Ummul Mo’mineen Hazrate Umme Salama, Hind radiy-Allāhu ta’ala anha

Ummul Mo’mineen Hazrate Umme Salama, Hind radiy-Allāhu ta’ala anha :

Aap ki wilaadat 596 A.D. me Makka me hui.

Aap ke waalid ka naam Abu Umayya Suhail ibn Mugheera al-Makhzumi aur waalida ka naam Atikah bint Amir ibn Rabi’ah hai.

Aap ke waalid Quraish ke Banu Makhzum qabeele se ta’alluq rakhte hain.
Aap ke waalid ‘Zaad-ur-Rakib’ (the one who provides food to travellers) ke laqab se mash’hoor the.

*********************
Aap ka nikaah Hazrat Abu Salama Abdullāh ibn Abdul Asad al-Makhzumi radi-Allāhu ta’ala anhu se hua jo Huzoor Rasool-Allāh sallallāhu alaihi wa sallam ki fufi Barrah ke bete the.
Abu Salama Abdullāh se aap ke 2 bete aur 2 betiya hue : Salama, Umar, Zainab aur Durra.

*********************
Elaan e Nabuwwat ke baad Aap ne apne shohar ke saath Islaam apnaaya jab sirf chand log hi musalman hue the. Quraish ne aap par zulm karna shuru kiya.
3 Nabwi (613 A.D.) me Huzoor sallallāhu alaihi wa sallam ke farmaan par aap ne Habasha (Abyssinia) ki taraf hijrat ki. Muhaajireen ke is giroh (qaafile) me 11 musalman mard aur 4 aurte thi.

Kuchh arse baad Musalman Makka waapas aaye to Quraish ne phir se un ko takleef dena shuru kiya.

5 Nabawi (615 A.D.) me aap ne dusri martaba Habasha (Abyssinia) ki taraf hijrat ki. Muhaajireen ke is giroh (qaafile) me 87 mard aur 17 aurten thi.
Kuchh arse baad Makka waapas aaye to Quraish ne phir se un ko takleef dena shuru kiya.

Jab Huzoor sallallāhu alaihi wa sallam ke farmaan par musalman Hijrat karke Madeena jaane lage tab aap ke qabeele waalo ne aap ko rok liya aur Abu Salama ke qabeele waalo ne aap ke bete ko le liya. Chunaanche Abu Salama tanha hi hijrat karke Madeena aa gaye. Baad me Banu Umayya ek shakhs ke samjhane par qabeele waalo ne aap ko aazaad kiya aur jab aap ko apna beta waapas mila to aap bhi hijrat karke Madeena aa gai.
Jab aap Makka se 3 mile door Usmaan ibn Talha se mulaaqat hui. Us waqt wo musalman nahi hue the. Unho ne aap ko pehchaan liya aur jab pata chala ke aap tanha Madeena jaa rahi hain to wo aap ki aur bache ki hifaazat ke liye Makka se Madeena tak humraah aaye aur aap ko Quba me Banu Amr ibn Awf ki hifaazat me diya.

*********************
Jung e Uhad me Hazrat Abu Salama shadeed jakhmi hue.
Huzoor sallallāhu alaihi wa sallam ne Moharram 4 Hijri me Banu Abdul Asad ibn Khuzaymah ke khilaaf Jang e Qatan me 150 musalmano ke saath muslim lashkar ke sardaar banaakar bheja. Jung e ke dauraan puraane jakhm khul gaye aur un ke haalaat bahot aleel ho gaye aur bistar se uthna bhi mushkil ho gaya.
Abu Salama ne aap se kaha ke ‘Huzoor sallallāhu alaihi wa sallam ne farmaaya hai ke jab kisi shakhs par koi museebat aaye to use kehna chaahiye ke Inaa lillāhi wa inna ilaihi raajioon ya’ni Beshak hum ALLĀH hi ke hain aur hum bhi us ki taraf lautkar jaana hai. Aur ye dua karni chaahiye ke Aye hamare Rab, Is ke badle mujhe wo ata farma jo sirf tu ata kar sakta hai.’
Huzoor sallallāhu alaihi wa sallam jab iyaadat ke liye tashreef laaye aur Abu Salama ke liye dua farmai. Huzoor sallallāhu alaihi wa sallam ki maujoodgi me Hazrat Abu Salama ka inteqaal hua.

*********************
Madeena ke Ansaar ashaaba ne aap ki madad ki.
Iddat khatm hone ke baad Hazrat Abu Bakr Siddeeq aur Hazrat Umar faarooq radiy-Allāhu ta’ala anhu ne aap ko nikaah ke liye paigaam bheja to aap ne inkaar kiya.
Jab Huzoor Rasool-Allāh sallallāhu alaihi wa sallam ne aap ko nikaah ka paigaam bheja to aap ne arz kiya ‘Mujhe dar hai ke mujh me aisi aadat ho jis se aap ko naraaz kar du aur ALLĀH ta’ala ke azaab me mubtila ho jaaun aur dusri baat ye hai ke mere 4 bache hain.’ Huzoor sallallāhu alaihi wa sallam ne farmaaya ‘Main ALLĀH ta’ala se dua karunga ke tumhari un aadato ko badal de aur tumhare pariwaar ab mera pariwaar hoga.’

*********************
4 Hijri (626 A.D.) me Huzoor sallallāhu alaihi wa sallam ke saath aap ka nikaah hua tab aap ki umr 29 saal ki thi aur Huzoor sallallāhu alaihi wa sallam ki umr 57 saal thi.

*********************
Aap bahot ibaadat guzaar aur parhezgaar thi.
Aap Ilm aur Husn e akhlaaq me be-misaal thi.

Aap Haafiz e Qur’an thi.

Aap ne 378 ahaadees ki riwaayat farmai hai.

*********************
Hazrat Ali ki waalida Hazrate Faatima binte Asad ke inteqaal ke baad Huzoor sallallāhu alaihi wa sallam ne Sayyeda Faatima Zahra ki zimmedaari aap ko ata faramai.

*********************
Aayat e Tat’heer aap ke ghar me naazil hui.
Us waqt Huzoor sallallāhu alaihi wa sallam Sayyeda Faatima ke saath aap ke ghar par tashreef farma the. Unho Hazrate Ali, Hazrate Hasan wa Husain ko bhi bulaaya. Aur sab saath milkar khaana khaa rahe the. Tab Hazrate Jibreel alaihis salaam ye aayat lekar aaye. Huzoor sallallāhu alaihi wa sallam ne Hazrate Ali, Sayyeda Faatima, Hazrate Hasan aur Husain ko apni paas bulaakar chaadar odhaai aur farmaaya ‘Aye ALLĀH! Ye mere Alhe bait hain. In par tera khaas karam ata farma.’
Aap ranjeeda hui. Huzoor sallallāhu alaihi wa sallam ne wajah puchhi to aap ne farmaaya ‘Aap ne hume alag kar diya.’ Huzoor sallallāhu alaihi wa sallam farmaaya ‘Tum bhi Ahle bait me se ho.’

*********************
Ek martaba aap ne Huzoor sallallāhu alaihi wa sallam se arz kiya ‘Ya Rasool-Allāh sallallāhu alaihi wa sallam! Qur’an majeed ki aayaten sirf mardo ke baare me hi naazil hoti hain, aurto ke baare me nahi.’ Is par ALLĀH ta’ala ne aayat naazil farmaai (33 Surah al-Ahzaab, Aayat 35) ‘Beshak musalman mard aur musalman aurte aur mo’min mard aur mo’min aurte aur farmaan bardaar mard aur farmaan bardaar aurte aur sache (sidq waale) mard aur sachi aurte aur sabr waale mard aur sabr waali aurte aur aajizi waale mard aur aajizi waali aurte aur sadqa (khairaat) karne waale mard aur sadqa karne waali aurte aur rozadaar mard aur rozadaar aurte aur apni sharmgaaho ki hifaazat karne waale mard aur hifaazat karne waali aurte aur kasrta se ALLĀH ka zikr karne waale mard aur zikr karne waali aurate ALLĀH ne in sab ke liye bakhshish aur azeem ajr tayyaar farma rakha hai.’

*********************
Ek martaba Huzoor sallallāhu alaihi wa sallam aap ke makaan me tashreef farma the. Itne me ek shakhs mulaaqat ke liye aaya. Aap ne Huzoor sallallāhu alaihi wa sallam ke saath us shakhs ke saath guftagu ki. Jab wo chala gaya to Huzoor sallallāhu alaihi wa sallam ne aap se puchha ‘Aap ne us shakhs ko pehchaana?’ Aap ne farmaaya ‘Wo Ziya al-Qalbi the.’ Huzoor sallallāhu alaihi wa sallam ne farmaaya ‘Wo Jibr’eel alaihis salaam the.’

*********************
Ek roz Hazrate Husain radiy-Allāhu ta’ala anhu Huzoor Rasool-Allāh sallallāhu alaihi wa sallam ki god me tashreef farma the.
Hazrate Umme Fazl binte Haaris radiy-Allāhu ta’ala anha bhi paas baithi thi. Unho ne dekha ki Huzoor sallallāhu alaihi wa sallam ki dono chashmaane mubarak se aansoo beh rahe the.
Hazrate Umme Fazl ne arz kiya ‘Ya Rasool-Allāh sallallāhu alaihi wa sallam! Yeh aansoo kaise hai?’
To Huzoor sallallāhu alaihi wa sallam ne farmaaya ki ‘Jibr’eel ne mujhe khabar di hai ki mere is bache ko meri ummat qatl kar degi. Jibr’eel ne jaha yeh shaheed hoga us sar-zameen ki surkh mitti laakar mujhe di hai.’
Huzoor sallallāhu alaihi wa sallam ne us mitti ko sungha aur farmaaya ‘Is mitti se mujhe boo e Ard e Taf (Karbala) aati hai.’

Phir wo mitti Huzoor sallallāhu alaihi wa sallam ne Hazrate Umme Salma radiy-Allāhu ta’ala anha ko de di aur farmaaya ‘Is mitti ko apne paas rakho jab yeh mitti khoon ban jaaye to samajh lena mera beta shaheed ho gaya.’

Hazrat Umme Salma radi-Allāhu ta’ala anha ne us mitti ko ek shishi me band kar liya phir jis din Hazrat Imaam Husain radi-Allāhu ta’ala anha Karbala me shaheed hue usi roz yeh mitti band shishi me khoon ban gai.

*********************
Huzoor sallallāhu alaihi wa sallam ne kai mauqe par aap se mashwara kiya tha.

Aap Sulaih Hudaibiyah ke mauqe par Huzoor sallallāhu alaihi wa sallam ke saath thi.

Aap Junge Khaibar, Fateh Makka, Jung e Taa’if, aur dusri jung me Huzoor sallallāhu alaihi wa sallam ke saath thi.

Hajjatul wida me bhi aap Huzoor sallallāhu alaihi wa sallam ke saath thi.

*********************
Aap taaleem e deen karti thi aur logo ke mas’ale ke faisle bhi farmaati thi.

*********************
Tamaam Azwaaj e mutahhirat me aap ka wisaal sab se aakhir me hua.

*********************
Aap ka wisaal 3 Rabi’ us Saani 64 Hijri (683 A.D.) ko hua.
Aap ki namaaz e janaaza Hazrat Abu Huraira radiy-Allāhu ta’ala anhu ne padhai.

Aap ka mazaar Jannatul Baqi, Madeena munawwara me hai.

***************
ALLĀH ta’ala us ke Habeeb sallallāhu alaihi wa sallam ke sadqe me
Aur Ummul mo’mineen Hazarte Umme Salama radiy-Allāhu ta’ala anha aur Ahle bait ke waseele se
Sab ko mukammal ishq e Rasool ata farmae aur Sab ke Eimaan ki hifaazat farmae aur Sab ko nek amal karne ki taufiq ata farmae.
Aur Sab ko dunya wa aakhirat me kaamyaabi ata farmae aur Sab ki nek jaa’iz muraado ko puri farmae.
Aameen.