im ki, ya’ani Ansaar aur Muhaajireen ko ek doosre ka bhaai banaaye. Ansaar ne muhaajir bhai ko rehne ke liye ghar diye, un ke nikaah karaaye, kaarobaar me shareek kiya, maal wa milkiyat me hissa diya aur har baat me un ko apne se zyaada samajhne lage. ALLĀH ta’ala ne un ki ta’areef farmaai hai.
(2) Muhaajireen ashaaba ko Yaṡrib ki aab o hawa muwaafiq na aaye aur wo beemaar hone lage. Jab Huzoor sallallāhu alaihi wa sallam se arz kiya to aap ne dua farmaai ‘Aye ALLĀH! Tune Makka me jo barkat rakhi hai us se dugni barkat Madeene me rakh de.’ Aap ki dua se ALLĀH ta’ala ke fazl se Madeena rahamat, barkat, raahat aur sukoon waala maqaam ban gaya.
(3) Huzoor sallallāhu alaihi wa sallam ne Madeena ko Haram qaraar diya aur dua farmaai ke ‘Aye ALLĀH! Maine Madeena ko isi tarah Haram qaraar diya hai jis tarah tune Makkah ko Haram banaaya hai.’
Madeena ka Haram Jable Air (jo Waaqi e Aqeeq ke qareeb hai) se jable Ṡaur (jo Madeena ke Shimaal me Jable Uhad ke qareeb hai)
(5) 2 Hijri me musalmano par Maahe Ramazaan ke Roze farz hue.
(6) Madeena me logo ne saal me 2 din muqarrar kiye the jinhe wo khel kood aur naachne gaane me guzaarte the. Huzoor sallallāhu alaihi wa sallam ko jab is baat ka pata chala to aap ne farmaaya ‘Islaam khel kood aur naachne gaane ki ijaazat nahi deta. Hum in 2 din me khaas ibaadat karke ALLĀH ki raza haasil karenge.’
Is tarah ye 2 din ‘Eid’ ke muqarrar kiye gaye : Eid ul Fitr (1 Shawwaal) aur Eid ul Ad’ha (10 Zil Hijja).
(7) 2 Hijri (624 A.D.) Huzoor sallallāhu alaihi wa sallam ka nikaah Hazrat Aa’isha bint Abu Bakr Siddeeq radiy-Allāhu ta’ala anha ke saath hua.
(8) Hijrat ke baad pehle aur dusre saal me 1 Sariya aur 3 Ghazwaat pesh aaye magar kaafiro ke saath jung na hui.
Sariya e Hamza :
1 Hijri me Huzoor sallallāhu alaihi wa sallam ne Hazrate Hamza bin Abdul Muttalib ki sardaari me 300 mujaahido ko kaafiro ke muqaabale ke liye bheje. Wo Saiful Bahar tak pahunche. Magar Mujdi bin Amr Juhani ki darmiyaan-giri se jung mauqoof hui.
Ghazwa e Safwaan :
2 Hijri (624 A.D.) me Kazr bin Jaabir Fuhari ne Madeena ki chaaragaah me daaka daala aur kuchh oonto ko bhagaakar le gaya. Huzoor sallallāhu alaihi wa sallam ne Hazrate Zaid bin Haarisa radiy-Allāhu ta’ala anhu ko Madeena me apna khalifa banaaya aur Hazrate Ali radiy-Allāhu ta’ala anhu ko alam-bardaar banaakar Sahaaba ki jama’at ke saath Waadi e Safwaan tak us daaku ka ta’akub kiya, jo Badr ke qareeb hai. Magar woh tezi ke saath bhaaga aur haath nahi aaya. Aur Huzoor sallallāhu alaihi wa sallam waapas Madeena tashreef laaye.
Ghazwa e Zil Uraish :
2 Hijri (624 A.D.) me Kuffar e Quraish ka ek qaafila maal e tijaarat lekar Makka se Shaam ja raha tha. Huzoor sallallāhu alaihi wa sallam 150 muhajireen ashaaba ko saath lekar is qaafile ka raasta rokne ke liye Maqaam e Zil Uraisha tak tashreef le gaye, jo Unbbua ki bandargaah ke qareeb hai. Magar waha pahunchkar maaloom hua ki qaafila bahot aage badh gaya hai.
Ghazwa e Abwa (Ghazwa e Waddan) :
Safar sann 2 hijri me Huzoor sallallāhu alaihi wa sallam Hazrate Sa’ad bin Ubaida radiy-Allāhu ta’ala anhu ko Madeene me apna Khalifa banaakar aur Hazrate Hamzah radiy-Allāhu ta’ala anhu ko alam bardaar banaakar 60 Mujaahideen ko apne saath le kar Maqaam e Abwaa tak kuffaar ka pichha karte hue tashareef le gaye. Magar Kuffaar e Makkah bhaag gaye. Is liye Jung na hui.
Aap (Madeena se 80 mile door) Abwa me chand din thehre. Aur Qabeela e Banu Jamraa ke sardaar Mukhhi bin Amr Jamri se bahaami imdaadi ka ek tehreeri muahida kiya aur phir Madeena waapas tashareef laaye.
(9) Ramazaan 2 Hijri me Jung e Badr hui.
17 Ramazaan 2 Hijri (13 March 624 A.D.) ko Maqaam e Badr par Kaafiro ke saath Musalmano ki jung hui. Jis me ALLĀH ke fazl se 313 Musalmano ke lashkar ne 1000 kaafiro ke lashkar ko haraakar azeem fateh haasil ki. 14 Musalman shaheed hue (6 Muhaajireen aur 8 Ansaar). 70 Kaafir qatl hue aur 70 qaid kiye gaye.
Jung e Badr me saamil hone wale ashaaba ka martaba Ashra e mubashara ke baad sab se afzal hai.
(10) Jung e Badr ke mauqe par Huzoor sallallāhu alaihi wa sallam ki saahabzaadi Hazrate Ruqayyah radiy-Allāhu ta’ala anha shadeed beemaar thi aur Hazrate Usmaan Ghani radiy-Allāhu ta’ala anhu un ki khidmat ke liye rooke the. Lekin jab Jung e Badr me musalmano ki fateh ki khabar mili us se pehle hi Hazrate Ruqayya radiy-Allāhu ta’ala anha ka inteqaal ho gaya.
(11) 1 Zil Hijjah 2 Hijri (623 A.D.) ko Hazrate Ali Murtaza aur Sayyeda Faatima Zahra radiy-Allāhu ta’ala anhuma ka Nikaah hua.
(12) 3 Shawwaal 3 Hijri (19 March 625 A.D.) me Jung e Uhad hui. Jis me bhi ALLĀH ke fazl se musalman fatehyaad hue. Is jung me 70 ashaaba shaheed hue aur Huzoor sallallāhu alaihi wa sallam ke dandaane mubarak shaheed hue.
(13) Jung e Uhad ke baad Huzoor sallallāhu alaihi wa sallam ne apni dusri saahbzaadi Hazrate Umme Kulsum ka nikaah Hazrate Usmaan Ghani radiy-Allāhu ta’ala anhu ke saath karaaya.
****************
ALLĀH ta’ala us ke Habeeb sallallāhu alaihi wa sallam ke sadqe me
Aur tamaam Ashaaba, Auliya Allāh aur Ahle bait ke waseele se
Sab ko mukammal ishq e Rasool ata farmae aur Ashaaba aur Buzurgaane deen ki sachi mohabbat ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae aur Islaam ki hifaazat ke liye qurbaani dene ka jazaba ata farmae.
Aur in baato ko yaad rakhne ki aur dusro ko bataane ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.