Hindustan me Islaami Tawaarikh

Hindustan me Islaami Tawaarikh :

(1) Islaam ki shuruat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
♦ Islaam ki isha’at ke liye Hindutan aane wale sab se pehle Sahaabi e Rasool Hazrat Maalik bin Deenar radi-Allāhu ta’ala anhu hain.
7 Hijri (629 A.D.) me Huzoor sallallāhu alaihi wa sallam farmaan se Hazrat Maalik bin Deenar radi-Allāhu ta’ala anhu apne saathiyo ke saath kashti me safar karte hue Taqipatanam (Madurakkara) aaye.

Unho ne sab se pehle Kodungallur, Kerala me Raja Rama Varma Kulashekhara ko musalman banaaya.
Malabar ka Mappila samaaj (community) ne sab se pehle Islaam apnaya.

Aur phir unho ne Hindustan me sab se pehli masjid banai, jo ‘Cheraman Jum’aa Masjid’ ke naam se mashhoor hai.

Is ke baad aap ne Hindustan me bahot saari masjide banai.

Aap ne apne Husne akhlaaq aur taalim e deen se bahot saare logo ko musalman banaaya.

♦ Sab se pehle Hindustani musalman Hazrat Taaj-ud-deen radi-Allāhu ta’ala anhu [Rama Varma Kulashekhara] hain.
Aap ka mazaar Al-Baleed, Salalah (Oman) me hai.

♦ Sab se pehle Hindustani sahaabi Hazrat Baba Ratan Hindi radi-Allāhu ta’ala anhu (Sirhind, Punjab) hain.

Aap ek baar Bhatinda ke jangal me ek pahaad par baithkar chaand ke do tukde hote hue aur phir un dono tukdo ko judte hue dekha.
Baad me Arab ke taajiro ke kaafile aap ko ye pata chala ke Makka me Hazrat Muhammad ibne Abdullāh sallallāhu alaihi wa sallam ne elaan e nabuwwat kiya hai aur kaafiro ne aap se mo’azeeza talab kiya to Aap ne Jable Abu Qubais par khade hokar ungli ke ishaare se chand ke do tukde kiye aur phir un ko jod diya.
Kuchh waqt baad Aap ne Madeena pahunchkar Masjid e Nabawi me Islaam ka izhaar kiya.

Huzoor sallallāhu alaihi wa sallam ki dua se aap ko ALLĀH ta’ala ne 700 saal ki umr ata farmai.

♦ Hindustan me mashhoor ashaaba e Rasool ke mazaar :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

[1] Hazrat Maalik bin Deenar radi-Allāhu ta’ala anhu (Wisaal 130 Hijri [748 A.D.]) Kasaragod, Kerala).
Aap ne Hindustan me Raja Rama Varma Kulashekhara ko sab se pehle musalman banaaya.

[2] Hazrat Ukasha ibn Muhsin radi-Allāhu ta’ala anhu (Parangipettai, Tamilnadu).
Aap Jang e Badr me saamil hone wale 313 ashaba me se hain aur sirf aap wo khushnaseeb sahaabi hain jin ko Mohre Nabuwwat ko bosa dene ka mauqa mila hai.

[3] Hazrat Tameem ibn Zaid al-Ansari radi-Allāhu ta’ala anhu (Kovalam, Tamil Nadu).
Aap Jang e Badr me saamil hone wale 313 ashaaba me se hain.

************************
(2) Islaami hukoomat :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

▪▪► Umayya hukoomat ke dauraan 92 Hijri me Sindh ke Raja Daahir ne Hajj ke safar par jaa rahe logo ko aurto ke saath qaid kar liya aur un ka maal o saaman loot liya.
Iraq ke governor Hajjaj bin Yousuf ne Raja Daahir ko un logo ko riha karne ke liye paigaam bheja. Magar wo na maana.
Chunanche us ne 92 Hijri (711 A.D.) me Damishk (Damascus) se 2 baar lashkar bhejkar Baluchistan aur Sindh par hamla kiya.
Aakhir me 93 Hijri (712 A.D.) me Hazrat Muhammad bin Qaasim rahmatullāhi alaihi ki sardaari me Arab lashkar ne Raja Dahir ko harakar Sindh par fateh hasil ki aur phir wo Multan tak pahunche.

▪▪► 392 Hijri (November 1001 A.D.) me Sultaan Mahmood Ghaznawi ne Peshawar me Raja Jaypal ko haraaya aur aur is ke baad Hindustan ke dusre ilaako me hamle jaari rakhe.

11wi sadi A.D. me Ghaazi Sayyed Salaar Masood ne Islaami hukoomat ko aur phailaaya.

582 hijri (1186 A.D.) me Shahaab-ud-deen Muhammad Ghori ne Lahore jitkar Gazni par fateh haasil ki.

▪▪► Shahaab-uddeen Muhammad Ghori ne apne Ghulaam Qutub-ud-deen Aibak ko Hindustan ka Governor banaaya, jis ne ‘Delhi saltanat’ ki shuruat ki.

Qutub-ud-deen Aibak ne 602 Hijri (1206 A.D.) me ‘Mamluk saltanat’ shuruat ki.
(10 Sultaan, 1206 A.D. se 1290 A.D.),
Us ke baad 689 Hijri (1290 A.D.) me Jalaal-ud-deen Firoz Khilji ne ‘Khilji saltanat’ (4 Sultaan, 1290 A.D. se 1320 A.D.),
721 Hijri (1321 A.D.) me Ghyas-ud-deen Tughlaq ne ‘Tughlaq saltanat’ (9 Sultaan, 1320 A.D. se 1414 A.D.),
816 Hijri (1414 A.D.) me Khizr Khan ne ‘Sayyed saltanat’ (4 Sutaan, 1414 A.D. se 1451 A.D.)
855 Hijri (1451 A.D.) me Bahlul Khan Lodi ne ‘Lodi saltanat’ ki shuruat ki (3 Sultaan, 1451 se 1526 A.D.).

▪▪► Is ke baad 932 Hijri (20 April 1526) ko Panipat ki jang me Baabar ne Ibrāheem Lodi ko harakar ‘Mughal saltanat’ ki shuruat ki.
(21 Sultan, 1526 A.D. se 1540 A.D. aur 1554 A.D. se 1857 A.D.)

Darmiyaan me Sher Shaah Suri ne Humayun ko harakar ‘Suri saltanat’ ki shuruat ki.
(2 Sultaan, 1540 A.D. se 1554 A.D.)

1857 A.D. me Aakhri Mughal baadshah Bahaadur Shaah Jafar ko Angrezo ne Rangoon (Burma) me nazar qaid kar diya aur us ke 2 bete Mirza Mughal aur Mirza Khizr Sultaan aur Pote Mirza Abu Bakr ko qatl kar diya. Is tarah Mughal saltanat khatm hui.

▪▪► Bengal me Nasir-ud-deen Bughra Khan ne 679 Hijri (1281 A.D.) me ‘Balban saltanat’ ki shuruat ki, (4 Sultaan, 1281 A.D. se 1324 A.D.).
Is ke baad Delhi Sultanat ke dauraan Fakhr-ud-deen Mubarak Shaah ne 738 Hijri (1338 A.D.) me alag hukoomat ki shuruat ki.
Is ke baad Ilyaas Shaah ne 753 Hijri (1352 A.D.) me ‘Ilyaas Shaahi saltanat’ ki shuruat ki, (10 Sultaan, 1352 A.D. se 1414 A.D. aur 1435 A.D. se 1487 A.D.)
Shahzaada Barbak 892 Hijri (1487 A.D.) me ‘Habashi saltanat’ (4 Sultaan, 1487 A.D. se 1494 A.D.),
Ala-ud-deen Husain Shaah ne 899 Hijri (1494 A.D.) me ‘Husain Shaahi saltanat’ (1494 A.D. se 1538 A.D.),
Muhammad Khan Sur ne 961 Hijri (1554 A.D.) me ‘Muhammad Shaahi saltanat’ (5 Sultaan, 1554 A.D. se 1564 A.D.),
Taj Khan Karrani ne 971 Hijri (1564 A.D.) me ‘Karrani saltanat’ ki shuruat ki, (1564 A.D. se 1576 A.D.)

Nawaab Murshid Quli Khan (Jaafar Khan Bahadur Nasiri) ne 1129 Hijri (1717 A.D.) me ‘Nasiri saltanat’ ki shuruat ki, (3 Nawaab, 1717 A.D. se 1740 A.D.).
Us ke baad Nawaab Muhammad Aliwardi Khan Bahaadur (Haashim-ud-Daula) ne 1152 Hijri (1740 A.D.) me ‘Afsar saltanat’ ki shuruat ki, (2 Nawaab, 1740 A.D. se 1757 A.D.).
Mir Muhammad Jaafar Ali Khan Bahaadur ne 1170 Hijri (1757 A.D.) me Nawaab Muhammad Siraaj-ud-Daulah ko dhokhe se harakar ‘Najafi saltanat’ shuruat ki, (13 Nawaab, 1757 A.D. se 1969 A.D.).

▪▪► Dakkhin me Sultan Ala-ud-deen Hasan Bahman ne 747 Hijri (1347 A.D.) me ‘Bahamani saltanat’ ki shuruat ki.
Us ke baad Malik Ahmed Shah Bahri Nizaam-ul- Mulk ne 895 Hijri (1490 A.D.) me ‘Nizaam Shahi (Ahmadnagar) hukoomat’, (14 Sultaan, 1490 A.D. se 1636 A.D.), Fath-ullah Imaad-ul-Mulk ne 895 Hijri (1490 A.D.) me ‘Imaad Shahi (Berar) saltanat’, (5 Sultaan, 1490 A.D. se 1574 A.D.), Qaasim Barid ne 897 Hijri (1492 A.D.) ‘Barid Shahi (Bidar) saltanat’, (9 Sultaan, 1492 A.D. se 1619 A.D.), Yousuf Adil Khan ne 895 Hijri (1490 A.D.) me ‘Adil Shaahi (Bijapur) hukoomat’, (9 Sultaan, 1490 A.D. se 1686 A.D.), Sultaan Quli Qutb-ul-Mulk ne 924 Hijri (1518 A.D.) me ‘Qutab Shaahi (Golkonda) saltanat’ ki shuruat ki (8 Sultaan, 1518 A.D. se 1687 A.D.).

▪▪► Sultan Firoz Shaah Tughluq ke governer Zafar Khan Muzaffar Shah ne 793 Hijri [1391 A.D.] me Gujarat me ‘Muzaffari saltanat’ ki shuruat ki.
980 Hijri [1573 A.D.] me Mughal baadshaah Akbar ne Shams-ud-deen Muzaffar Shaah ko harakar Mughal saltanat me saamil kiya.

▪▪► Iran ke Naadir Shaah Durrani ne 1151 Hijri (March 1739 A.D.) me Delhi par hamla karke Mughal baadshah Muhammad Shaah ko harakar Delhi par qabza kiya.
Is ke baad Ahmad Khan Abdaali Durrani 1174 Hijri (14 January 1761 A.D.) me teesri Jange Paanipat me Maratha ko harakar Punjab aur Delhi par qabza kiya.

*********************
(3) Hindustan ki Aazadi ke liye Angrezi (British) hukoomat ke khilaaf jang me saamil hone wale chand mashhoor Musalmano ke naam :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾
Siraaj-ud-daulah, Mir Qaasim, Haidar Ali aur Fateh Ali Tipu Sultan, Yousuf Khan, Wali Khan, Teetu Miyan, Maulana Shaah Waliullāh Mohaddees Dehlwi, Shaah Abdul Azeez Mohaddees Dehlwi, Sayyed Ahmad Shaheed, Maulana Wilaayat Ali Sadikpuri, Baadshaah Siraaj-ud-deen Bahaadur Shah Zafar, Fazle Haq Khairabadi, Muhammad Husain, Ahmad Yaar Khan, Nizaam Ali Khan, Ghulaam Ghaus, Khuda Bakhsh, Subedaar Ali Bakhsh Hamirpuri, Waaris Ali, Burhaan-ud-deen, Mujahid Gul Muhammad, Shekhu Khan Pahelwan, Pir Ali, Sayyed Hasan Askari, , Maulana Ahmad Ali, Maulana Ahmadullāh Shah, Nawaab Khan Bahadur Khan, Maulwi Liaqat Ali Ilāhabadi, Haaji Imdaadullāh Mahajir Makki, Maulana Habeeb-ur-Rahmān Ludhyanvi, Dr. Saif-ud-deen Kichloo, Masih-ul-Mulk Hakeem Ajmal Khan, Allama Inaayatullāh Mashriqi, Dr. Mukhtar Ahmad Ansari, Maulana Mazhar-ul-Haq, Maulana Zafar Ali Khan, Shah Nawaaz Khan, Maulana Sayyed Mohammad Miyan, Maulana Mohammad Hifz-ur-Rahmān Seuharvi, Maulana Abdul Baari Firangi Mahli, Mufti Atiq-ur-Rahmān Usmaani, Maulana Abul Kalaam Aazaad, Dr. Sayyed Mahmood, Khan Abdus Samad Khan Achakzai, Yousuf Ali Meher, Rafi Ahmad Qidwai, Asfaaqullāh Khan, Allama Mohammad Iqbaal, Chaudhari Ghulaam Abbaas, Shaikh Abdullāh, Khan Abdul Ghaffaar Khan (Sarhadi Gandhi) aur Dr. Khan;
Begum Hazrat Mahal, Bi Amma (Abadi Begum), Begum Shaah Zamaani, Azizan Bai, Zubaida Dawūdi, Zulaikha Begum, Amjadi Begum, Begum Nishat-un-Nisa (Begum Hasrat Mohani), Mazhurunnisa Begum, Begum Akbar Jahan, Sa’adat Bano Kichloo, Razia Khatoon, Shafaat-un-Nisa Bibi, Asghari Begum, Zehida Khatoon Sherwani, Khadeeja Begum, Muneera Begum, Asmat Aara Khatoon.

*********************
(4) Sufi silsile :
‾‾‾‾‾‾‾‾‾‾‾‾‾‾‾‾‾‾
Madaari silsila :
▪▪► Hindustan me Hazrat Sayyed Badi-ud-deen Madaar rahmatullāhi alaihi (Wilaadat 242 Hijri [856 A.D.] Wisaal 17 Jamaadil awwal 837 Hijri [1434 A.D.]) (Makanpur [Uttar Pradesh]) se (818 Hijri se) ‘Madaariya’ silsila jaari hai.

Chishti silsila :
▪▪► Hazrat Khwaja Sayyed Moeen-ud-deen Chishti rahmatullāhi alaihi (Wilaadat 1141 A.D. – 1230 A.D.]) – Wisaal 6 Rajab 633 Hijri [1230 A.D.]) 587 hijri (1190 A.D.) me amn ka paighaam lekar Ajmer aaye aur apni karaamaat aur husn e akhlaaq aur taaleem se Hindustan me Islaam ko mazboot kiya aur phailaaya aur aap se Hindustan me ‘Chishti’ silsila jaari hai.

Hindustan me Chishti silsila ki 2 mashhoor shaakhen hain :
(1) Nizaami, (2) Saabri.
Hazrat Khwaja Sayyed Nizaam-ud-deen Auliya rahmatullāhi (Delhi) se (Chishti) ‘Nizaami’ silsila jaari hai.
Aur Hazrat Khwaja Sayyed Ala-ud-deen Ali Ahmad Saabir rahmatullāhi alaihi (Kaliyar) se (Chishti) ‘Saabri’ silsila jaari hai.

Naasiri, Husaini, Siraaji, Fareedia, Ashrafiya, Fakhriya, Niyaazi, Safwi, Inaayati, Sulaimaania, Habeebiya, Soofi, Gudri shaahi, Zahuri, ye sab ‘Chishti Nizaami’ silsile ki mashhoor shaakhen hain.
Aur Imdaadi, Sahviya, Aaswi , Saajidi, ye sab ‘Chishti Saabri’ silsile ki mashhoor shaakhen hain.

Suharwardi silsila :
▪▪► 619 Hijri (1222 A.D.) se Hazrat Baha-ud-deen Zakariya rahmatullāhi alaihi (Wiladat [1170 A.D.] – Wisaal 665 Hijri [1267 A.D.]) (Multan, Pakistan) se ‘Suharwardi’ silsila jaari hai.
Aap ke khalifa Hazrat Sayyed Jalaal-ud-deen Surkh-posh Bukhari rahmatullāhi alaihi (Uch, Punjab, Pakistan) se ‘Jalaali’ silsila jaari hai.
Jis ki Makhdoomi aur Shaahi shaakhen mashhoor hain.

▪▪► Hazrat Meer Sayyed Ali Hamdani rahmatullahi alaihi (Kashmir) ‘(Kubrawiya) Hamdaaniyya’ silsila jaari hai.
Hazrat Shaikh Badr-ud-deen Samarqandi rahmatullāhi alaihi se ‘(Kubrawiya) Firdausi’ silsila jaari hai.

Qaadri silsila :
▪▪► Hazrat Ghaus e aazam Mohiy-ud-deen Abdul Qaadir Jeelani 522 Hijri (1128 A.D.) me Hindustan aaye the aur Multan me qayaam farmaya tha.

Hazrat Sayyed Mohammad Ghaus Bandagi Qaadri Jeelaani al-Halabi rahmatullāhi alaihi se (Wisaal 923 Hijri [1517 A.D.]) (Uch, Punjab, Pakistan) se 887 Hijri (1482 A.D.) se ‘Qaadri’ silsila jaari hai.

Hindustan me ‘Qaadri’ silsile ki Naushaahi, Sarwari Qaadri, Waarsi, Maizbhandari, Barkaatiya, Noori, Razawi, Amjadi, Hashmatiya, shaakhen mashhoor hain.

Rifai silsila :
▪▪►Hazrat Sayyed Shaah Nazm-ud-deen Abdur Raheem Mahebullāh Rifai rahmatullāhi alaihi (Ahmedabad) se ‘Rifai’ silsila jaari hai.

Shaazili silsila :
▪▪► Hazrat Shaikh Abu Bakr Miskeen saahib rahmatullāhi alaihi (Kayalpatnam) Aur Hazrat Shaikh Mir Ahmad Ibrāheem rahmatullāhi alaihi (Madurai) se ‘Shaazili’ silsila jaari hai.

Naqshbandi silsila :
▪▪► Hazrat Khwaja Razi-ud-deen Muhammad Baaqi Billāh rahmatullāhi alaihi se ‘Naqshbandi’ silsila jaari hai.
Aap ke khalifa Hazrat Mujaddid e Alfe saani Ahmad Sirhindi rahmatullāhi alaihi (Sirhind) se ‘(Naqshbandi) Mujaddidi’ silsila jaari hai.
Jis ki Fazle Rahmāni, Mazhariya, Khaalidi, Ghaffaari, Abul Ulai, Taahiri, Qaasimi, Mustafai, Saifi, Taajiya, shaakhen mashhoor hain.

Maghribi silsila :
▪▪► Hazrat Shaikh Baba Abu Ishāq al-Maghribi rahmatullāhi alaihi se ‘Maghribi’ silsila jaari hai.

Shattari silsila :
▪▪► Hazrat Siraj-ud-deen Abdullāh Shattaar rahmatullāhi alaihi (Jaunpur) se ‘Shattaariya’ silsila jaari hai.

************************
(5) Mujaddid e Islaam :
‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾‾

Hazrat Khwaja Sayyed Moeen-ud-deen Hasan Chishti rahmatullāhi alaihi (Wilaadat 1141 A.D. [1230 A.D.]) – Wisaal 6 Rajab 633 Hijri [1230 A.D.]) (Ajmer) 7wi sadi ke Mujaddid hain.

Hazrat Khwaja Sayyed Nizaam-ud-deen Auliya Mehboob e Ilāhi rahmatullāhi alaihi (Wilaadat 635 Hijri [1238 A.D.] – Wisaal 17 Rabi’ ul aakhir 725 [3 April 1325]) (Delhi) 8wi sadi ke Mujaddid hain.

Hazrat Mujaddeed e Alfe Saani Shaikh Ahmad Sarhindi rahmatullāhi alaihi (Wilaadat 14 Shawwal 971 Hijri [4 June 1564 A.D.] – Wisaal 26 Safar 1034 Hijri [8 Dec 1624 A.D.)] (Sirhind) 11wi sadi ke Mujaddid hain.

Mughal baadshah Hazrat Aurangzeb Aalamgeer rahmatullāhi alaihi (29 Zil Hijja 1027 Hijri [4 November 1618 A.D.] – 25 Zil Qa’ada 1118 Hijri [3 March 1707 A.D.]) 12wi sadi ke Mujaddid hain.

Hazrat Allama Shaah Abdul Azeez Muhaddees Dehlwi rahmatullāhi alaihi (Wilaadat 1157 Hijri [1745 A.D.] – Wisaal 1238 Hijri [1823 A.D.]) 13wi sadi ke Mujaddid hain.

Aa’la Hazrat Imaam Ahmad Raza Khan barelwi rahmatullāhi alaihi (Wilaadat 10 Shawwal 1272 Hijri [14 June 1856 A.D.] – Wisaal 25 Safar 1340 Hijri [28 October 1921 A.D.]) (Bareilly) 14wi sadi ke Mujaddid hain.

****************
ALLĀH ta’ala us ke Habeeb sallallāhu alaihi wa sallam ke sadqe me
Aur Khwaja Ghareeb nawaaz rahmatullāhi alaihi aur tamaam Auliya Allāh aur Ahle bait aur Ashaba ke waseele se
Hindustan ke musalmano par apna khaas karam farmae aur Islaam ka bolbala ata farmae.
Aur sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur in baato ko yaad rakhkar amal karne ki aur dusro ko bataane ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaaiz muraado ko puri farmae.
Aameen.

******************
For most posts Visit :

FikreUmmat.net Updating… .. .